«شىمكەنت قالاسىندا ورىن العان جاعدايعا بايلانىستى تارتىپسىزدىكتەردىڭ الدىن الۋ جانە قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا پوليتسيا قىزمەتكەرلەرى كۇشەيتىلگەن رەجيمدە تاۋلىك بويى جۇمىس ىستەيدى. سونىمەن قاتار, ۇلتتىق ۇلان مەن قورعانىس مينيسترلىگىنىڭ ساربازدارى, توتەنشە جاعدايلار دەپارتامەنتىنىڭ قىزمەتكەرلەرى جۇمىلدىرىلدى. ولارعا مىڭعا جۋىق قالا تۇرعىنى كومەككە كەلدى. وسى كەزەڭدە قولداۋ كورسەتكەن ازاماتتارعا زور العىسىمدى بىلدىرەمىن», - دەلىنگەن شىمكەنت قالالىق پوليتسيا دەپارتامەنتى باسشىسىنىڭ مالىمدەمەسىندە.
ۆەدومستۆونىڭ مالىمەتىنشە, قىزمەت اتقارۋ بارىسىندا 45 قىزمەتكەر ءتۇرلى دەنە جاراقاتىن العان. ونىڭ ىشىندە اۋىر جاراقاتى بار ەكى قىزمەتكەر اۋرۋحانانىڭ جانساقتاۋ بولىمىندە بولدى جانە قازىر ارنايى باقىلاۋ پالاتالارىنا اۋىستىرىلدى.
«العان جاراقاتتارىنا قاراماستان, بۇل قىزمەتكەرلەردىڭ بارلىعى ءوز ەركىمەن تۇرعىنداردىڭ تىنىشتىعىن قامتاماسىز ەتۋ ءۇشىن قىزمەتىنە قايتا كىرىستى. جارالانعان پوليتسيا قىزمەتكەرلەرىنە قىزمەت ورنىندا مەديتسينالىق كومەك كورسەتىلەدى. قازىرگى ۋاقىتتا شىمكەنت قالاسىندا جاعداي تۇراقتى. قالا اۋماعى تولىعىمەن قۇقىق قورعاۋ ورگاندارى قىزمەتكەرلەرىنىڭ باقىلاۋىندا, قۇقىق بۇزۋشىلىقتارعا جول بەرمەۋ بويىنشا ءىس-شارالار جۇرگىزىلۋدە. قالا تۇرعىندارىن كومەندانتتىق ساعات تالاپتارىن قاتاڭ ساقتاۋعا شاقىرامىن», - دەدى ەرالى جۇماحانبەتوۆ.
