اتالعان بريفينگكە پرەمەر-ءمينيستردىڭ ورىنباسارى ەرالى توعجانوۆ, دەنساۋلىق ساقتاۋ ءمينيسترى اجار عينيات, دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا قاتىستى.
– جالپى, الەم بويىنشا اۋرۋ سانىنىڭ كەزەكتى رەت كۇرت ارتۋىنا وزدەرىڭىز دە كۋا بولىپ وتىرسىزدار. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا, ەۋروپادا سوڭعى ەكى اپتادا اۋرۋ سانى ءوستى. ونىڭ ىشىندە حالىقتىڭ 50%-ى «وميكرونمەن» اۋىرىپ جاتىر. اۋرۋشاڭدىقتىڭ ارتۋىنا حالىقتىڭ بەلسەندى ىشكى جانە سىرتقى كوشى-قونى, ۇزاق مەرەكەلىك كۇندەر, سونداي-اق ەلدەگى تولقۋلار دا ىقپال ەتكەن. «وميكروندى» ادەتتەگى ماۋسىمدىق ۆيرۋستىق ينفەكتسيا دەپ ويلايتىندار بار. بۇل شتامدى قاراپايىم تۇماۋ دەپ قابىلداۋعا بولمايدى. «وميكرون» شتامىنىڭ ەرەكشەلىگى – تەز جۇعاتىنىندا جانە ونى قايتا جۇقتىرۋ قاۋپى جوعارى. تارالۋ كوەففيتسيەنتى – 1-5. ول «دەلتا» نۇسقاسىنان 70 ەسە جىلدام تارالادى. ماسەلەن, تەك سوڭعى تاۋلىكتە 9 700 جاعداي تىركەلگەن. كەيىنگى ايدا كوروناۆيرۋس ينفەكتسياسىن جۇقتىرۋ 20 ەسەگە ءوستى. مۇنداي تاۋلىكتىك كورسەتكىش پاندەميا باستالعان ساتتەن بەرى تىركەلمەگەن, – دەدى ە.توعجانوۆ.
سونىمەن قاتار ۇكىمەت باسشىسىنىڭ ورىنباسارى ەلىمىزدىڭ بارلىق وڭىرىندەگى ەپيدەميالىق احۋالدىڭ ناشارلاعانىنا توقتالدى. ونىڭ ايتۋىنشا, اۋرۋشاڭدىق دەڭگەيى بويىنشا نۇر-سۇلتان, الماتى قالالارى, قاراعاندى جانە اتىراۋ وبلىستارى كوش باستاپ تۇر. جەلتوقسان ايىنىڭ سوڭىندا ستاتسيونارلاردا 3 مىڭنان از ادام ەم السا, بۇگىندە ناۋقاستار سانى 7 مىڭنان استى. ەمحانالار دەڭگەيىندە ەمدەلەتىن ناۋقاستار سانى دا 4,8 ەسەگە ارتتى. ءبىر عانا نۇر-سۇلتان قالاسى بويىنشا ستاتسيونارلاردا ەم الاتىن ادامداردىڭ سانى 200 ادامنان 1 مىڭعا دەيىن, ياعني 5 ەسەگە وسكەن. بۇل جاعداي دەنساۋلىق ساقتاۋ جۇيەسىنە ۇلكەن جۇكتەمە ارتىپ وتىر. وسىعان بايلانىستى ۆەدومستۆوارالىق كوميسسيا قوسىمشا شەكتەۋ شارالارىن قابىلدادى. ياعني ۆاكتسينالاۋ مارتەبەسىنە قاراماستان, شەتەلدەن كەلگەندەردىڭ بارلىعىندا تەرىس پتر تەستىنىڭ بولۋى مىندەتتەلدى. Ashyq باعدارلاماسى بويىنشا «جاسىل» مارتەبە بولعاندا عانا جۇمىس ىستەۋگە رۇقسات ەتىلگەن وبەكتىلەر تىزبەسى كەڭەيتىلدى. وڭىرلەردەگى ەپيدەميالىق احۋالعا بايلانىستى وقۋشىلاردى, ستۋدەنتتەردى وقىتۋعا ديففەرەنتسيالدى ءتاسىل قولدانىلادى. حالىق كوپ جينالاتىن ورىندارعا قوسىمشا شەكتەۋلەر ەنگىزىلدى. بۇل ءماجبۇرلى شارالار, ەڭ الدىمەن, ازاماتتارىمىزدى قورعاۋعا باعىتتالعان.
