ۆاكتسينالانعان زەينەتكەرلەر اراسىندا ساناتوريگە جولدامالاردىڭ ۇتىس ويىنى نۇر-سۇلتان قالاسى اكىمدىگىنىڭ الەۋمەتتىك جەلىلەردەگى (Facebook, YouTube) رەسمي پاراقشالارىندا ەرتەڭ, 29 جەلتوقسان كۇنى ساعات 17.00-دە تىكەلەي ەفيردە وتەدى. ەكپە العان زەينەتكەرلەر اراسىندا سارىاعاش (تۇركىستان وبلىسى), وقجەتپەس (اقمولا وبلىسى), مويىلدى (پاۆلودار وبلىسى) شيپاجايلارىنا تەگىن جولدامالار ويناتىلادى.
ۇتىس ويىنىنا 28 قازان مەن 28 جەلتوقسان ارالىعىندا ەلوردانىڭ كەز كەلگەن ۆاكتسيناتسيا پۋنكتىندە ۆاكتسينانىڭ ءبىرىنشى كومپونەنتىن العان زەينەتكەرلەر قاتىسا الادى.
بايقاۋ ادەتتەگىدەي اۆتوماتتى رەجيمدە وتكىزىلەدى. ازاماتتارعا قۇجاتتاردى تولتىرۋدىڭ جانە تىركەۋدەن ءوتۋدىڭ قاجەتى جوق.
ەستەرىڭىزگە سالا كەتەيىك, نۇر-سۇلتاندا كوروناۆيرۋسقا قارسى ۆاكتسيناتسيالانعانداردىڭ اراسىندا مالديۆكە ەكى ادامعا جولداما جانە باسقا دا باعالى سىيلىقتار ويناتىلادى.
Birge پلاتفورماسىندا ۇتىس ويىنىنىڭ جەڭىمپازدارىن انىقتاۋ ءۇشىن ارنايى راندومايزەر سەرۆيسى ورناتىلعان, ول جۇلدە يەلەرىن ۆاكتسيناتسيالانعانداردىڭ ID گەنەراتسياسى ارقىلى تاڭدايدى. ونى ازىرلەۋگە IT-قاۋىمداستىق تا قاتىستى. ۆاكتسينالانعاندار بويىنشا سەرۆيس قر دەنساۋلىق ساقتاۋ مينيسترلىگىنىڭ اقپاراتتىق جۇيەسىمەن بىرىكتىرىلگەن.
باعالى سىيلىقتاردىڭ ۇتىس ويىندارى ازاماتتاردى ۆاكتسيناتسيالاۋعا ىنتالاندىرۋ ماقساتىندا وتكىزىلەدى. تەك ۆاكتسيناتسيا ءسىزدىڭ جانە جاقىندارىڭىز بەن اينالاڭىزداعى ادامداردىڭ دەنساۋلىعىن قورعاۋعا مۇمكىندىك بەرەدى.
ويتكەنى, باستى ماقسات - ۇجىمدىق يممۋنيتەتتى دامىتۋ جانە بۇرىنعى كارانتينگە دەيىنگى رەجيمگە ورالۋ.
