ەجەلدەن اۋىلى ارالاس, قويى قورالاس جاتقان, الاتاۋدىڭ كۇنگەيى مەن تەرىسكەيىن قونىس ەتكەن قوس حالىقتىڭ تاريحي تامىرلاستىعى, باۋىرلاستىعى عاسىرلار بويى اجىراعان ەمەس.
تاريحتى الىپ قاراساق, جىر الىبى جامبىل مەن قىرعىز اقىنى توقتاعۇلدىڭ ارادان قىل وتپەس دوستىعى دا بۇگىنگى ۇرپاق ءۇشىن وشپەس ۇلگى مەن ونەگە. قازاقستاندا ورىن العان قارالى قاڭتاردىڭ قاسىرەتى قىرعىز اعايىننىڭ دا جانىنا باتتى. بايىرعىدان كەلە جاتقان باۋىرلارىمىز الەۋمەتتىك جەلىلەر ارقىلى قازاق باۋىرلارىنا كوڭىلقوس ايتىپ, جىر ارقىلى جۇباتۋدا.
يۋتۋب جەلىسىندە العاشقىلاردىڭ ءبىرى بولىپ ءۇن قاتقان نارىنبەك كالىباەۆ ەكى ەلدىڭ باۋىرلاستىعىن انمەن كەستەلەپتى.
«قالپاقتىڭ اق-قاراسىنداي,
قازاقتىڭ كەڭ دالاسىنداي,
قىرعىز-قازاق ءبىر تۋعان ەل,
ءبىر اتانىڭ بالاسىنداي (ەكى رەت).
قومىز مەنەن دومبىراسى,
شاڭعا تولعان تاۋ اراسى,
ىرداپ بارسام باۋىرىما,
توسىپ الار كەڭ دالاسى.
ات جالىندا ويناپ وسكەن,
اتا-بابام بولعان كوشپەن,
جامبىل مەنەن توقتوعۇلداي,
قانشالاعان اسىل وتكەن», دەگەن ءان ارقىلى قازاق دالاسىنا سالەم جولداپتى.
الەۋمەتتىك جەلىدە تاراعان تاعى ءبىر بەينەجازبادا:
«قاناتىنداي ءبىر قۇستىڭ,
قازاق-قىرعىز ەلدەرى,
ءبىر قاناتى سىنسا ەگەر,
ۇشا الماس قۇسىم جەردەگى.
تەربەلىپ تۇرسىن تىنىشتىقتا,
تامىرلاس قازاق ەل-جەرى.
قازاق بوبەك جىلاسا,
قىرعىز ەنەنىڭ سىزدايدى ەمشەگى.
جان بىرگە جاقىن قازاعىم,
جاماننىڭ تارتتىڭ ازابىن.
تۋعالى قيماس قازاعىم,
تۇرمىستىڭ تارتتىڭ ازابىن.
دۇربەلەڭ ءتۇسىپ زاماتتا,
دۇنيەنىڭ بۇردىڭ نازارىن.
وزەگىم كۇيدى, شوق بولدى,
ورتەنگەن كەزدە بازارىڭ,
قانتوگۋ بولىپ كۇتۋسىز,
قانشالار تاپتى اجالىن», دەگەن جولدار ارقىلى قىرعىز باۋىرلار ءبىزدىڭ ەلدەگى جاعدايعا نازار اۋدارىپ, كوڭىلدەرىن بىلدىرگەن.
