«قازاقستاندا جالپى ەپيدەميولوگيالىق جاعداي تۇراقتى. ينفەكتسيالىق اۋرۋحانالار مەن رەانيماتسياداعى ورىنداردىڭ 17 پايىزى تولىق. كوروناۆيرۋس ينفەكتسياسىمەن اۋرۋحانالارعا جاتقىزۋ جانە اۋىر جاعدايلار سانى ايتارلىقتاي ازايدى. وڭىرلەردىڭ كوبى «جاسىل» ايماقتا. «سارى» ايماقتا ەكى ءوڭىر: نۇر-سۇلتان مەن سولتۇستىك قازاقستان وبلىسى. الەمدە ناۋقاستانۋدىڭ كوبەيۋىن ەسكەرسەك, سانيتارلىق-ەپيدەميولوگيالىق تالاپتاردى ساقتاۋدى جالعاستىرۋ قاجەت. عيماراتتاردا, قوعامدىق كولىكتە بەتپەردە كيۋ جانە ادامدار كوپ جينالاتىن جەرلەردە الەۋمەتتىك اراقاشىقتى ساقتاۋ قاتاڭ تۇردە مىندەتتەلەدى», دەدى اسقار مامين بۇگىن ۇكىمەت وتىرىسىندا.
ونىڭ دەرەگىنشە, قازىرگى ۋاقىتتا 9 ملن-نان استام ادام ۆاكتسينانىڭ ءبىرىنشى كومپونەنتىن الدى. بۇل 18 جاستان اسقان حالىقتىڭ 80 پايىزىنا جۋىعى. شامامەن 8,5 ملن ادام ەكىنشى كومپونەنت سالدىردى. بۇل - 75 پايىز.
«جاپپاي رەۆاكتسينالاۋ بويىنشا جۇمىستى كۇشەيتۋ كەرەك. كەلەسى جىلدىڭ ءبىرىنشى جارتىجىلدىعىندا شامامەن 9 ملن ادام رەۆاكتسينالاۋدان ءوتۋى قاجەت. اقپارات, دەنساۋلىق ساقتاۋ مينيسترلىكتەرى جانە اكىمدىكتەر حالىق اراسىندا رەۆاكتسينالاۋ قاجەتتىلىگى تۋرالى اقپاراتتىق ءتۇسىندىرۋ جۇمىسىن بەلسەندى جۇرگىزۋى ءتيىس», دەگەن ۇكىمەت باسشىسى بۇل تاپسىرمالاردى باقىلاۋدى ورىنباسارى ەرالى توعجانوۆقا جۇكتەدى.
