– بۇل – بولاشاق ماماندار دايارلاۋعا ۇلكەن ۇلەس. «قازترانسويل» اق وندىرىستىك وبەكتىلەرىندە جاستاردى وقىتا وتىرىپ, ءبىز مۇناي قۇبىرشىلارىنىڭ جاڭا بۋىنىن ازىرلەيمىز, – دەپ اتاپ ءوتتى «قازترانسويل» اق باس ديرەكتورى ديماش دوسانوۆ.
«قازترانسويل» اق ادام رەسۋرستارىن باسقارۋ دەپارتامەنتىنىڭ مەنەدجەرى اسەل تۇقمانوۆانىڭ ايتۋىنشا, 2020 جىلى ەلىمىزدە ەنگىزىلگەن كارانتيندىك شارالارعا بايلانىستى «قازترانسويل» اق-نا اقى تولەنەتىن كاسىپتىك پراكتيكا توقتاتىلىپ, 2021 جىلعى قازاننان باستاپ قايتا باستالدى. جىل سوڭىنا دەيىن ءبىزدىڭ كومپانيادا 150-دەن استام ستۋدەنت پراكتيكادان وتەدى.
ىرىكتەۋ كەزىندە ستۋدەنتتەردىڭ ۇلگەرىمى مەن بەلسەندىلىگى ەسكەرىلدى. وسى جىلعى پراكتيكانتتاردىڭ اراسىندا كوشباسشىلىق قاسيەتتەرى بار بولاشاعى زور جاستار كوپ.
– مەن تالدىقورعاندا كوپ بالالى وتباسىندا تۋىپ ءوستىم. ۇبت-دا 140-تان 125 بالل جيناپ, «مۇناي-گاز ءىسى» ماماندىعى بويىنشا جوو-عا ءتۇستىم. ۋنيۆەرسيتەتتە مەن وقۋ سالاممەن بايلانىستى ءىس-شارالارعا جانە كونكۋرستارعا بەلسەندى قاتىسامىن, سونداي-اق ۆولونتەرلىك قىزمەتپەن اينالىسامىن. مەنى «قازترانسويل» اق-قا اقى تولەنەتىن تاعىلىمداماعا قابىلدانعانىم تۋرالى جاڭالىق تاڭ قالدىردى, ويتكەنى بۇل ستۋدەنتتەر ءۇشىن ۇلكەن مۇمكىندىك. وپەراتورلىق قىزمەتتەر دەپارتامەنتىنە كەلىپ, قازاقستاننىڭ مۇناي قۇبىرلارى جۇيەسى, تەحنولوگيالىق پروتسەستەردى باسقارۋدىڭ اۆتوماتتاندىرىلعان جۇيەلەرى جانە مەترولوگيا تۋرالى كوپ اقپارات الدىم. بۇل تاعىلىمداما ماعان تەوريالىق ءبىلىمىمدى ءىس جۇزىندە قولدانۋعا كومەكتەستى. العان ءبىلىمىم جانە داعدىلارىم ءۇشىن ءبىزدىڭ مەنتورلارىمىزعا شەكسىز ريزامىن جانە بولاشاقتا ماعان ەلىمىزدىڭ جەتەكشى ۇلتتىق كومپانياسىندا جۇمىس ىستەۋ مۇمكىندىگى پايدا بولادى دەپ ۇمىتتەنەمىن, دەدى قازاق-بريتان تەحنيكالىق ۋنيۆەرسيتەتىنىڭ 4-كۋرس ستۋدەنتى ەركەجان ايتمولدا.
ستۋدەنتتەرگە مۇناي تاسىمالداۋ سالاسىنىڭ ەرەكشەلىكتەرىن زەرتتەۋگە ولارعا بەكىتىلگەن كۋراتورلار كومەكتەستى.
– ءبىز ستۋدەنتتەردى مۇناي تاسىمالداۋدىڭ تەحنولوگيالىق پروتسەسىمەن تانىستىردىق, ولارعا باس ديسپەتچەرلىك باسقارمانىڭ جۇمىسى كورسەتىلدى. ستۋدەنتتەر جۇمىس پروتسەسىنە قاتىستىرىلىپ, وقۋعا قىزىعۋشىلىقتارىن ارتتىردى. بولاشاقتا بۇل جاستار ءبىزدىڭ كومپانيا جۇمىسكەرلەرىنىڭ قاتارىن تولىقتىرادى دەپ ۇمىتتەنەمىز, – دەدى «قازترانسويل» اق وپەراتورلىق قىزمەتتەر دەپارتامەنتىنىڭ ينجەنەرى داۋلەت كيباتوۆ.
