– تاۋەلسىزدىك جىلدارىندا وبلىستا 3 900 شاقىرىم گاز, 2,5 مىڭ شاقىرىم اۋىز سۋ جەلىسى تارتىلدى. ورتالىقتاندىرىلعان سۋمەن قامتۋ كورسەتكىشى 35-تەن 99 پايىزعا دەيىن ارتتى. سونداي-اق 30 جىلدا 12 ملن شارشى مەتر تۇرعىن ءۇي پايدالانۋعا بەرىلدى. تۇرعىن ءۇي قۇرىلىسىن جانداندىرۋعا 640 ملرد تەڭگەدەن استام ينۆەستيتسيا سالىندى, – دەيدى م.دوسمۇحامبەتوۆ.
تۇرعىن ءۇي قۇرىلىسى اۋدانداردا دا قارقىن الىپ وتىر. قۇرمانعازى اۋدانىنىڭ اكىمى مارات مۋرزيەۆتىڭ ايتۋىنشا, بۇعان دەيىن ەكى كوپقاباتتى تۇرعىن ءۇي بوي كوتەرىپ, مۇقتاج وتباسىلار باسپانامەن قامتىلىپتى. ال ەل تاۋەلسىزدىگىنىڭ 30 جىلدىعى قارساڭىندا «دەكور» جشس قادىر ەلدى مەكەنىندە تۇرعىزعان 60 پاتەرلىك ءۇش قاباتتى تۇرعىن ءۇي پايدالانۋعا تاپسىرىلدى.
– ەلىمىزدە تۇرعىنداردىڭ الەۋمەتتىك-تۇرمىستىق ماسەلەلەرى وڭ شەشىمىن تاۋىپ كەلەدى. سونىڭ ءبىرى – باسپاناعا مۇقتاجدىق. قازىر تۇرعىندار ءۇشىن باسپانالى بولۋدىڭ مۇمكىندىگى كوبەيدى. اۋدانداردا «نۇرلى جەر» باعدارلاماسىمەن تۇرعىن ءۇي كەشەندەرى سالىنىپ, ەل يگىلىگىنە بەرىلىپ جاتىر. كوپتەگەن وتباسى قونىس تويىن تويلاپ, قۋانىشقا كەنەلدى. مەملەكەتتىڭ قولداۋىمەن مىڭداعان وتباسى جاڭا باسپاناعا قونىستاندى, – دەيدى م.مۋرزيەۆ.
اۋدان اكىمىنىڭ تۇسىندىرۋىنشە, جاڭا تۇرعىن ءۇيدىڭ پاتەرلەرى 3 ساناتقا كىرەتىن تۇرعىندارعا بولىنەدى. الدىمەن كوپبالالى وتباسىلار ءۇش بولمەلى پاتەرگە يەلىك ەتەدى. سونداي-اق مۇمكىندىگى شەكتەۋلى جاندارعا تومەنگى قاباتتان باسپانا بەرۋ كوزدەلىپتى.
ال ماحامبەت اۋدانىندا Nur Otan پارتياسىنىڭ سايلاۋالدى باعدارلاماسىن ورىنداۋ ماقساتىندا كوپبالالى ءۇش وتباسىعا, سونداي-اق جەتىم جانە اتا-اناسىنىڭ قامقورلىعىنسىز قالعان جاسوسپىرىمدەرگە, زەينەتكەرلەرگە, تولىق ەمەس وتباسىلارعا جاڭا باسپانانىڭ كىلتى بەرىلدى. ءىس-شاراعا وبلىس اكىمىنىڭ ورىنباسارى قايرات بەكەنوۆ قاتىسىپ, باسپانالى بولعانداردىڭ قۋانىشىن ءبولىستى.
– ءبىزدىڭ وبلىستا ارنايى باعدارلامالار اياسىندا ءتۇرلى جوبالار ىسكە اسىرىلىپ جاتىر. ماسەلەن, بيىل ماحامبەت اۋدانىندا بىرنەشە جوبانى جۇزەگە اسىرۋ ءۇشىن 4 ملرد تەڭگەدەن استام قارجى ءبولىندى. ونىڭ ىشىندە اۋىلدارعا جول, سپورت نىساندارىن سالۋ, ينجەنەرلىك ينفراقۇرىلىمداردى, مەملەكەتتىك باعدارلاما شەڭبەرىندە از قامتىلعان وتباسىلاردى تۇرعىن ۇيمەن قامتۋ سەكىلدى جوبالار بار, – دەدى ق.بەكەنوۆ.
بۇل اۋداندا ەكى پاتەرلىك تۇرعىن ۇيگە ەلەونورا ايۋسينا مەن ءمولدىر ايماعامبەتتىڭ وتباسىلارى كوشىپ كەلدى. جاڭا پاتەرلەر كوگىلدىر وتىنعا قوسىلعان. ەلەكتر ەنەرگياسى مەن سۋ جەلىلەرى تارتىلعان.
اتىراۋ وبلىسى
