قورعانىس ءمينيسترىنىڭ ورىنباسارى دارىن تۇياقوۆتىڭ ايتۋىنشا, تۇزەتۋلەر ءۇش زاڭعا ەنگىزىلەدى. ولاردىڭ بىرىندە - «تۇرعىن ءۇي قاتىناستارى تۋرالى» - قىزمەتتىك تۇرعىن ۇيلەردى جەكەشەلەندىرۋ قۇقىعىنىڭ اۋىسۋى, اقشالاي وتەماقى الۋ جانە قايتىس بولعان ارنايى ورگاننىڭ قىزمەتكەرى مەن اسكەري قىزمەتشىنىڭ وتباسى مۇشەلەرىنە الماسۋ قۇقىعىن پايدالانۋ كوزدەلەدى. بۇدان باسقا, قىزمەتتىك تۇرعىن ۇيلەردى قالدىق قۇنى بويىنشا نەمەسە وتەۋسىز جەكەشەلەندىرۋگە بولادى.
سونداي-اق, قارۋلى كۇشتەر مەن باسقا دا اسكەري قۇرالىمدار ءۇشىن العاش رەت «مودۋلدىك تۇرعىن ءۇي» ۇعىمى ەنگىزىلەدى. بۇل تەز سالىناتىن ءپورتاتيۆتى ۇيلەر. ولاردى ساتىپ الۋ اسكەردى قىسقا مەرزىمدە تۇرۋعا ارنالعان ورىندارمەن قامتاماسىز ەتۋگە, ال گەوساياسي جاعداي وزگەرگەن كەزدە شىعىنسىز كوشىرۋگە مۇمكىندىك بەرەدى.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا كەلەسىدەي تۇزەتۋلەر ەنگىزىلەدى, ولار اسكەري قىزمەتشىلەردىڭ قۇقىقتارى مەن مىندەتتەرىن كەڭەيتەدى.
«زاڭ جوباسىندا اسكەري قىزمەتشىگە ارنايى مەملەكەتتىك ورگانداردىڭ قىزمەتكەرلەرىنە ۇقساس قۇقىقتار مەن مىندەتتەردى بەرۋ ۇسىنىلادى. ەگەر اسكەري قىزمەتشى قىزمەتتەن بوساتىلعان كۇننەن باستاپ ونى قايتادان قىزمەتكە قابىلداعان كۇنگە دەيىن ءۇش ايدان اسپاسا, ال وسى ۋاقىت ىشىندە ەڭبەك قاتىناستارى بولماسا, اسكەري قىزمەتتىڭ ۇزدىكسىزدىگى دە قۇجات بولىپ تانىلادى», دەپ ءتۇسىندىردى قورعانىس ءمينيسترىنىڭ ورىنباسارى دارىن تۇياقوۆ.
بۇدان باسقا, كەلىسىمشارت بويىنشا اسكەري قىزمەتشىلەردىڭ, اسكەري مىندەتتىلەر ابايسىزدا زيان كەلتىرگەن جاعدايدا اسكەرگە جانە اسكەري جيىندارعا شاقىرىلۋى كەزىندە ماتەريالدىق جاۋاپكەرشىلىگى بەلگىلەنەتىن بولادى. بۇل رەتتە اسكەري قىزمەتشىلەردىڭ قاساقانا نۇقسان كەلتىرىلگەن جاعدايدا تولىق ماتەريالدىق جاۋاپتىلىعى ساقتالادى.