پراكتيكا بارىسىندا كوللەدجدە ءوزىمىز وقىپ تانىسقان اسپاپتارمەن جۇمىس ىستەۋدى ۇيرەندىك. بۇعان بىزگە باسشىلار كومەكتەستى, ولار ەڭبەك قاۋىپسىزدىگى جانە ەڭبەكتى قورعاۋ بويىنشا كىرىسپە نۇسقاما وتكىزدى. سونىمەن قاتار ءبىزدى ارنايى كيىممەن, تەگىن تاماقپەن جانە تاسىمالداۋمەن قامتاماسىز ەتتى, – دەدى Toraighyrov university 3-كۋرس ستۋدەنتى سوۆەت ءادىل.
كوپتەگەن ستۋدەنت ءۇشىن اقى تولەنەتىن وندىرىستىك تاجىريبە ءبىر ايعا بولاشاق ماماندىق بويىنشا «جۇمىس ىستەۋگە» مۇمكىندىك بەردى. وسى ۋاقىت ىشىندە ديپلوم جۇمىسىنىڭ تاقىرىبىن تاڭداعاندار دا بولدى.
– مەن قاراشىعاناق كەن ورنى ورنالاسقان باتىس قازاقستان وبلىسىنىڭ اقساي قالاسىندا دۇنيەگە كەلدىم. بالا كەزىمنەن مۇناي-گاز سەكتورىنداعى جۇمىستى ەستىپ ءوستىم. بۇل ماماندىق تاڭداۋعا اسەر ەتتى. «قازترانسويل» اق-نا پراكتيكادان ءوتۋ كەزەڭىندە ديپلومدىق جۇمىسىمنىڭ تاقىرىبىن تاڭدادىم. مەن ءۇشىن قازىرگى وندىرىستە وزەكتى جانە سۇرانىسقا يە بولاتىن ديپلومدىق جوبانى جازۋ وتە ماڭىزدى. سونىمەن قاتار ۋنيۆەرسيتەتتە مەن ستراتوسفەرادان كومىرتەكتى الۋ بويىنشا ستارتاپ-جوبالارمەن اينالىستىم. مەن ەكولوگيانى ساقتاپ, قوعام ءۇشىن پايدالى بولعىم كەلەدى. بۇل فاكت پراكتيكادان ءوتۋدى تاڭداۋعا دا اسەر ەتتى, ويتكەنى مەن «قازترانسويل» اق وندىرىستىك وبەكتىلەرى كومىرتەكتى بەيتاراپتىققا قول جەتكىزەتىن ەلدىڭ ءىرى كاسىپورىندارىنىڭ ءبىرى ەكەنىن بىلەمىن, – دەدى قازاق-بريتان تەحنيكالىق ۋنيۆەرسيتەتىنىڭ 4-كۋرس ستۋدەنتى كارينا قانات.
اقى تولەنەتىن پراكتيكادان ءوتۋ بارىسىندا الىنعان پراكتيكالىق ءبىلىم مەن داعدىلاردان باسقا, ستۋدەنتتەر كومپانياداعى ەڭبەك قاۋىپسىزدىگى مادەنيەتىنىڭ جوعارى دەڭگەيىن اتاپ ءوتتى.
– ءبىر اي بويى مۇناي تاسىمالداۋ دەپارتامەنتىندە جۇمىس ىستەدىم. بۇل دەپارتامەنتتى «قازترانسويل» اق-نىڭ «جۇرەگى» دەپ ايتسام قاتەلەسپەيمىن. ءبىز ناقتى جوبالارمەن جۇمىس ىستەدىك, قۇبىر جەلىلەرىنىڭ سىزبالارىن جينادىق, مۇناي تاسىمالىن قاداعالادىق, وقۋدى ترەناجەر-سيمۋلياتورلاردىڭ كومەگىمەن وتكىزدىك. «قازترانسويل» اق-نىڭ ءاربىر جۇمىسكەرى بىزگە ءاردايىم كومەكتەسۋگە دايىن بولعانى قۋانتادى. سونداي-اق كومپانيا اقپاراتتىڭ قاۋىپسىزدىگىن مۇقيات قاداعالايدى. كومپيۋتەردەگى جۇمىسكەرلەردىڭ دەرەكتەرى ءاردايىم قورعالادى. جەكە ءوزىم ەلەكتروندى پوشتاعا كەلەتىن «سپام» حابارلامالاردى اشۋدىڭ قاجەتى جوق ەكەنىن ءبىلدىم, سەبەبى ول قاۋىپتى بولۋى مۇمكىن, دەدى – قازاق-بريتان تەحنيكالىق ۋنيۆەرسيتەتىنىڭ 4-كۋرس ستۋدەنتى اياجان بەيسەنباەۆا.
