رەسەي فەدەراتسياسى ۇكىمەتىنىڭ توراعاسى م.ميشۋستين ءا.سمايىلوۆتى قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىندالۋىمەن قۇتتىقتادى.
تاراپتار ستراتەگيالىق ارىپتەستىكتى ەكىجاقتى جانە كوپجاقتى فورماتتا ودان ءارى نىعايتۋعا ءازىر ەكەندىكتەرىن ءبىلدىردى.
«قازاقستان ۇكىمەتى رەسەي فەدەراتسياسىمەن ستراتەگيالىق سەرىكتەستىكتى تەرەڭدەتۋ باعىتىن بەرىك ۇستانادى. سىزبەن بىرگە ەكىجاقتى كۇن ءتارتىبىنىڭ بارلىق سالاسى بويىنشا قازاقستان-رەسەي قارىم-قاتىناسىنا ءتان مازمۇندى جانە تۇراقتى ديالوگتى ءارى قاراي جالعاستىرا بەرەمىز دەپ ۇمىتتەنەمىن. ءبىز بۇعان دەيىن قول جەتكىزىلگەن ۋاعدالاستىقتاردى جۇزەگە اسىرۋعا بارىنشا دايىنبىز», دەدى ءا.سمايىلوۆ.
ەۋرازيالىق ەكونوميكالىق وداق اياسىنداعى ەكىجاقتى ساۋدا-ەكونوميكالىق ىنتىماقتاستىق جانە ءوزارا ءىس-قيمىل ماسەلەلەرى تالقىلاندى.
رەسەي – قازاقستاننىڭ نەگىزگى ساۋدا-ەكونوميكالىق سەرىكتەسى. وتكەن جىلدىڭ 10 ايىنىڭ قورىتىندىسى بويىنشا قر مەن رف اراسىنداعى تاۋار اينالىمىنىڭ كولەمى 30%-عا ارتىپ, 19,5 ملرد دوللارعا جەتتى. بۇل رەتتە ساۋدا قۇرىلىمىن ءارتاراپتاندىرۋدا ىلگەرىلەۋشىلىك بايقالىپ وتىر. قازاقستاننىڭ ەكسپورت كولەمى 39,4%-عا, ونىڭ ىشىندە وڭدەلگەن ءونىم ەكسپورتى 47,7%-عا ءوستى. 2019 جىلعى پاندەمياعا دەيىنگى كەزەڭمەن سالىستىرعاندا ساۋدا كولەمى دە 21%-دان استامعا ارتتى.
