ايماقتار • 27 جەلتوقسان، 2021

قاجەت شارۋالارعا قاراجات بولىنبەگەن

59 رەت كورسەتىلدى

تابيعاتتىڭ جەرۇستى جانە جەراستى بايلىعىن ءتيىمدى پايدالانۋ بۇگىندە وزەكتى بولىپ وتىر. ونىڭ ىشىندە سۋ ماسەلەسى تىرشىلىك كوزى، اۋىل شارۋاشىلىعى سالاسىن العا باستىرۋشى نەگىزگى تەتىك بولعاندىقتان، ماڭىزى ارتىپ تۇر. اسىرەسە سوڭعى جىلدارى ەلىمىزبەن قاتار، سۋ تاپ­شىلىعى انىق بايقالاتىن جامبىل وبلىسىندا دا بۇل وزەكتى. وسى ورايدا مەملەكەت باسشىسى قاسىم-جومارت توقاەۆ سۋدى ءتيىمدى پايدالانۋعا بايلانىستى تاپسىرما بەرگەن بولاتىن.

كوللاجدى جاساعان زاۋرەش سماعۇل، «ەQ»

پرەزيدەنت تاپسىرماسىنا سايكەس قازىرگى كەزدە جام­بىل وب­لىسىندا سۋ بالانسى جا­سا­لىپ، «جول كارتاسى» ازىر­لەنگەن. «جۇمىسپەن قامتۋ­دىڭ جول كارتاسى» باعدار­لا­ما­­سى اياسىندا 2020-2021 جىل­­دارى وڭىردەگى كوم­مۋ­نال­دىق مەنشىكتەگى 81 سۋ شارۋا­شى­­لىعى نىسان­ى­ن قال­پى­­­نا كەلتىرۋ جۇمىس­تارى جۇر­­­گىزىلگەن. اتال­عان نىسان­دار­­­دىڭ ۇزىندىعى 374،8 شا­قى­­رىم­­دى قۇرايدى. ناتي­جەسىندە، 22،9 مىڭ گەكتار سۋارمالى ال­قاپ قاي­تا اينا­لىمعا قوسىلىپ وتىر.

بۇگىنگى تاڭدا جامبىل وب­لى­­سىن­داعى بىرقاتار سۋ قوي­ما­­لارىنىڭ قۇرىلىسى ەۋرو­پالىق قايتا قۇرۋ جانە دامۋ بانكى ارقىلى جۇر­گى­زىلۋدە. سو­نى­مەن قاتار «تاسوتكەل» سۋ قوي­­ما­سى­نىڭ قازىر­گى جاعدايى مەن ۇڭ­­عى­ما­لار­دى قالپىنا كەل­تىرۋ ماسە­لەسى دە وزەكتى. بۇل رەتتە وڭىر­دەگى جەرۇستى جانە جە­ر­استى سۋ قورلارىن زەر­­­دە­لەۋ ما­ڭىزدى بو­لىپ تۇر. دەگەن­­مەن ايماق­تا سۋ ماسە­لە­سىنە قا­تىستى جۇ­مىس­تار­دىڭ قارقىنى تومەن.

وبلىس اكىمى بەردىبەك ساپار­باەۆ بۇل سالاداعى سىلبىر جۇ­مىستاردى سىنعا العان بولاتىن. ماسەلەن، ءۇش اي بۇرىن ءتيىستى باسشىلارعا بەرىلگەن تاپسىرمالار ءالى كۇنگە ورىندالماعان. ءتىپتى «جول كارتاسى» بويىنشا جۇزەگە اسۋى ءتيىس 34 جوبانىڭ ىشىندەگى 11 جوبانىڭ عانا جۇ­مىسى جۇرۋدە. وسى ورايدا، «قاز­سۋشار» رەس­پۋب­لي­كالىق مەكەمەسى وبلىس­تىق فيليالىنىڭ ديرەكتورى قازىبەك بەدەباەۆ وڭىردەگى بەس اۋداندا 34 جوبا بويىنشا قايتا جاڭعىرتۋ باستالىپ كەت­كەنىن، بۇگىنگە دەيىن 46 كانال، 46 ۇڭعىما جوندەلگەنىن ايتتى. الايدا مۇندا دا بىرقاتار جوبالار مەرزىمىنەن كەشىگۋدە.

