سانسىز سۇراققا باس قاتىرىپ, جاۋاپ تاپپاي قينالعان ساتتە وتكەن تاريحتى پاراقتاپ, كىتاپ اقتارىپ, بولماسا اعا بۋىننىڭ ايتقانىنان جاۋاپ ىزدەيتىن داعدىمىز بار. ەلىمىزگە, الەمگە تانىمال تۇلعالاردىڭ بۇقارالىق اقپارات قۇرالدارىنا بەرگەن سۇحباتتارىنان الىنعان دايەكسوزدەرگە قايتا كوز جىبەرىپ, جانىمىزدى جارالاعان ساۋالدارعا جاۋاپ تاپقانداي بولدىق...
«بىلەسىڭ بە, سوڭعى كۇندەرى وتانىما ورالۋ ماعان وتە اۋىر تيەتىن بولىپ ءجۇر. ۇيات سەكىلدى. انا جاقتا, ەۋروپادا باسقا ءومىر, ال بىزدە باسقاشا ءومىر. ادامدارعا وبال-اق, ال ولار ەۋروپالىقتاردان دا الدەقايدا جاقسى ومىرگە لايىقتى عوي», دەيدى ادامزاتتىڭ ايتماتوۆى. شوڭ قايراتكەردىڭ ەۋروپادا قىزمەت ەتىپ, ءومىر سۇرگەنىمەن, بولمىس-ءبىتىمى وتانىمەن, ەلىمەن بىتە قايناسىپ جاتقانى عوي. جازۋشى ەلىنىڭ ەۋروپالىقتاردان دا جاقسى ءومىر سۇرۋگە لايىقتى ەكەنىن ويلاپ, ەرەكشە كۇيىنەدى. بىراق ۇلتىنىڭ ۇياتىنا اينالعان ايتماتوۆتىڭ ءوزى تۋعان حالقىنىڭ جاقسى ءومىر سۇرۋىنە قولۇشىن سوزا الماي قينالادى, ۇياتتان ورتەنەدى. قانداي شاراسىزدىق؟!
شىڭعىس ايتماتوۆتىڭ قالاي بولعاندا دا ەلىنىڭ تۇرمىس-تىرشىلىگىنە الاڭداپ, ولاردىڭ تاعدىرىنا جانى كۇيزەلەتىن ناعىز حالىق جازۋشىسى ەكەنى وسىدان-اق ايقىن كورىنەدى. زادىندا, مۇنداي قاسيەت كەز كەلگەن ۇلت زيالىسىنا ءتان بولۋى ءتيىس. حالقىنىڭ بولمىس-ءبىتىمىن, تۇرمىس-تىرشىلىگىن, رۋحاني الەۋەتىن ۇلت زيالىلارىنان ارتىق كىم بىلەدى, كىم باعالاي الادى دەيسىز. گرۋزيننىڭ اتاقتى اكتەرى ۆاحتانگ كيكابيدزەنىڭ ايتقانىنا دا ريزاشىلىقپەن قۇلاق قوياتىنىمىز دا سول. «ەرتەڭ ءۇرىم-بۇتاعىڭ سەنىڭ ەسىمىڭدى الىپ جۇرۋدەن, سەنىڭ اۋلەتىڭنەن ەكەنىن ايتۋدان ۇيالمايتىنداي ءومىر ءسۇرۋ كەرەك», دەيدى اكتەر. كەز كەلگەن پەندە كيكابيدزە ايتقان ۇعىم شەڭبەرىندە تىرشىلىك كەشىپ, اۋلەتىنىڭ ۇياتىن ويلاسا, ۇلتىنىڭ اتىنا دا ۇيات كەلتىرمەس ەدى-اۋ. ۇياتتى ويلاعاندار بيلىكتىڭ قولجاۋلىعىنا اينالىپ, حالقىنا قيانات جاساماق تۇگىلى, ەلىنىڭ نامىسى ءۇشىن كيكابيدزە سياقتى وزىنە بەرگەن جوعارى ماراپاتتان (رەسەيدىڭ) دا باس تارتا الادى.
