وڭتايلىسى – ونلاين وقۋ

وسىنداي سەبەپتەن سوڭعى ءبىر اپتادا كۇن سايىن ۆيرۋس­تى جۇقتىرۋشىلار سانى 500-دەن تۇسپەي تۇر. ماسەلەن، 19 قاڭتاردا مۇنايلى ءوڭىردىڭ 568 تۇرعىنىنان قاۋىپتى ىندەتتىڭ بەلگىسى انىقتالىپ وتىر. ونىڭ ىشىندە اتىراۋ قالاسىندا – 396، تەڭىز كەن ورنىندا جۇمىس ىستەيتىن 61 جۇمىسشى بار. سون­داي-اق قىزىلقوعا اۋدانىندا – 30، جىلىويدا – 21، يندەردە – 20، قۇرمانعازىدا – 16، ماحامبەتتە – 15، يساتايدا – 14، ماقات اۋدانىندا 5 ناۋقاس تىركەلدى.

«قازىر «قىزىل ايماقتاعى» اتىراۋ وبلىسىندا 3 443 ادام ءۇي جاعدايىندا ەمدەلىپ جاتىر. جىلىوي اۋدانىندا ورنالاسقان «تەڭىز» كەن ورنىنداعى ينفەك­تسيالىق ستاتسيوناردا – 501، مو­دۋلدىك اۋرۋحانادا – 171، اۋدان­دارداعى ستاتسيونارلاردا – 48، ال №2 وبلىستىق اۋرۋحانادا – 42، فتيزيوپۋلمانولوگيالىق ورتالىقتا 30 ادام حاتتاماعا سايكەس ەم-دوم الۋ ءۇشىن وقشاۋ­لانعان»، دەپ مالىمدەدى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.

وڭىردەگى 2 360 توسەكتىك ورىن­ ينفەكتسيالىق ستاتسيونارلاردا 801 ادام (جۇكتەمە – 33،9%) جاتىر. ستاتسيونارلاردىڭ 106 ورىنعا ەسەپتەلگەن جانساقتاۋ بولىم­شە­لەرىندە كوروناۆيرۋسپەن اۋىرىپ جاتقان 12 ناۋقاستىڭ جاعدايى اۋىر دەپ باعالانىپ وتىر. ونىڭ ىشىندە ەكى پاتسيەنت وكپەنى جاساندى جەلدەتۋ اپپاراتىنا قوسىلعان. بۇل بولىم­شەلەردەگى جۇكتەمە – 11،3%.  سوڭ­عى ەكى كۇندە قاۋىپتى ۆيرۋس­تى جۇقتىرعان 3 ناۋقاس قايتىس بولعان.

دارىگەرلەر ءبىر ەلدى عانا ەمەس، جاھان جۇرتىن قاۋىپتىڭ قا­ۋىزىنا سىيدىرعان جۇقپالى ىندەتتىڭ تارالۋىن ۆاكتسينا سالدىرۋ عانا تەجەي الاتىنىن جوققا شىعارمايدى. وسى ورايدا وڭىردە COVID-19 ينفەكتسيا­سىنا قارسى ۆاكتسينالاردىڭ ءبىرىنشى كومپونەنتىن 262 250 ادام سالدىرعانى بەلگىلى بولىپ وتىر. ۆاكتسينالاردىڭ ەكىنشى كومپونەنتىن ەكتىرگەندەر سانى 245 198 ادامعا جەتىپتى. الايدا Pfizer ەكپەسىن العاندار مەن قاي­تادان ۆاكتسينا سالدىرۋدىڭ كور­سەتكىشى ءالى تومەن ەكەنى باي­قالادى. ماسەلەن، جۇكتى ايەلدەر مەن بالا ەمىزىپ وتىرعان انالارعا، 12-18 جاس ارا­لى­عىنداعى جاس­وسپىرىمدەرگە ار­نال­عان Pfizer ۆاكتسيناسىن 3 891 ادام ەكتىرگەن. ال 16 560 ادام عانا رەاۆكتسينالاۋدان وتكەن.

«قىزىل ايماقتاعى» تۇر­عىن­داردىڭ قاۋىپتى ۆيرۋسقا شالدى­عۋىن تەجەۋ ءۇشىن كارانتيندىك شەك­تەۋلەر تالابى كۇشەيتىلدى. باس سانيتار دارىگەردىڭ مىندەتىن ات­قارۋشى ا.بەكەشەۆانىڭ قاۋلى­سىمەن 600-دەن اسا وقۋشىسى بار مەكتەپتەردەگى ساباق ونلاين فور­ماتقا كوشىرىلسە، 600-گە دەيىن وقۋشى وقيتىن مەكتەپتەر سا­باقتى شتاتتىق رەجىمدە وتكىزىپ جاتىر.

«كوللەدجدەر مەن جوعارى وقۋ ورىندارىنىڭ ستۋدەنتتەرىن وقىتۋ ارالاس وقىتۋ فورماتىنا – بارلىق ءدارىس ونلاين، تا­جىريبەلىك، زەرتحانالىق، سە­مينارلىق ساباقتار يكەمدى كەس­تە بويىنشا شتاتتىق رەجىمدە، ۆاكتسينالانعان وقۋشىلار مەن تولىق ۆاكتسينالاۋ كۋرسىن اياق­تاعان ستۋدەنتتەردى وقۋ ورنى اكىم­شىلىگىنىڭ قاراۋى بويىنشا شتاتتىق رەجىمدە وقىتۋعا جول بەرىلەدى. ەپيدەميالىق تاۋەكەل ايماعىنا قاراماستان مەكتەپتەن تىس قوسىمشا ءبىلىم بەرۋ ۇيىم­دارىندا جەكە ساباقتار شتاتتىق رەجىمدە، توپتىق – 10 ادامعا دەيىن، مۇمكىندىگى شەكتەۋلى بالالار مەن ەرەسەكتەر ءۇشىن تۇزەتۋ (كوررەكتسيا) ورتالىقتارىندا، بول­مەلەردە جەكە جانە 8 ادامعا دەيىنگى توپتىق ساباقتار شتاتتىق رەجىمدە وتكىزىلەدى»، دەلىنگەن جاڭا قاۋلىدا.

مۇنداي شەكتەۋ وقۋشىلاردىڭ كوروناۆيرۋس ينفەكتسياسىن جۇق­تىرماۋى ءۇشىن قولعا الىنىپ وتىر. دەمەك «قىزىل ايماقتاعى» وقۋ­شىلارعا وڭتايلىسى – ونلاين وقۋ.

اتىراۋ وبلىسى