شاراعا قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ, قر ءبىلىم جانە عىلىم ۆيتسە-ءمينيسترى قۋانىش ەرعاليەۆ, قازاقستان رەسپۋبليكاسىنىڭ ۇلتتىق ەكونوميكا ۆيتسە-ءمينيسترى الىشەر ابدىقادىروۆ, عالىمدار, ۋنيۆەرسيتەتتىڭ وقىتۋشى-پروفەسسورلارى مەن ستۋدەنتتەر قاتىستى.
كەزدەسۋ بارىسىندا قىرىمبەك كوشەرباەۆ مەملەكەت باسشىسى قاسىم-جومارت توقاەۆتىڭ كرەاتيۆتى يندۋستريانى دامىتۋ ماقساتىندا بەرگەن تاپسىرماسىنا سايكەس اتقارىلعان جۇمىستارعا توقتالدى.
«مەملەكەت باسشىسىنىڭ تاپسىرماسىنا سايكەس بۇل باعىتتا العاشقى جۇمىستار باستالدى. ۇكىمەت كرەاتيۆتى يندۋستريانى دامىتۋ بويىنشا جوبالىق كەڭسە قۇردى. قاراشا ايىندا «2021-2025 جىلدارعا ارنالعان كرەاتيۆتى يندۋستريانى دامىتۋ تۇجىرىمداماسى» قابىلداندى.
سوعان سايكەس, نۇر-سۇلتان, الماتى جانە شىمكەنت قالالارىندا بيزنەس-ينكۋباتورلار, ورتالىقتار مەن حابتار قۇرۋ قاراستىرىلعان. الماتى قالاسىندا قۇرىلاتىن بيزنەس-ينكۋباتورعا ءال-فارابي اتىنداعى قازاق ۇلتتىق ۋنيۆەرسيتەتى نەگىز بولۋى كەرەك دەپ ەسەپتەيمىن. وعان تولىق مۇمكىندىكتەر بار. جالپى كەز كەلگەن قوعامدا كرەاتيۆتى يدەيالاردى تۋدىراتىن ورتا ول - جوعارى وقۋ ورىندارى مەن ونداعى ەنتۋزياست جاس عالىمدار. بۇل تۇرعىدا ءال-فارابي اتىنداعى قازاق ۇلتتىق ۋنيۆەرسيتەتى قازاقتىڭ ينتەلەكتۋالدى تاريحىندا بۇرىننان كوشباسشى», دەدى مەملەكەتتىك حاتشى.
سونىمەن قاتار, ءوز سوزىندە قىرىمبەك كوشەرباەۆ كرەاتيۆتى يندۋستريانى دامىتۋ ءۇشىن باسەكەگە قابىلەتتى مامانداردى دايىنداۋ قاجەتتىگىن جەتكىزدى.
«كرەاتيۆتى يندۋستريانى دامىتۋ ءۇشىن كادر دايىنداۋ ماڭىزدى. ماسەلەن, باتىس ەلدەرىندە اقىن-جازۋشىلاردىڭ كىتاپتارىن جارنامالاپ, ساتۋ ىسىمەن ادەبي اگەنتتەر اينالىسادى. سول سەكىلدى ءبىزدىڭ دە قالامگەرلەردىڭ تۋىندىلارىن شەت تىلدەرىنە اۋدارىپ, نارىققا شىعارۋمەن اينالىساتىن بىلىكتى مامانداردى دايارلاۋ قاجەت. بۇدان بولەك, تسيفرلى جاڭا تەحنولوگيانىڭ قارقىندى دامۋى دا جاڭا ماماندىقتاردىڭ, كۋرستاردىڭ اشىلۋىن مىندەتتەپ وتىر», دەدى قىرىمبەك كوشەرباەۆ.
شارا بارىسىندا قازۇۋ رەكتورى جانسەيىت تۇيمەباەۆ بۇگىنگى كەزدەسۋ ۋنيۆەرسيتەتتىڭ تالانتتى جاستارى ءۇشىن ماڭىزى زور ەكەنىن اتاپ ءوتتى.
«مەملەكەتتىڭ كەلەشەگىن قالىپتاستىراتىن - باسەكەگە قابىلەتتى, ءبىلىمدى جاستار. بۇگىنگى تاڭدا ءبىزدىڭ جاس عالىمدارىمىز, تالانتتى ونەرپازدارىمىز ەلىمىزدى حالىقارالىق دەڭگەيدە تانىتۋدا. شىعارماشىلىق يندۋستريا-جاھاندىق ەكونوميكانىڭ ەڭ جىلدام دامىپ كەلە جاتقان باعىتتارىنىڭ ءبىرى. سوڭعى ونجىلدىقتا شىعارماشىلىق سالالار قوعامنىڭ الەۋمەتتىك جانە مادەني دامۋىنا ەرەكشە اسەر ەتتى. وسى ورايدا, قازاقستانداعى كرەاتيۆتى يندۋستريانى دامىتۋ ماسەلەلەرىنە ارنالعان بۇگىنگى كەزدەسۋدىڭ, اسىرەسە ءبىزدىڭ تالانتتى جاستارىمىز ءۇشىن ماڭىزى وتە زور», دەدى ۋنيۆەرسيتەت باسشىسى.
كەزدەسۋ اشىق ديالوگ فورماتىندا ءوتتى. ستۋدەنتتەر مەملەكەتتىك حاتشى قىرىمبەك كوشەرباەۆقا وزدەرىن قىزىقتىرعان سۇراقتارىن قويىپ, كرەاتيۆتى يندۋستريانى دامىتۋ بويىنشا جاڭا يدەيالارىن ورتاعا سالدى.
زاڭ فاكۋلتەتىنىڭ 1 كۋرس دوكتورانتى اقەركە جاقىش كرەاتيۆتى يندۋستريانى دامىتۋعا ۇلەس قوساتىن جاستار ءۇشىن جاڭا ءبىلىم بەرۋ باعدارلاماسىن ىسكە قوسۋ قاجەت ەكەنىن اتاپ ءوتتى.
«وسى ماقساتتا كرەاتيۆتى سالالار ءۇشىن دامۋ قورىن قۇرۋ جانە ينۆەستيتسيالىق جانە قارجىلىق ساياساتتا, سالىق سالۋدا, يمپورت پەن ەكسپورتتا بەلگىلى ءبىر ىنتالاندىرۋلاردى قولدانۋ قاجەت دەپ سانايمىز. سونداي-اق, كرەاتيۆتى يندۋستريانىڭ دامۋىنا ءوز ۇلەسىن قوساتىن جاس تالانتتاردى وقىتۋ ءۇشىن جاڭا ءبىلىم بەرۋ باعدارلامالارىن ازىرلەۋدى ۇسىنامىز», دەدى اقەركە جاقىش.
كەزدەسۋ اياسىندا مەملەكەتتىك حاتشى قىرىمبەك ەلەۋ ۇلى باستاعان دەلەگاتسيا ءال-فارابي كىتاپحاناسىنداعى ۋنيۆەرسيتەت عالىمدارىنىڭ ەڭبەكتەرى قويىلعان عىلىمي جەتىستىكتەر كورمەسىمەن تانىستى.