زادىندا, حالىق ءوز قاھارماندارىن ارداقتاي دا بىلەدى, تورگە دە شىعارادى, توبەسىنە دە كوتەرەدى. كەرەك دەسەڭىز, كوزى تىرىسىندە قولادان ءمۇسىنىن قۇيىپ, ەسكەرتكىش تە تۇرعىزادى. ەلىنىڭ داڭقىن اسىرىپ, جەكە جەتىستىگى ارقىلى ءتول مەملەكەتىن وزىق ەلدەر قاتارىنا قوسقان جاندارعا ەسكەرتكىش ورناتۋ – ەلدىڭ دە, ەردىڭ دە ابىرويى! ايتسە دە, الەمگە ايگىلى ۋكراينالىق جەڭىل اتلەت سەرگەي بۋبكا وزىنە وسىلايشا ەرەكشە كورسەتىلگەن قۇرمەتتەن ىڭعايسىزداناتىن, ۇيالاتىن ءتارىزدى. «دونەتسكىدە ماعان ەسكەرتكىش ورناتايىن دەپ جاتقانىنان حاباردار بولدىم, ءارى ونى قۇپتاي قويمادىم. دونەتسكىنىڭ قالالىق كەڭەسى شەشىم قابىلداعاننان كەيىن, امالسىز كوندىم. ال وزىمشە بۇل ەسكەرتكىش سەرگەي بۋبكا دەگەن ادامعا ەمەس, سپورتشى سەرگەي بۋبكاعا قويىلعان ەسكەرتكىش دەپ قابىلدادىم. سول سەبەپتى ەسكەرتكىشتىڭ جانىنان وتكەن سايىن مەن وعان: «سالەم» دەپ ايتامىن», دەيدى سپورتشى.
« ۇلىق بولساڭ, كىشىك بول» دەمەكشى, ەلىن تورتكۇل دۇنيەگە تانىتقان بۋبكانىڭ قاراپايىمدىلىعى ونىڭ ابىرويىن بۇرىنعىدان دا اسقاقتاتا تۇسەرى انىق. ەلىنە ناعىز ەڭبەگى سىڭگەن تۇلعاعا, ۇلتىنىڭ ۇياتىنا اينالعان ازاماتقا كوزى تىرىسىندە قانشا ەسكەرتكىش قويسا دا جاراسادى ەمەس پە!
...ەسكەرتكىشتى بەيبىت كۇننىڭ باتىرلارىنا كوزى تىرىسىندە قويعانعا نە جەتسىن؟! ال ءبىز كوپ جاعدايدا ەلدىكتى قورعاۋ جولىندا ەرەن ەرلىك كورسەتكەن ەرلەردى قازا بولعاننان كەيىن عانا ۇلىقتايمىز. سوڭعى وتىز جىل ىشىندە توتەنشە اپاتتان, جارىلىستان كوز جۇمعانى بار, لاڭكەستەر قولىنان قازا تاپقانى بار – قانشاما باتىرىمىزدان ايىرىلدىق دەسەڭشى. قۇداي-اۋ, ءۇش ونجىلدىق ىشىندە ەلىمىزدە قانشا مارتە ازا تۇتۋ كۇنى جاريالاندى؟ ازا تۇتۋ كۇنى دەمەكشى, ەلدىڭ ازا تۇتۋىنا بايلانىستى رەسەيدىڭ حالىق ءارتىسى ناتاليا سەلەزنەۆانىڭ ءبىر كەزدە ايتقانى كۇنى كەشە جادىمىزدا قايتا جاڭعىرعان ەدى. «قايعى-قاسىرەتتەن ابدەن شارشادىق. «ماڭگىلىك جادىمىزدا ساقتالادى» دەگەن ءسوز تىپتەن قاجىتتى. كىمدەرگە ارنالعان؟ جاستارعا...» دەگەن-ءدى اكتريسا قازان قالاسىنداعى سۋعا باتقان كەمەدە قازا بولعانداردى ازا تۇتۋ كۇنىندە...
P.S. ۇلت زيالىلارىنىڭ بويىندا ۇيات اتاۋلى مەنمۇندالاپ تۇرسا, ازا تۇتاتىن كۇندەر دە ازايار ەدى-اۋ. ال ازىرگە ازا تۇتۋدىڭ ازابىن تارتىپ-اق جاتىرمىز...
