اتىراۋ قالاسىنداعى 5546 اسكەري ءبولىمىنىڭ جاۋىنگەرلەرى قالا اكىمدىگىن بۇزاقىلاردان قورعادى. قاقتىعىس بارىسىندا اتالعان اسكەري ءبولىمنىڭ 28 جاۋىنگەرى جاراقات العان. سولاردىڭ ءبىرى - قاتارداعى دياس سامات. ول جاپپاي تارتىپسىزدىك باستالعان كۇنى قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا قىزمەت اتقارىپ, الدىڭعى قاتاردا تۇردى.
«باستاپقىدا بارلىعى بەيبىت شەرۋ رەتىندە باستالدى. بىزگە كۇش قولدانباۋ تۋرالى بۇيرىق بەردى. ويتكەنى, ونداعى ادامدار بەيبىت تۇرعىندار. ءبىز قوعامدىق ءتارتىپتى قامتاماسىز ەتۋ بويىنشا قىزمەتتى قامتاماسىز ەتىپ ساپتا تۇردىق. ءبىر كەزدە توپ ىشىنەن جاس جىگىتتەر شىعىپ, بىزگە شابۋىل جاسادى. قولدارىنا تۇسكەن زاتتىڭ بارلىعىن لاقتىردى, ارماتۋرا, تاس, ىشىندە گاز باللوندارى دا بولدى. مەن ارتتاعى قارۋلاس دوستارىمدى قورعاپ تۇرعانمىن. قورعانىش قالقانى تومەن تۇسىرگەن ساتتە اۋىر زات ۇشىپ كەلىپ وڭ بەتىمە ءتيدى. بارلىعى ءبىر-ءبىرىن يتەرىپ, قاقتىعىس, توبەلەس باستالدى. مەنىڭ وڭ بەتىم تولىقتاي قانادى. سوندا دا, دوستارىمدى تاستامادىم. كۇشىم جەتكەنشە, قىزمەتىمدى اتقاردىم», دەپ ەسىنە ءتۇسىردى جاس سارباز.
جاس سارباز باتىس قازاقستان وبلىسى جانىبەك اۋدانىنان ۇلتتىق ۇلان قاتارىنا شاقىرىلعان. بۇگىندە اۋرۋحاناعا جاتقىزىلدى. جاعدايى قالىپتى. جۋىردا ەمدەلگەننەن كەيىن اسكەري قىزمەتىنە قايتا ورالادى. بار تىلەگى ەل اماندىعى, تىنىشتىق ورناتۋ مىندەتى.
جالپى الماتى, شىمكەنت قالالارىندا جانە باسقا دا وبلىس ورتالىقتارىندا قۇقىقتىق ءتارىتىپتى قامتاماسىز ەتۋدە بۇزاقى توپپەن قارسىلاسۋدىڭ ناتيجەسىندە جاراقات العان ۇلتتىق ۇلان اسكەري قىزمەتشىلەردىڭ سانى 394 ادامعا جەتتى.
بۇدان بولەك, جاپپاي تارتىپسىزدىك كەزىندە ۇلتتىق ۇلاننىڭ 90-نان اسا اسكەري تەحنيكاسى سىندى.