جاستاردىڭ كومپانيا جۇمىسكەرلەرى سياقتى قورشاعان ورتاعا ۇقىپتى قاراۋى – ماڭىزدى فاكتورلاردىڭ ءبىرى.
– مىسالى, پراكتيكادان ءوتۋ كەزىندە ءبىز «قازترانسويل» اق-نىڭ بارلىق جۇمىسكەرى سياقتى تۇرمىستىق قالدىقتاردى سۇرىپتاۋعا قاتىستىق. مۇنى ىستەۋ وتە وڭاي بولدى, ويتكەنى ءار قاباتتا قوقىستى بولەك جيناۋعا ارنالعان ساۋىتتار بار. سونىمەن قاتار كومپانيا جۇمىسكەرلەرى قاعازدى ۇنەمدى جۇمسايدى جانە ءار قاباتتا ورنالاسقان ورتاق پرينتەرلەردى پايدالانادى. مۇنىڭ بارلىعى «قازترانسويل» اق ۇستاناتىن «جاسىل» كەڭسە ەرەجەلەرىنە سايكەس كەلەدى, – دەدى Satbayev University 4-كۋرس ستۋدەنتى سۇلتان جۇماعۇل.
تاعىلىمدامادان وتۋشىلەر كومپانيانىڭ قوعامدىق ومىرىنە بەلسەندى قاتىستى. جاستار ەڭبەك قاۋىپسىزدىگى جانە ەڭبەكتى قورعاۋ سالاسىنداعى «التىن ەرەجەگە» قانىق بولعانى سونشالىق, پراكتيكادان ءوتۋ اياقتالعاننان كەيىن «قازترانسويل» اق الەۋمەتتىك جەلىلەردەگى رەسمي پاراقشاسىندا جاريالاعان روليكتەر سەرياسىن دايىندادى.
– شىعارماشىل جاستاردىڭ ءبىزدىڭ كومپانيامىزداعى جۇمىسقا باسقا قىرىنان قاراعانى تاماشا. ولارمەن اڭگىمە بارىسىندا قولدانبالى بىلىمدەردەن باسقا, موبيلوگرافيا جانە SMM سياقتى قاجەتتى داعدىلارى بار ەكەنىن بىلدىك. قارقىندى دامىپ كەلە جاتقان كومپانيا رەتىندە ءبىز جاڭا ۇسىنىستارعا اشىقپىز جانە بۇل پراكتيكا ستۋدەنتتەردىڭ «قازترانسويل» اق-نا وزدەرىن كورسەتۋگە ۇلكەن مۇمكىندىك بەردى. مىسالى, پراكتيكانتتار «كومپانيا جۇمىسكەرلەرىمەن ءبىر كۇن» ايدارىن ۇسىندى, وندا ءتۇرلى كاسىپ وكىلدەرى ءوز قىزمەتتەرى تۋرالى اڭگىمەلەگەن. بىزگە بۇل يدەيا ۇنادى, – دەدى «قازترانسويل» اق جۇرتشىلىقپەن بايلانىس جانە ىشكى كوممۋنيكاتسيالار دەپارتامەنتىنىڭ ديرەكتورى گۇلنار بيسارينوۆا.
اقى تولەنەتىن ءىس-تاجىريبەدەن وتكەن ستۋدەنتتەردىڭ العان بىلىمدەرى ولاردى قازاقستاننىڭ ماگيسترالدى مۇناي قۇبىرى بويىنشا ۇلتتىق وپەراتوردىڭ جۇمىسكەرلەرى بولۋعا ىنتالاندىرادى جانە ەلدىڭ مۇناي تاسىمالداۋ سالاسىن دامىتۋعا ىقپال ەتۋگە مۇمكىندىك بەرەدى.
مەرۋەرت شۋكۋەۆا
