ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ, پارلامەنت ءماجىلىسىنىڭ قحا دەپۋتاتتىق توبىنىڭ مۇشەلەرى, قحا قوعامدىق قۇرىلىمدارىنىڭ جانە ەتنومادەني بىرلەستىكتەردىڭ باسشىلارى, مەملەكەتتىك ورگاندار مەن باق وكىلدەرى قاتىستى.
جيىننىڭ باسىندا م.ءازىلحانوۆ قازاقستان حالقى اسسامبلەياسى ەلدەگى ورىن العان قايعىلى وقيعانىڭ سالدارىن جويۋعا بەلسەندى اتسالىسىپ جاتقانىن اتاپ ءوتتى. «قاسىرەتتى قاڭتار» كۇندەرى اسسامبلەيانىڭ بارلىق مۇشەسى ءىس جۇزىندە ەلىمىزدىڭ بىرلىگى مەن تۇتاستىعىنا بەيىمدىلىگىن كورسەتتى, ەلىمىزدە ورىن العان تەرروريستىك اكتسيالاردىڭ, بۇزاقىلىقپەن توناۋدىڭ جولىن كەسۋگە باعىتتالعان مەملەكەت باسشىسىنىڭ باتىل شارالارىن قولداپ, قالىپتى ءومىردى قالپىنا كەلتىرۋگە بەلسەنە اتسالىسۋدا. بارلىعىمىزعا تاتۋلىق, بىرلىك, كەلىسىم, ازاماتتىق بەيبىتشىلىك پەن تۇراقتىلىق دەگەن سوزدەر كۇندەلىكتى ءومىرىمىزدىڭ ىرگەلى نەگىزى مەن باستى قۇندىلىقتارى ەكەندىگى ايقىندالدى», دەدى مارات ءازىلحانوۆ.
ونىڭ ايتۋىنشا, قازاقستان پرەزيدەنتى قاسىم-جومارت توقاەۆتىڭ ءماجىلىس وتىرىسىندا سويلەگەن باعدارلامالىق ءسوزى قاڭتار داعدارىسىنىڭ بەتبۇرىستى كەزەڭىن ايقىندادى. «جاڭا قازاقستان – بۇل قوعامدىق قۇندىلىقتاردى تەرەڭ بويلاۋ, قوعامداعى الەۋمەتتىك جانە باسقا دا ولقىلىقتاردى ەڭسەرۋ, بۇل ءبىزدىڭ بىرلىگىمىزدىڭ جاڭا ساپاسى, ەليتانىڭ مورالدىق كودەكسى, مەملەكەتتىك اپپاراتتىڭ جاڭارۋى, ءومىرىمىزدىڭ گۋمانيتارلىق ادامي ولشەمى جانە ادامي كاپيتالعا دەن قويۋ», دەپ اتاپ ءوتتى قحا توراعاسىنىڭ ورىنباسارى.
م.ءازىلحانوۆ «قازاقستان حالقىنا» قورىن اشۋدىڭ ماڭىزدىلىعىنا ەرەكشە نازار اۋداردى. «قازاقستان حالقى اسسامبلەياسى ءبىرىنشى كەزەكتە وسى قوردىڭ جۇمىسىنا جاردەمدەسۋى ءتيىس. ويتكەنى بۇل جاي عانا قايىرىمدىلىق ۇيىمى ەمەس – بۇل ءبىزدىڭ ورتاق الەۋمەتتىك جاۋاپكەرشىلىگىمىزدىڭ جالپىۇلتتىق ينستيتۋتى», دەدى سپيكەر.
وتىرىس بارىسىندا قاتىسۋشىلار الداعى اتقارىلاتىن جۇمىس بويىنشا ءوز ۇسىنىستارىمەن ءبولىسىپ, اسسامبلەيانىڭ بارلىق مۇشەسىن پرەزيدەنت بەلگىلەگەن جاڭا مىندەتتەردى قولداۋعا شاقىردى.
اتاپ ايتقاندا, قحا باستاماسىمەن بارلىق وڭىردە بىرقاتار ءىس-شارا ۇيىمداستىرۋ ۇسىنىلدى. ولاردىڭ قاتارىندا قيراعان عيماراتتار مەن نىسانداردى قالپىنا كەلتىرۋ بويىنشا ۆولونتەرلىك جانە قايىرىمدىلىق اكتسيالارى, مۇقتاج جاندارعا, اسىرەسە, زارداپ شەككەن اسكەري جانە پوليتسيا قىزمەتكەرلەرىنىڭ وتباسىلارىنا كومەك كورسەتۋ, «قازاقستان حالقىنا» قورى جۇمىسىنىڭ ماقساتتارى مەن مىندەتتەرىن ءتۇسىندىرۋ بويىنشا قحا مۇشەلەرىمەن جانە مەتسەناتتارمەن جينالىستار ۇيىمداستىرۋ جوسپارلانعان. توراعا ورىنباسارى قاڭتار ايىنىڭ باسىندا ينتەرنەتكە قوسىلۋ قيىندىق تۋدىرسا دا بىرقاتار ءتۇسىندىرۋ جۇمىسى جۇرگىزىلگەنىن مالىمدەدى.
وسى رەتتە, 2022 جىل بالالار جىلى بولىپ جاريالانعانىن ەسكەرە وتىرىپ, قحا-نىڭ جەكەلەگەن جوبالارى كوزدەلگەن ماقساتتارعا سايكەس قايتا قارالاتىندىعى ايتىلدى, ولاردى ىسكە اسىرۋمەن رەسپۋبليكا ايماقتارىندا انالار كەڭەسى جانە قحا قۇرىلىمدارىمەن بىرلەسىپ اينالىسادى.
