كەزىندە ماەسترونىڭ ەسىمى ەلىمىزگە عانا ەمەس, شەت مەملەكەتتەرگە دە تانىمال بولىپ, ونى تىڭداۋشىلارى عاجايىپ داۋىسى ءۇشىن «باريتوندار كورولى» (د.گناتيۋك) دەپ اتادى. ءتىپتى, ايگىلى ءانشى ءمۇسىلىم ماگوماەۆ ونى «كەڭەس وداعىنداعى ۇزدىك فيگارو» دەپ قادىر تۇتتى, سەبەبى وسى پارتيامەن ەرمەك اعامىز سول كەزدەگى وداقتاس رەسپۋبليكالاردا عانا ەمەس, ەۋروپا ەلدەرىندە ونەر كورسەتىپ, ءدۇيىم جۇرتتى ءتانتى ەتتى.
ول پ.چايكوۆسكي اتىنداعى الماتى مۋزىكالىق ۋچيليششەسى مەن قۇرمانعازى اتىنداعى قازاق ۇلتتىق كونسەرۆاتورياسىن تامامداعان سوڭ, ماسكەۋدەگى ۇلكەن تەاترعا قىزمەتكە شاقىرۋ العانىنا قاراماستان, تۋعان ەلىندە قالىپ, ۇلتتىق ءان ونەرىنىڭ دامۋىنا قوماقتى ۇلەس قوستى. وپەرالىق, كامەرالىق جانە ەسترادالىق باي رەپەرتۋارىمەن كوپتەگەن ەلگە گاسترولدىك ساپارمەن بارىپ, قازاق ونەرىنىڭ ابىرويىن اسقاقتاتتى. سونداي-اق ۇلتتىق كينومىزدىڭ التىن قورىنا ەنگەن ء«بىزدىڭ سۇيىكتى دارىگەر», «تاقيالى پەرىشتە» كوركەم فيلمدەرىندە ەستە قالارلىق رولدەردى ويناپ, ونەگەلى ءىزىن قالدىردى.
عاجايىپ كەش ەرمەك سەركەباەۆ تۋرالى بەينەفيلممەن باستالىپ, تالانتتى ديريجەر ابزال ءمۇحيتديننىڭ جەتەكشىلىگىمەن «استانا وپەرا» سيمفونيالىق وركەسترى ا.سەركەباەۆتىڭ «توميريس» وپەراسىنان «قاسقىر» كۇيىن تارتۋ ەتسە, قازاقستاننىڭ ەڭبەك سىڭىرگەن قايراتكەرلەرى تالعات مۇساباەۆ, جانات شىبىقباەۆ, مەدەت چوتاباەۆ, ازامات جىلتىركوزوۆ, مەيىر باينەش, جۇپار عابدۋللينا, بيبىگۇل جانۇزاق, مارگاريتا دۆورەتسكايا جانە تاتيانا ۆيتسينسكايا, ەۆگەني چاينيكوۆ, راسۋل جارماعامبەتوۆ, شىڭعىس راسىلحان, رامزات بالاكيشيەۆ, سايان يسين, گۇلدانا الدادوسوۆا سەكىلدى بەلگىلى سوليستەر ءوز ونەرلەرىمەن جۇرتشىلىقتىڭ ىقىلاسىنا بولەندى. سونىمەن بىرگە قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆتىڭ جەتەكشىلىگىمەن «استانا وپەرا» حورىنىڭ ورىنداۋىندا ۇزدىك وپەرالىق جانە اسپاپتىق شىعارمالار ۇسىنىلدى.
كەش سوڭىندا «استانا وپەرانىڭ» بارلىق سوليستەرى, حورى جانە سيمفونيالىق وركەسترىنىڭ قاتىسۋىمەن ء«بىزدىڭ سۇيىكتى دارىگەر» كينوفيلمىندە ەرمەك سەركەباەۆ اعامىز شىرقاعان كومپوزيتور الەكساندر زاتسەپيننىڭ «نادو منوي نەبو سينەە...» اتتى تاماشا تۋىندىسى ورىندالدى.