– قازىرگى «وميكرون» شتامى تەز تارالۋىمەن قويماي, جاس تالعامايتىندىعىمەن قاۋىپتى. قالىپتاسقان يممۋنيتەتتى ساقتاپ قالۋدىڭ بىردەن-ءبىر جولى – رەۆاكتسينالاۋ. «الدىن الا ەمدەلگەننىڭ ەسەسى كەتپەس» دەيدى حالقىمىز. سوندىقتان ۆاكتسينا الىپ ۇلگەرمەگەن ءاربىر قازاقستاندىق تەز ارادا ۆاكتسينا قابىلداۋى كەرەك. ۆاكتسينا العانىنا 6 اي وتكەن ازاماتتار – رەۆاكتسينالانۋى قاجەت. ەڭ باستىسى, قازاقستاندا قولدانىلاتىن بارلىق ۆاكتسينا ءتيىمدى ءارى قاۋىپسىز, – دەدى ە.توعجانوۆ.
سونداي-اق ول جۋرناليستەر تاراپىنان Pfizer ۆاكتسيناسىنا قاتىستى قويىلعان سۇراقتارعا دا جاۋاپ بەردى.
– بىرىنشىدەن, Pfizer قازىر قولجەتىمدى. 4 ملن دوزادان استام Pfizer ەكپەسىن ساتىپ الدىق. قازىر ۆاكتسينانىڭ بۇل ءتۇرى قولجەتىمدى ادامداردىڭ ناقتى ساناتى بار. ولار – 12-15 جاس ارالىعىنداعى جاسوسپىرىمدەر, جۇكتى جانە بالا ەمىزەتىن ايەلدەر. ۇجىمدىق يممۋنيتەت قالىپتاستىرۋ قاجەتتىگىن ەسكەرسەك, 60-تان اسقان ادامدارعا دا مۇمكىندىك بەردىك. بۇل – ەل حالقىنىڭ 1 ملن-نان اسا ادامى دەگەن ءسوز. سوندىقتان Pfizer ۆاكتسيناسى اتالعان ساناتتارعا تولىق قولجەتىمدى. باسقا دا ۆاكتسينا تۇرلەرى بار ەكەنىن ەشكىم ۇمىتپاۋ كەرەك. ەكپەنىڭ قولجەتىمدىلىگى تۋرالى ماسەلە كۇن تارتىبىندە تۇرعان جوق. بۇعان قوسا قوسىمشا 1 ملن دوزا ساتىپ الامىز. ال اقىلى Pfizer ۆاكتسيناسى تۋرالى ماسەلە ىلعي كوتەرىلىپ ءجۇر. بىرنەشە رەت جاۋاپ بەردىك دەپ ويلايمىن. Pfizer-ءدى اقىلى ساتپاۋ تۋرالى شەشىم قابىلدانعان. جوعارىدا Pfizer ۆاكتسيناسىن 60-تان اسقاندارعا تاعى بولەمىز دەدىك قوي. سونىڭ ورنىن تولتىرۋ ءۇشىن ءساۋىر ايىنا قاراي
1 ملن دوزاسىن العىزامىز, – دەدى پرەمەر-ءمينيستردىڭ ورىنباسارى.
بريفينگ بارىسىندا ەلدەگى تارتىپسىزدىكتەر كەزىندە زارداپ شەككەندەر تۋرالى ماعلۇمات سۇرالدى. بۇل دەرەكتەردى دەنساۋلىق ساقتاۋ ءمينيسترى اجار عينيات كەلتىردى.
– وڭىرلەردىڭ دەنساۋلىق ساقتاۋ باسقارمالارىنىڭ شۇعىل دەرەكتەرى بويىنشا, توتەنشە جاعداي رەجىمى ەنگىزىلگەن كەزدەن باستاپ, جالپى ەلدەگى تەرروريستىك اكتىلەردىڭ سالدارىنان 2 739 زارداپ شەگۋشى مەديتسينالىق كومەككە جۇگىنگەن. بۇگىنگى تاڭدا 200 ادام ستاتسيونارلىق ەم الىپ جاتىر. ادامدار جازىلىپ شىعىپ, ءارى قاراي امبۋلاتورلىق ەمدەلۋگە باعىتتالۋدا. قازىر جانساقتاۋ بولىمدەرىندە اۋىر جاعدايدا جاتقان 14 ناۋقاس بار. ونىڭ ىشىندە تورتەۋى – الماتىدا, بىرەۋى – الماتى وبلىسىندا, بەسەۋى – قىزىلوردا وبلىسىندا. مەديتسينالىق ۇيىمداردا كوز جۇمعاندارعا كەلسەك, بۇگىندە 177 ناۋقاس قايتىس بولدى. سوڭعى 3 كۇندە رەانيماتسيادا جاتقان ەكى ناۋقاستىڭ جاعدايى ناشارلاپ, كوز جۇمدى. بىزدەگى دەرەك بويىنشا, ميتينگىگە قاتىسۋشى ءبىر جۇكتى ايەل زارداپ شەگىپ, تالعار اۋداندىق ورتالىق اۋرۋحاناسىنا تۇسكەن. ونى دارىگەرلەر قۇتقارىپ قالعان. الماتىدا 5 جانە 12 جاستاعى ەكى بالا قايتىس بولدى دەگەن مالىمەت بار, – دەدى ا.عينيات.
