پەتروپاۆل تۇرعىنى Instagram الەۋمەتتىك جەلىسىندە ينۆەستيتسيا ارقىلى وڭاي تابىس تابۋعا قاتىستى اقپاراتتى كورىپ, ۇسىنىلعان سىلتەمە بويىنشا سايتقا تىركەلگەن. كوپ كەشىكپەي بروكەرلىك سايتتىڭ وكىلدەرىمىز دەگەن تۇلعالار WhatsApp مەسسەندجەرى ارقىلى بايلانىسقا شىعادى.
الاياقتاردىڭ نۇسقاۋلارى بويىنشا ەر ادام 65 مىڭ تەڭگەسىن ولار ايتقان ەسەپشوتقا اۋدارادى. ءبىرازدان سوڭ سايتتاعى جەكە كابينەتىنە تابىسىنىڭ ەسەلەنگەنى جونىندە اقپارات كەلەدى. جەڭىل اقشاعا قىزىققان تۇرعىن ەكى بانكتەن ميلليون تەڭگەدەن نەسيە, تانىسىنان 850 مىڭ تەڭگە قارىز الىپ, بارلىق قارجىسىن «ينۆەستيتسياعا سالادى». وسىدان كەيىن «مەنەدجەرلەر» بايلانىسقا شىقپاي قويادى. ەر ادام سايتتاعى شوتتان قاراجاتىن قايتارا الماي وتىر. 3 ملن تەڭگەگە جۋىق اقشاعا الاياقتارعا الدانعان ازامات پوليتسياعا جۇگىندى.
«وبلىستا جىل باسىنان «اقشاسىن كوبەيتۋگە» قاتىستى ينتەرنەت-الاياقتىقتىڭ 17 فاكتىسى تىركەلدى. كەيدە كۇماندى ينۆەستيتسيالاردان مول تابىس تابۋعا جابىرلەنۋشىلەردىڭ تانىستارى تارتادى, كەي جاعدايلاردا الاياقتار قاشىقتان اربايدى: بروكەرلىك سايتتاردىڭ مەكەنجايلارىنا ۇقساس كوشىرمە سايتتار قۇرىپ, ادامداردى الەۋمەتتىك جەلى ارقىلى تارتادى. قۋلىقتىڭ مۇنداي ءتۇرى بارلىق ەلدەردە كەزدەسەدى. الدانعانداردىڭ اۋدارعان اقشالارى كيبەرقىلمىسكەرلەردىڭ قالتالارىنا تۇسەدى. ينتەرنەتتە ساق بولۋعا, وڭاي ولجاعا سەنبەۋگە, كۇماندى سىلتەمەلەر بويىنشا وتپەۋگە كەڭەس بەرەمىز», دەپ حابارلايدى سقو پد كريمينالدىق پوليتسيا باسقارماسىنىڭ باستىعى مارات جۇماليەۆ.
