بۇگىندە ءوڭىردىڭ تۇراقتاندىرۋ قورىندا ازىق-ت ۇلىكتىڭ 14 ءتۇرى بويىنشا 9,9 مىڭ توننا اۋىلشارۋاشىلىق ونىمدەرى ساقتاۋلى تۇر. مۇنىڭ سىرتىندا, وبلىس تۇرعىندارىن الەۋمەتتىك ماڭىزى بار تاۋارلارمەن قامتاماسىز ەتۋگە جاۋاپتى «توبىل» الەۋمەتتىك-كاسىپكەرلىك كورپوراتسياسى ازىق-ت ۇلىكتىڭ 8 ءتۇرى بويىنشا نارىقتاعى باعا ايىرماشىلىعىن رەتتەۋمەن اينالىسۋدا.
اتالعان كورپوراتسيانىڭ مالىمەتىنشە, وبلىس كولەمىندە تۇراقتاندىرۋ قورىنداعى ازىق-ت ۇلىك ونىمدەرىن ارزان باعامەن ساتاتىن 200-گە جۋىق ساۋدا ورنى بار. ونىڭ 30-دان استامى – قوستانايدا. مىسالى, بۇل دۇكەندەردە ماكارون ونىمدەرىنىڭ كيلوسى 188 تەڭگەدەن ارىگە بارمايدى. الەۋمەتتىك ساۋدا سورەلەرىنەن ءبىر كيلو سيىر ەتىن – 1 700, ۇندى – 120, تاۋىق ەتىن – 800, كۇرىشتى – 230, سارى مايدى 1 800 تەڭگەدەن ساتىپ الۋعا بولادى. سونداي-اق سۇيىق مايدىڭ ءليترى 710 تەڭگە بولسا, جۇمىرتقا 39 تەڭگەگە تابىلادى.
وڭىردە الەۋمەتتىك ماڭىزى بار ازىق-ت ۇلىك تاۋارلارىنا تۇراقتى تۇردە مونيتورينگ جۇرگىزىلىپ, بولشەك ساۋداداعى باعانىڭ وسۋىنە جول بەرمەۋ جونىندە ءتۇسىندىرۋ جۇمىستارى جۇرگىزىلۋدە. ناتيجەسىندە, تاۋار باعاسىن نەگىزسىز كوتەرىپ جىبەرگەن «Rauzet ساۋدا», «سولنەچنىي», «استىقجان قوستاناي», «مەركۋري», «نيزكوتسەن», «وسوبا» سياقتى سۋپەرماركەتتەر ەسكەرتۋ تۇرىندەگى اكىمشىلىك جازاعا تارتىلدى.
باسەكەلەستىكتى قورعاۋ جانە دامىتۋ جونىندەگى وبلىس دەپارتامەنتىنىڭ قىزمەتكەرلەرى وپتتورگ Company Plus, Solar Chickens جانە «التا XXI ۆەك» سياقتى كوتەرمە ساۋدا ورىندارىندا تاۋىق ەتى كەم دەگەندە 15%-عا نەگىزسىز قىمباتتاعانىن انىقتاپ وتىر. اتالعان ساۋدا ورىندارىنىڭ بارىنە قاتاڭ اكىمشىلىك ەسكەرتۋ بەرىلدى.
باعانى تۇراقتاندىرۋدىڭ ەڭ ءتيىمدى جولدارىنىڭ ءبىرى – جەرگىلىكتى كاسىپورىنداردا وندىرىلگەن ازىق-ت ۇلىك تاۋارلارىنىڭ ساۋدا ورىندارىنا ەشبىر دەلدالسىز تىكەلەي جەتۋىن قامتاماسىز ەتۋ. وسى ورايدا, وبلىستاعى تاۋار وندىرۋشىلەر مەن ءىرىلى-ۇساقتى دۇكەندەردىڭ اراسىندا نان, سۇيىق ماي, جۇمىرتقا, كارتوپ, قانت جانە كوكونىس تاۋارلارىن بولشەك ساۋدا سورەسىنە تىكەلەي جەتكىزۋ جونىندە 953 مەموراندۋم, 783 شارت جاسالعانىن ايتا كەتكەن ءجون.
قوستاناي وبلىسى
