ءبىز وتكەن وتىز جىلداعى قاتەلىكتەردى, كەمشىلىكتەردى تىزبەلەپ, وعان باعاسىن بەرمەي جانە قاڭتارداعى قايعىلى وقيعاعا سايكەسىنشە شىنايى باعا بەرمەي, جاڭا قازاقستاندى قۇرايىق دەگەن ءسوز, مەنىڭشە, بۇل مانيپۋلياتسيا سياقتى. وتكەنگە كوز تاستاماي, «جابۋلى قازان جابۋلى كۇيىندە قالا بەرسىن», ءبىز ەندى جاڭاشا ءومىر باستايمىز دەگەن بۇل – يلليۋزيا. قاڭتار ايىنىڭ شىندىعى ءالى تولىق اشىلعان جوق. قايتىس بولعان ادامداردىڭ كىم ەكەنى, قانداي جاعدايدا قايتىس بولعانىن قوعام تولىق بىلمەيدى. وعان كىم جاۋاپ بەرەدى؟ بيلىك باسىنداعىلاردىڭ, ونىڭ ىشىندە مەملەكەت باسشىسىنىڭ جاۋاپكەرشىلىگى قانداي؟
سول سەبەپتى مەنىڭ ويىمشا, ەشقانداي دا الەۋمەتتىك شەشىمدەر, ەكونوميكالىق جەڭىلدىكتەر ءبىزدى العا جىلجىتۋعا مۇمكىندىك بەرمەيدى. سەبەبى ءبىزدى قاڭتار ايىنىڭ تراگەدياسى اياعىمىزدان بايلايتىن ۇلكەن تۇساۋ. سوندىقتان ماسەلەنى قارجى ءبولۋ ارقىلى شەشە المايمىز. قازىر ءبىزدىڭ قوعامعا كەرەگى – شىندىقتىڭ اشىلۋى, بيلىكتىڭ جاۋاپكەرشىلىكتى وزىنە الۋى. شەرۋگە شىققانداردى تەرروريست, بۇزاقىلار دەپ تەك ءبىر جاقتى باعا ەمەس, جان-جاقتى, شىنايى باعا بەرىلۋى كەرەك. ەڭ الدىمەن, مەملەكەتتىك توڭكەرىس جاساۋعا قانداي دا ءبىر توپتىڭ, ادامداردىڭ جوسپارى بولسا, سول جوسپارى ناقتى, اشىق ايتىلۋى كەرەك. سول سۇراقتاردىڭ بارىنە جاۋاپ الىنباي, جاڭا قازاقستاندى قۇرۋ دەگەننىڭ وزەكتىلىگى جوق.
سەرىك بەيسەمباەۆ,
الەۋمەتتانۋشى,
تسيفرلىق زەرتتەۋ ورتالىعىنىڭ جەتەكشىسى
