وبلىستىڭ باس سانيتارلىق دارىگەرى ەرمۇحانبەت داۋلەتباەۆ ءوڭىردىڭ ەپيدەميالىق احۋالى كۇرت قۇبىلىپ, سانيتارلىق جاعدايدىڭ كۇن ساناپ كۇردەلەنىپ بارا جاتقانىن ايتىپ, كارانتيندىك شەكتەۋ شارالارىن كۇشەيتۋ تۋرالى قاۋلىسىن قايتا وزگەرتتى. وسىلايشا, اتالعان قۇجاتقا وسى ايدىڭ ىشىندە ەكىنشى رەت وزگەرىس ەنگىزىلدى.
ەڭ الدىمەن قالاداعى ءتۇرلى مەكەمەلەر مەن كاسىپورىنداردىڭ جۇمىس كەستەسى وزگەرۋى كەرەك. مەكەمە قىزمەتكەرلەرى اۋىسىمعا ءبولىنىپ جۇمىسقا ءارتۇرلى ۋاقىتتا كەلىپ-كەتۋى ءتيىس. سوندا قوعامدىق كولىكتەردە جولاۋشىلار دا ازايىپ, ىندەت جۇقتىرۋ قاۋپى تومەندەيدى.
جاڭا قاۋلىدا بۇدان بىلاي جابىق عيماراتتا دا, اشىق الاڭدا دا فورۋم, كونفەرەنتسيا, سەمينار سياقتى باسقوسۋلار مەن بانكەت, ۇيلەنۋ تويى, مەرەيتوي سەكىلدى وتباسىلىق ءىس-شارالاردى وتكىزۋگە تىيىم سالىندى. سونداي-اق ۇجىمدىق ءىس-شارالار وتكىزۋگە ارنالعان عيماراتتار مەن جەكە ۇيلەردى جالعا بەرۋگە بولمايدى. تەك Ashyq قوسىمشاسى ورناتىلعان قوعامدىق تاماقتانۋ ورىندارىندا ەكپە قابىلداعان 10 ادامنان ءارى اسپايتىن كەزدەسۋلەر ۇيىمداستىرۋعا جانە جەرلەۋ راسىمىنەن كەيىن اس بەرۋگە عانا رۇقسات بار. اسقا قاتىساتىن ادامداردىڭ سانى 30-دان ءارى اسپاۋى ءتيىس.
بۇعان قوسا جابىق عيماراتتا ورنالاسقان بيليارد, كومپيۋتەر, بوۋلينگ كلۋبتارى, بالالارعا ارنالعان ويىن الاڭدارى مەن اتتراكتسيوندار سياقتى ساۋىق مەكەمەلەرىنىڭ, بۋكمەكەرلىك كەڭسەلەردىڭ جۇمىسى توقتاتىلدى.
سونىمەن قاتار Ashyq جوباسىنا قاتىسۋشىلار ساناتىندا بار-جوعىنا قاراماستان, تەاترلار, مادەنيەت ۇيلەرى, كورمەلەر, تۇنگى كلۋبتار مەن ويىن كلۋبتارى جابىلدى. Ashyq-پەن جۇمىس ىستەيتىن كينوتەاترلاردا كورسەتىلىم كەزىندە كورەرمەندەر زالىنداعى ورىندىقتاردىڭ 70 پايىزى بوس تۇرۋى شارت.
ءدىني نىساندار اشىق بولادى. بىراق جۇما نامازى مەشىتتە ەمەس, ۇيدە وقىلۋى ءتيىس. شىركەۋ, سيناگوگا, سوبورلارعا دا كوپشىلىكتىڭ باسىن قوسىپ عيبادات راسىمدەرىن وتكىزۋگە رۇقسات جوق.
ال مونشا, اكۆاپارك, ساۋنا, تەرموپارك, باسسەيندەر مەن فيتنەس-ورتالىقتارعا, سونداي-اق باسقا دا كەز كەلگەن سپورت نىساندارىنا «جاسىلدار» عانا كىرە الادى.
قوستاناي وبلىسى
