توتەنشە جاعداي دەپارتامەنتى مەن پوليتسيا قىزمەتكەرلەرى الەكساندروۆ اۋىلدىق وكرۋگىنىڭ ماڭايىندا جەدەل ىزدەستىرۋ-قۇتقارۋ شارالارىن باستاپ, ارتىنشا وعان ەرىكتىلەر جاساعى قوسىلدى.
قوستاناي اۋدانى اكىمدىگىنىڭ مالىمەتىنشە, جوعالعان ءجاسوسپىرىمدى ىزدەستىرۋگە توتەنشە جاعداي قىزمەتىنىڭ بىرنەشە ارنايى تەحنيكاسى, ءىز كەسۋشى يت ەرتكەن ءتورت كينولوگ مامان, قار شاناعا مىنگەن ەرىكتىلەر – بارلىعى 110 ادام, 26 تەحنيكا قاتىسقان.
ىزدەۋ شارالارى توعىز ساعاتقا سوزىلدى. ابىروي بولعاندا, ءجاسوسپىرىم قارلى بوراندا جاياۋلاتىپ وتىرىپ اۋىلدان 50 شاقىرىم قاشىقتا جاتقان شەمينوۆ ەلدى مەكەنىنىڭ ۇستىنەن تۇسكەن.
– بوران كۇشەيىپ كەتكەندىكتەن قايتار جولدى تابا الماي قالدىم, اداسىپ ءجۇرىپ 23:30-دا شەمينوۆ اۋىلىنا كىردىم. ءبىرىنشى تۇرعان ۇيگە كىرىپ, سول ۇيدە جىلىنىپ, جان شاقىردىم, – دەدى ك.دۋكارت.
ءجاسوسپىرىم وسى ۇيدەن اناسىنا قوڭىراۋ شالىپ, امان-ەسەن ەكەنىن حابارلاعان. ودان كەيىن كەلگەن ەرىكتىلەر جاساعى كيريلدى ۇيىنە دەيىن جەتكىزىپ, اتا-اناسىنىڭ قولىنا تابىس ەتكەن. سول كۇنى كەزەكشىلىك ەتكەن مەديتسينا قىزمەتكەرلەرىنىڭ سوزىنشە, ءجاسوسپىرىمنىڭ قول-اياعىن ۇسىك شالماعان.
قوستاناي وبلىسى
