ەلوردادا توتەنشە جاعداي رەجيمىندە اتقارىلعان شارۋالار مەن قازىرگى احۋالدى قالالىق پوليتسيا دەپارتامەنتىنىڭ باستىعى ەرجان سادەنوۆ باياندادى.
«قالاداعى جەدەل جاعداي تۇراقتى جانە باقىلاۋدا تۇر. توتەنشە جاعداي رەجيمى باستالعاننان بەرى قوعامدىق ءتارتىپتى قامتاماسىز ەتۋ, قىلمىستار مەن وزگە دە قۇقىققا قايشى ارەكەتتەردىڭ ۋاقتىلى الدىن الۋ جانە جولىن كەسۋ ماقساتىندا گورنيزوننىڭ جەكە قۇرامى جۇمىس اتقاردى. التى بلوكبەكەت تاۋلىكتىك رەجيمگە كوشىرىلدى.
بلوكبەكەتتەر مەن قالا ىشىنەن تەكسەرىس بارىسىندا 7 بىرلىك قارۋ, وق-دارىلەر جانە 72 بىرلىك سۋىق قارۋ تاركىلەندى. سونىمەن قاتار 11 ەسىرتكى قىلمىسىنىڭ جولى كەسىلدى.
وكىنىشكە قاراي, كەيبىر قالا تۇرعىندارى كومەندانتتىق ساعاتتى بۇزىپ, كوشەدە جۇرگەن. توتەنشە جاعداي رەجيمىن بۇزعانى ءۇشىن 651 ادام اكىمشىلىك جاۋاپتىلىققا تارتىلدى, ولاردىڭ ىشىندە ورەسكەل زاڭ بۇزۋشىلىققا بارعان 42-ءسى قاماۋعا الىنىپ, 198-ىنە ايىپپۇل سالىندى, قالعاندارىنا ەسكەرتۋ بەرىلدى. ءتارتىپ ساقشىلارى اۋلالار مەن پاتەرلەردى ارالاپ, تەكسەرۋ جۇمىستارىن جۇرگىزدى.
كوشى-قون زاڭناماسىن بۇزعانى ءۇشىن 76 شەتەلدىك ازامات ەلدەن شىعارىلدى. پوليتسەيلەر جەرگىلىكتى-رەيدتىك ءىس-شارالاردى وتكىزۋ بارىسىندا كومەندانتتىق ساعات رەجيمىن بۇزىپ, قىزمەتىن جالعاستىرعان كوڭىل كوتەرۋ مەكەمەلەرى انىقتالدى.
ناتيجەسىندە 64 كاسىپكەرلىك سۋبەكتىسىنىڭ جۇمىسىنا توسقاۋىل قويىلدى. سونداي-اق الكوگولدىك ونىمدەردى ساتقان-ساتپاعانىن انىقتاۋ ءۇشىن دۇكەندەرگە دە تەكسەرىس جۇرگىزىلدى. توتەنشە جاعداي كەزەڭىندە «102» ارناسىنا كەلىپ تۇسكەن قاڭىراۋلار سانى ارتتى. ولاردىڭ باسىم كوپشىلىگى انىقتامالىق سيپاتتا بولدى. قىلمىس پەن وزگە دە قۇقىق بۇزۋشىلىقتىڭ سانى ەداۋىر ازايدى.
وسى قيىن كۇندەرى ىشكى ىستەر ورگاندارى مەن قورعانىس مينيسترلىگىنىڭ جەكە قۇرامى قوعامدىق ءتارتىپتى قامتاماسىز ەتتى. ازاماتتار وتكىزىلىپ جاتقان شارالارعا تۇسىنىستىكپەن قاراپ, قولداۋ ءبىلدىرىپ, ۇلكەن كومەك كورسەتتى. بارلىق قالا تۇرعىندارىنا, قوعامدىق ۇيىمدار مەن ەرىكتىلەرگە شەكسىز العىسىمدى بىلدىرەمىن. بىرلەسكەن جانە جۇيەلى جۇمىستىڭ ارقاسىندا ەلوردامىزداعى ءتارتىپ پەن تىنىشتىقتى ساقتادىق», دەدى قالالىق پوليتسيا دەپارتامەنتىنىڭ باستىعى ەرجان سادەنوۆ
