باس پروكۋراتۋرا جاپپاي تارتىپسىزدىكتەردىڭ تولىق حرونولوگياسىن جاريالادى

سەرىك شالاباەۆتىڭ ايتۋىنشا، سۇيىتىلعان گاز باعاسىنىڭ كۇرت وسۋىنە بايلانىستى نارازىلىق ماڭعىستاۋ وبلىسىندا 2022 جىلدىڭ العاشقى كۇنىندە باستالعان.

ء«بىرىنشى قاڭتاردا ماڭعىستاۋ وبلىسىنىڭ جاڭاوزەن قالاسىندا ساعات 17.20-دا قالا اكىمدىگىنىڭ جانىندا قالا تۇرعىندارى جينالدى. سۇيىتىلعان گاز باعاسىن تومەندەتۋ تالابىمەن ەل باسشىلىعىنىڭ اتىنا بەينەوتىنىش جازعان سوڭ سول كۇنى ساعات 18:00-دە ادامدار تارادى. قۇقىق قورعاۋ ورگاندارى قارۋ قولدانعان جوق. ەكىنشى قاڭتاردا ماڭعىستاۋ وبلىسىندا ساعات 11.00-دەن باستاپ اكىمدىكتەرگە اۆتوپاركتەرگە، مەشىتكە جاقىن جەردە سۇيىتىلعان گاز باعاسىن تومەندەتۋ تالابىمەن وبلىس تۇرعىندارىنىڭ سانكتسياسىز جيىندارى بايقالدى. كۇن ىشىندە نارازىلىق بىلدىرۋشىلەر شامامەن بىرنەشە ءجۇز ادامدى قۇرادى. جاڭاوزەن قالاسىندا اكتسيالارعا قاتىسۋشىلار ىشكى اۆتوجولداردى جاپتى. قۇقىق قورعاۋ ورگاندارى قارۋ قولدانعان جوق»، دەدى ول. ايتۋىنشا، ءۇشىنشى قاڭتاردا ماڭعىستاۋ وبلىسىنىڭ تۇرعىندارىن قولداۋ ماقساتىندا ەلىمىزدىڭ باسقا 7 وڭىرىندە بەيبىت ميتينگىلەر باستالعان.

ء«تورتىنشى قاڭتاردا ميتينگىلەر جالعاسىپ، ادامداردىڭ سانكتسياسىز جاپپاي جينالىستارى بايقالعان وڭىرلەر سانى 11-گە دەيىن ءوستى. قاتىسۋشىلار سانى 38 مىڭعا دەيىن كۇرت ءوستى. الماتى جانە شىمكەنت قالالارىندا قارۋلى شابۋىلدار، ورتەۋ سونىڭ ىشىندە قىزمەتتىك اۆتوكولىكتەردى ورتەۋ باستالدى. الماتى قالاسىندا «الماتى ارەنا» سپورت كەشەنىنىڭ جانىندا جينالعان 5 مىڭعا جۋىق ادام قالا اكىمدىگىنىڭ عيماراتىنا بارىپ، پوليتسيا قىزمەتكەرلەرىمەن قاقتىعىسقا ءتۇستى»، دەيدى باس پروكۋراتۋرا وكىلى.

باس پروكۋراتۋرا قىلمىستىق قۋدالاۋ قىزمەتىنىڭ باستىعى وسىنىڭ سالدارىنان 6 پوليتسيا اۆتوكولىگى ورتەنىپ، ۇلتتىق ۇلاننىڭ 5 اسكەري قىزمەتشىسى جانە 15 پوليتسيا قىزمەتكەرى جاراقات العانىن ايتادى.

«شىمكەنت قالاسىندا 21 اۆتوكولىك زاقىمدالدى. وسى كۇننەن باستاپ قىزمەتكەرلەر مەن اكىمشىلىك عيمارتتارعا شابۋىلداردى قايتارۋ ماقساتىندا قۇقىق قورعاۋ ورگاندارى ادام ومىرىنە قاۋىپ كەلتىرمەيتىن ارنايى قۇرالداردى پايدالانا باستادى. بەسىنشى قاڭتاردا ويران سالۋ مەن عيماراتتاردى باسىپ الۋ 11 ايماقتا جالعاستى. ولارعا قاتىسۋشىلار سانى 50 مىڭعا جەتتى. ءتورتىنشى قاڭتاردان بەسىنشى قاڭتارعا قاراعان ءتۇنى تەرروريستەر الماتى قالاسى اكىمدىگىنىڭ عيماراتى مەن الماتى حالىقارالىق اۋەجايىن باسىپ الدى. سونداي-اق، بانديتتەر ءورت ءسوندىرۋ ءبولىمىن، الماتى قالالىق پوليتسيا دەپارتامەنتىن، اۋەزوۆ جانە جەتىسۋ اۋداندىق پوليتسيا باسقارمالارىن باسىپ الۋعا ارەكەت جاسادى، 7 قارۋ-جاراق دۇكەنىنە باسىپ كىردى. ۇلتتىق قاۋىپسىزدىك كوميتەتى شەكارا قىزمەتىنىڭ 2 «كاماز» اۆتوكولىگىنە پوليتسيا دەپارتامەنتىنىڭ 2 قىزمەتتىك اۆتوكولىگىنە، قالا اكىمدىگىنىڭ «Nur Otan» پارتياسىنىڭ عيماراتتارىنا، 4 ساۋدا ورتالىعىنا، بانك بولىمشەلەرىنە ءورت قويىلدى. الماتىداعى قارۋلى شابۋىلدارعا قاتىسۋشىلار سانى 20 مىڭنان استى»،  دەدى سەرىك شالاباەۆ.

