ەڭ اۋەلى قادىر ورتالىعىندا بەلگىلى ەتنومۋزىكاتانۋشى, ەپيك جىرشى بەرىك ءجۇسىپتىڭ «سىر سۇلەيىن سۇراساڭ…» اتتى كەزدەسۋ كەشى ءوتتى. كەشتى ورتالىق ديرەكتورى باۋىرجان حاليوللا العىسوزبەن اشىپ, قوناقتىڭ كەۋدەسىنە سىرىم دات ۇلى اتىنداعى توسبەلگى تاعىپ, العىسحات تابىستادى.
سودان كەيىن ساحنا ءتورىن جەكە-دارا بيلەگەن جىرشى ءۇش ساعات بويى كورەرمەندى سىرلى ساز, عيبراتتى عازالدارمەن باۋراپ الدى. سىر سۇلەيلەرىنىڭ ءتۇرلى ماقامىن قۇيقىلجىتىپ, ءار جىراۋدىڭ وزگەشە قىرلارىن ءسوز ەتكەن ونەرپاز قازاقى جىرشىلىق ونەردىڭ وتكەنى مەن بولاشاعىنا دا بويلادى. اتتەڭ, ءداستۇرلى جىر تىڭداۋ داعدىسى ۇمىتىلا باستاعان زاماندا تاڭدى تاڭعا ۇرىپ جىرلايتىن جىرشىلىق ونەر مەن زاماناۋي ساحنانىڭ باسى بىرىكپەيتىنى راس. «جىرشىنى تولىق تىڭداعىلارىڭىز كەلسە, قاراپايىم قازاقى ورتادا, ۋاقىتقا شەك قويىلمايتىن جايماشۋاق جاعدايدا كەزدەسۋ كەرەك», دەگەن بەرىك ءجۇسىپتىڭ ۇسىنىسى باتىسقازاقستاندىق جىرسۇيەر ازاماتتاردىڭ, مادەنيەت سالاسى باسشىلارىنىڭ قۇلاعىندا قالدى دەپ ويلايمىز.
كەلەسى كۇنى قادىرسارايدا قازاقستان جازۋشىلار وداعى بقو فيليالىنىڭ ۇيىمداستىرۋىمەن اقجايىق قالامگەرلەرىنىڭ ادەبي جىل قورىتىندىسى ءوتتى.
باتىس قازاقستان وبلىسىنىڭ اكىمى عالي ەسقاليەۆ قوناقتاردى, قالامگەرلەردى ەل تاۋەلسىزدىگىنىڭ 30 جىلدىعىمەن قۇتتىقتاپ, قازاق رۋحانياتىنا ءوڭىر ادەبيەتشىلەرىنىڭ دە سىڭىرگەن ەڭبەگى زور ەكەندىگىن ايتتى. ءسويتىپ, جۇبان مولداعاليەۆ اتىنداعى سىيلىقتى اقىن باۋىرجان باباجان ۇلى مەن ۇزىلدىك ەلەۋبايقىزىنا, قادىر مىرزا ءالى اتىنداعى سىيلىقتى اقىن ۇلداي ساريەۆا مەن تالعات مىقيعا, اقىن جانعالي ءنابيۋللين اتىنداعى سىيلىقتى جازۋشى الپامىس بەكتۇرعانوۆ پەن اقىن تالاپ تايماس ۇلىنا, جازۋشى باقتىعۇل ويشىباەۆ اتىنداعى سىيلىقتى جىمپيتىلىق قالامگەرلەر مۇسىربەك ايتاشەۆ پەن ەنگەلس شىڭعاليەۆكە تاپسىردى.