ال وبلىستىق اۋىل شا­رۋا­شىلىعى باسقارماسىنىڭ باسشىسى ەربول جيەنقۇلوۆتىڭ ايتۋىنشا، «جول كارتاسىندا» رەسپۋبليكالىق مەن­شىكتەن كوممۋنالدىق مەن­شىككە اۋىس­تىرۋ ارقىلى جالپى ۇزىندىعى 1 ملن 375،6 مىڭ شا­قىرىمدى قۇرايتىن 202 كا­نالعا جوندەۋ جۇمىستارىن جۇر­گىزىپ، 41،9 مىڭ گەكتار سۋارمالى القاپتى قايتا اينالىمعا ەنگىزۋ جوسپارلانعان ەكەن. سون­داي-اق باسقارما باسشىسى وبلىستىق بيۋدجەت قا­راجاتى ەسەبىنەن اعىمداعى جى­لى 26 ۇڭعىما زەردەلەنىپ، ونىڭ ىشىندە 11 ۇڭعىمانىڭ قايتا قالپىنا كەل­تىرۋگە جارامدى ەكەندىگى انىق­تالىپ، تولىق سمەتالىق ەسەبى ازىرلەنگەنىن ايتتى.

«سمەتالىق ەسەپكە سايكەس، اۋدان اكىمدىكتەرى تاراپىنان ۇڭ­عىمالاردى قالپىنا كەلتى­رۋگە 47،2 ملن تەڭگە، ال ينفرا­قۇ­رىلىمعا 410،4 ملن تەڭگە قارجى قاراستىرۋلارى قاجەت بولاتىن. الايدا بۇگىنگە بايزاق، جامبىل، مەركى جانە ت.رىسقۇلوۆ اۋداندارى اكىمدىكتەرىنە قۇجاتتارى دايىن ۇڭعىمالاردى قالپىنا كەلتىرۋ بىرنەشە رەت تاپسىرىلسا دا، ءالى كۇنگە دەيىن قارجى قا­راس­تىرىلمادى»، دەيدى ەربول جيەنقۇلوۆ.

سونىمەن قاتار ەلىمىزدىڭ اۋىل شارۋاشىلىعى مينيس­تر­لىگى سۋ رەسۋرستارى كوميتەتىنىڭ سۋ رەس­ۋرستارىن پايدالانۋدى رەتتەۋ جانە قورعاۋ جونىندەگى شۋ – تالاس باسسەيندىك ينسپەك­تسياسىنىڭ باسشىسى گۇلميرا يماشەۆا مەن «جامبىل سۋ قويمالارى» مەكە­مەسىنىڭ ديرەكتورى ايدار اسامبەكوۆ تە بۇل ماسەلە جونىندە ءتيىستى بىرقاتار جۇمىس اتقارىلىپ جاتقانىن جەتكىزدى. بىراق كەيبىر اۋدان اكىمدىكتەرىنىڭ تاراپىنان ءتيىستى قاراجاتتىڭ بولىنبەۋى، بەرىلگەن تاپسىرمالاردىڭ دەر كەزىندە ورىندالماۋى جانە تاعى دا باسقا ماسەلەلەر وڭىردەگى سۋ شا­رۋاشىلىعىنىڭ دامۋىنا كەدەرگى كەلتىرۋدە.

جالپى، وڭىردەگى بارلىق تو­عاندار مەن سۋ ايدىندارىن جانە سۋ جينالاتىن قويمالاردى ءتيىمدى پايدالانۋ قاجەتتىگى ءجيى ايتىلادى. جامبىل وبلىسى اۋىل شارۋاشىلىعى دامىعان ءارى سول سالاعا قولايلى ءوڭىر بولعاندىقتان، بۇل كەرەك تە. سەبەبى، جىل وتكەن سايىن ايماقتا سۋ تاپشىلىعى قاتتى سەزىلۋدە. كورشى قىرعىز ەلىنىڭ «كيروۆ» سۋ قويماسىنان كەلەتىن سۋ بار بولعانىمەن، ءبارىبىر وزىمىزدە باردى ۇقساتۋدىڭ ماڭىزى ارتىپ تۇر. سول سياقتى، وڭىردە باعا تۇراقتىلىعىن اۋىل شارۋا­شىلىعى ونىمدەرىن كوپ كولەمدە ءوندىرۋ ارقىلى عانا ساقتاپ قالۋ ماسەلەسى دە قاراستىرىلۋدا. ەندى ءار باسشى ءار جاققا بۇرا تارتپاي، سۋ ماسەلەسىنە كەلگەندە سەلقوستىق تانىتپاي، وڭىردەگى سۋ تاپشىلىعىن شەشۋگە كۇش سالسا بولعانى. ايتپەسە، سىلبىر جۇمىسقا سىن دا كوپ ايتىلادى.

 جامبىل وبلىسى

سوڭعى جاڭالىقتار

شىمكەنتتە دە LRT سالىنۋى مۇمكىن

ايماقتار • بۇگىن، 12:50

دوللار باعاسى تاعى قىمباتتادى

ەكونوميكا • بۇگىن، 10:32

ۇقساس جاڭالىقتار