قر پارلامەنت ءماجىلىسىنىڭ دەپۋتاتتارى ەدىل جاڭبىرشين مەن سامات مۇساباەۆ باستاعان ءبىر توپ ازاماتتىڭ ۆيدەوسى جاريالاندى. ۆيدەوداعى مالىمەت بويىنشا, ماڭعىستاۋ وڭىرىنەن شىققان ءبىر توپ ازامات سۇيىتىلعان مۇناي گازىنىڭ باعاسىن رەتتەۋ ءۇشىن قۇرىلعان ۇكىمەت كوميسسياسىمەن بىرگە جۇمىس ىستەپ, ەلدىڭ تالابىن جەتكىزۋگە اتسالىسپاقشى.
«قادىرلى ماڭعىستاۋلىقتار, سۇيىتىلعان مۇناي گاز باعاسىنىڭ ماڭعىستاۋدا كۇرت وسۋىنە بايلانىستى حالىق نارازىلىعىن بىلدىرۋدە. ەل ءوزىنىڭ ءۋاجىن بيلىككە جەتكىزىپ, تالاپتارىنىڭ ورىندالۋىن سۇراۋدا. بۇل - دۇرىس دەپ ەسەپتەيمىز. وسى ماسەلەگە بايلانىستى ماڭعىستاۋدىڭ بىرنەشە ازاماتى قوعامدىق شتاب ۇيىمداستىردى. شتاب مۇشەلەرى وسى اۋىلدىڭ وزدەرىڭىز تانيتىن جىگىتتەرىنەن قۇرالىپ وتىر. الەۋمەتتىك جەلىدەن جانە تىكەلەي تەلەفوندارىمىزعا ماڭعىستاۋدىڭ ازاماتتارى شىعىپ, وسى ىسكە ارالاساۋىمىزدى سۇراۋدا. ەلدىڭ بىرلىگى, حالىقتىڭ تىنىشتىعى, ماڭعىستاۋدىڭ اماندىعى ءبارىمىزدىڭ ورتاق ابىرويىمىز, اعايىن. قوعامدىق شتابتىڭ نەگىزگى ماقساتى – ەلدىڭ تالابىن ۇكىمەت كوميسسياسىنا جەتكىزىپ, سۇيىتىلعان مۇناي گاز ماسەلەسىن شەشۋگە اتسالىسۋ. ءبىز وسىعان جۇمىستانامىز», دەدى ءماجىلىس دەپۋتاتى ەدىل جاڭبىرشين اتالمىش ۆيدەودا.
قوعامدىق شتابتاعى ازاماتتاردىڭ ناقتى ءتىزىمى مىناداي:
ەدىل جاڭبىرشين - قر پارلامەنت ءماجىلىسىنىڭ دەپۋتاتى,
سامات مۇساباەۆ - قر پارلامەنت ءماجىلىسىنىڭ دەپۋتاتى,
اببات ورىسباەۆ - ماڭعىستاۋ وبلىستىق ءماسليحاتىنىڭ دەپۋتاتى,
ايات سۇگىرباي - ماڭعىستاۋ وبلىستىق ءماسليحاتىنىڭ دەپۋتاتى,
ءۋايس ەرسايىن ۇلى - اقتاۋ قالالىق ءماسليحاتىنىڭ دەپۋتاتى,
ءانۋار بيماعامبەت - اقىن, جۋرناليست,
التاي الماس - جۋرناليست.