ونىڭ سوزىنشە، قىزىلوردا قالاسىندا شابۋىلشىلار 9 اۆتوكولىكتى ورتەدى، 1 جاۋىنگەردى كولىكپەن قاعىپ ولتىرگەن.

«اسكەري قىزمەتشىلەردەن بەلگىسىز ادامدار توبى اۆتومات پەن ەكى تاپانشانى تارتىپ الدى. تالدىقورعان قالاسىندا شابۋىلشىلار اكىمدىك، پوليتسيا جانە ۇلتتىق قاۋىپسىزدىك كوميتەتى دەپارتامەنتىنىڭ عيماراتتارىن باسىپ الدى. قالادا قارۋلى توپتار ءجۇردى. سونداي-اق، كۇش قولدانۋ ارقىلى اقتوبە، اتىراۋ، قىزىلوردا، ماڭعىستاۋ جانە جامبىل وبلىستارىندا وبلىستىق اكىمدىكتەرىنىڭ عيماراتتارى باسىپ الىندى. ازاماتتاردىڭ قاۋىپسىزدىگىنە تونگەن قاۋىپ-قاتەرگە بايلانىستى پرەزيدەنتتىڭ جارلىقتارىمەن ەلدىڭ ءار ايماعىندا توتەنشە جاعدايلار ەنگىزىلىپ، كوممەندانتتىق ساعات بەلگىلەندى. تەرروريستەردىڭ ارەكەتتەرىن ۇيلەستىرۋدى جوققا شىعارۋ جانە ولاردىڭ بايلانىس قۇرالدارىن پايدالانۋىنا جول بەرمەۋ ماقساتىندا ينتەرنەتتى پايدالانۋ شەكتەلدى»،  دەدى باس پروكۋراتۋرا قىلمىستىق قۋدالاۋ قىزمەتىنىڭ باستىعى.

سونداي-اق، ول قارۋلى توپتارعا قارسى قۇقىق قورعاۋشىلار مەن اسكەريلەر تاراپىنان قاشان وق اتىلا باستاعانىن ناقتىلادى.

«التىنشى قاڭتاردا قاۋىپسىزدىك كەڭەسىنىڭ شەشىمىمەن ەلىمىزدە انتيتەرروريستىك وپەراتسيانى وتكىزۋ جاريالاندى. ونىڭ نەگىزگى ماقساتى – ۇلتتىق قاۋىپسىزدىككە تونەتىن قاتەرلەردى جويۋ جانە ازاماتتاردىڭ ءومىرى مەن مۇلكىن قورعاۋ بولىپ تابىلادى. تەك وسى كۇننەن باستاپ قۇقىق قورعاۋ ورگاندارى مەن قارۋلى كۇشتەر تەرروريستەردى جويۋ ءۇشىن قارۋ قولدانا باستادى. الماتىدا «كوكتوبە» تەلەمۇناراسى مەن ۇلتتىق قاۋىپسىزدىك كوميتەتى شەكارا قىزمەتىنىڭ اكادەمياسىن تەرروريستەردىڭ باسىپ الۋىنا جول بەرىلمەدى. ۇجىمدىق قاۋىپسىزدىك كەڭەسىنىڭ شەشىمىمەن بىتىمگەرلىك وپەراتسيا جۇرگىزۋ ءۇشىن قازاقستانعا ۇقشۇ كۇشتەرىنىڭ كونتينگەنتتەرى جىبەرىلدى»، دەدى باس پروكۋراتۋرا وكىلى.

ايتۋىنشا، 7 قاڭتاردا بەيبىت نارازىلىق شارالارى ماڭعىستاۋ، اتىراۋ، اقتوبە، قاراعاندى جانە شىعىس قازاقستان وبلىستارىندا جالعاسقان.

ال 8 قاڭتاردا جاعداي بىرتىندەپ تۇراقتانىپ، ازاماتتاردىڭ رۇقساتسىز جينالۋى توقتاتىلعان.