شارا بارىسىندا ءسوز العان قازاقستان جازۋشىلار وداعىنىڭ باسقارما توراعاسى, مەملەكەتتىك سىيلىقتىڭ لاۋرەاتى ۇلىقبەك ەسداۋلەت قالامداس ارىپتەستەرىن قۇتتىقتاپ, 2021 جىل قورىتىندىسى بويىنشا حالىقارالىق «الاش» ادەبي سىيلىعىن جەرگىلىكتى اقىندار ايتقالي نارىكوۆ پەن قازبەك قۇتتىمۇرات ۇلىنا تابىستادى. سونداي-اق بۇل كۇنى باتىسقازاقستاندىق 8 قالامگەر – اقىن زاكاريا سيسەنعاليەۆ, ماحمەت قاجياحمەت, ساعىنتاي بيسەنعاليەۆ, داريعا نۇراشەۆا, اسانتەمىر قارشىعا, ەرتاي بيمۇحانوۆ, باۋىرجان شيرمەدين ۇلى, مارلەن عيلىمحان قازاقستان جازۋشىلار وداعىنا مۇشەلىككە قابىلدانىپ, كۋالىككە يە بولدى. بيىل 85 جىلدىعى اتالىپ وتكەن اقجايىقتىڭ اقيىق اقىنى جانعالي ءنابيۋلليندى ۇلىقتاۋ ماقساتىندا جاسالعان مەرەيتويلىق توسبەلگى اقىننىڭ جارى اعيبا عيناياتقىزىنا جانە بارشا قالامگەرگە تابىستالدى. ءدال وسى كەشتە اقىندار ماحمەت قاجياحمەتتىڭ «دالا دەمى» جانە باۋىرجان شيرمەدين ۇلىنىڭ «قالاعا حات» اتتى جاڭا كىتاپتارىنىڭ تۇساۋى كەسىلدى.
ايتا كەتەيىك, وسى جيىنعا شاقىرىلعان ءوڭىر قالامگەرلەرىنىڭ ەشقايسىسى دا ماراپاتتان تىس قالعان جوق.
جەلتوقساننىڭ 25-ىندە ورال قالاسىندا وتكەن حالىقارالىق اقىندار ايتىسى ۇشكۇندىك ونەر تويىنىڭ نۇكتەسىن قويدى. قازاقستان تاۋەلسىزدىگىنىڭ 30 جىلدىعى مەن بوكەي ورداسىنىڭ 220 جىلدىعىنا ارنالعان «تاۋەلسىزدىك تولعاۋى» اتتى حالىقارالىق دوداعا قازاقستاننىڭ ءار وڭىرىنەن بولەك قىرعىزستان, قىتاي جانە موڭعوليادان اقىندار كەلىپتى. ايتىستى قۇتتىقتاۋ سوزىمەن اشقان ءوڭىر باسشىسى عالي ەسقاليەۆ ءجۇرسىن ەرماندى 70 جاسىمەن قۇتتىقتاپ, يىعىنا شاپان جاپتى.
شارا بارىسىندا جەرگىلىكتى ون اقىنعا قازاقستان رەسپۋبليكاسى مادەنيەت جانە سپورت ءمينيسترى اقتوتى رايىمقۇلوۆانىڭ العىسحاتىن وسى سالانىڭ ۆيتسە-ءمينيسترى نۇرعيسا داۋەشوۆ تابىس ەتتى.
ايتىس اراسىندا قىرعىزستاننان ارنايى كەلگەن قۇرمەتتى قوناق, ماناسشى ازيز بيمىرزا ۋلۋ ماناس جىرىنان ءۇزىندى ورىنداپ, جايىق جۇرتىنىڭ دەلەبەسىن قوزدىردى. سونداي-اق قازىلار القاسىنىڭ مۇشەسى, سىر سۇلەيلەرىنىڭ سارقىتى بەرىك ءجۇسىپ تە جيىلعان جۇرتقا جىردان سىباعا تارتتى.
ءۇش كۇنگە سوزىلعان مادەنيەت پەن ونەر تويىنىڭ قورىتىندى كەشىندە دالا رەفورماتورى, داڭقتى باتىر, بي-شەشەن سىرىم دات ۇلى اتىنداعى توسبەلگى مەن اقشالاي سىيلىقتاردى اقىندارعا ءاسانالى ءاشىموۆ تابىستادى. وسىناۋ كەرەمەت شارانى جوعارى دارەجەدە ۇيىمداستىرعانى ءۇشىن بارشا مەيمانداردىڭ اتىنان شىمكەنتتىك اقىن نۇرلان ەسەنقۇلوۆ باۋىرجان حاليوللانىڭ يىعىنا شاپان جاۋىپ, قۇرمەت كورسەتتى. ال جەرگىلىكتى كاسىپكەر ازاماتتار ايتىس سوڭىندا قىرعىز ەلىنەن كەلگەن قوس قوناققا ات مىنگىزدى.
باتىس قازاقستان وبلىسى
