پلاستيكالىق جانە اليۋميني بوتەلكەلەردى وڭدەۋگە قابىلدايتىن العاشقى اۆتومات ارشالى اۋدانى جىبەك جولى كەنتىنىڭ «الان» ساۋدا ۇيىنە ورناتىلدى.
بۇل تۋرالى جىبەك جولى اۋىلدىق وكرۋگىنىڭ اكىمدىگى ءوزىنىڭ Instagram پاراقشاسىندا ءبولىستى. جىبەك جولى اۋىلدىق وكرۋگىنىڭ اكىمى قانات قانافيننىڭ ايتۋىنشا, جەرگىلىكتى تۇرعىندار جاڭالىقتى جوعارى باعالادى.
«بۇل وبلىس پەن جالپى ەل ءۇشىن وراسان زور جوبا دەپ سانايمىن. ارينە, قوقىس تاستاۋدان, پلاستيك پەن اليۋميني ىدىستاردى تاپسىرۋدان جانە ول ءۇشىن اقشا الۋدان گورى جاقسى. بۇل ەكولوگيا ءۇشىن ۇلكەن ماڭىزعا يە. ەندى جوباعا ءدامحانا, مەيرامحانا, دۇكەندەردى دە قوسقىمىز كەلەدى, ولار دا مەرەكەدەن كەيىن ىدىس جيناپ, قوقىستى تاستامايدى», دەپ ءبولىستى قانات قانافين.
ەكولوگيالىق جوبانى ەكواكتيۆيست شاساليم شاگاليموۆ ازىرلەدى. «بۇل – اقمولا وبلىسىنداعى العاشقى فاندومات. وسىنداي ءۇش اۆتومات قازىردىڭ وزىندە نۇر-سۇلتاندا ورناتىلعان. مەن ەكولوگيالىق ءىس-شارالاردى ۇيىمداستىرۋمەن جانە وتكىزۋمەن جەتى جىل بويى اينالىسىپ كەلەمىن. نەلىكتەن ارشالى اۋدانى تاڭدالدى؟ ماسەلە مىنادا: جىبەك جولى, قوياندى, قوسشى, تالاپكەر, يلينكا سياقتى نۇر-سۇلتان قالاسىنىڭ سەرىكتەس كەنتتەرىندە قوقىس پوليگونى جوق, تيىسىنشە اپاتتى قوقىس ۇيىندىلەرى كوبەيۋدە. سوندىقتان سىناق نۇسقاسىن جىبەك جولى كەنتىنە قويۋدى ءجون كوردىك. سونىمەن قاتار, سەرىكتەس اۋىلداردا ادامدار اۆتوبۋستاردى ءجيى پايدالانادى, سوندىقتان ادامدار تارانى تاپسىرىپ, قالاعا تەگىن جەتۋى ءۇشىن فاندومات سول جەرگە بارادى», دەيدى شاساليم شاگاليموۆ.
ءبىر پلاستيك بوتەلكە بەس تەڭگەگە, ال اليۋميني قۇتى ەكى تەڭگەگە باعالانادى. بۇل اقشانى كولىك كارتاڭىزعا اۋدارۋعا نەمەسە قايىرىمدىلىققا قالدىرۋعا بولادى. ەكواكتيۆيستىڭ ايتۋىنشا, بولاشاقتا ولار ءوز جوبالارىن ودان ءارى دامىتۋعا نيەتتى.
