كوللاجدى جاساعان زاۋرەش سماعۇل, «ەQ»
ءورت شىققان ساتتە ۇلكەندەر ءوز شارۋالارىمەن قالاعا كەتكەن ەدى. ۇيدە قالعان 4 بالاعا ەس بولاتىن ەرەسەگىنىڭ ءوزى سەگىز جاستاعى بالا. لاپ ەتكەن قىزىل جالىننان قورىققان بالاقايلار سىرتقا جۇگىرىپ شىعۋدىڭ ورنىنا ءبىرىن-ءبىرى قۇشاقتاپ ءۇرپيىسىپ ءبىر بۇرىشقا تىعىلىپ قالعان. سىرتتان كومەك كەلمەگەندە مۇنىڭ سوڭى نە بولارىن ويلاۋدىڭ ءوزى قورقىنىشتى.
ابىروي بولعاندا ءۇيدىڭ قابىرعالارىنان شىعىپ جاتقان قويۋ ءتۇتىندى سول ماڭايدا ويناپ جۇرگەن №22 مەكتەپتىڭ بەسىنشى سىنىپ وقۋشىسى ولەگ پيروگ بايقاپ قالعان. ولەگ بۇل ۇيدە كىشكەنتاي بالالارى بار وتباسى تۇراتىنىن بۇرىننان بىلەتىن ەدى.
– مەن كۇندە ءوزىمىز سىرعاناپ جۇرگەن قار ۇيىندىسىنە شىعىپ شاتىردىڭ جانىپ جاتقانىن كوردىم. قورشاۋدىڭ تەسىگىنەن اۋلاعا ەندىم. وسى ساتتە ءۇيدىڭ ىشىندە قالعان تەرەزە اينەگىن تاقىلداتىپ ۇرا باستادى. كۇرتەمدى شەشىپ, قاردىڭ ۇستىنە تاستادىم. ەسىك ارقىلى كىرۋ مۇمكىن ەمەس, لاپىلداپ جانىپ جاتىر. ودان كەيىن تەرەزەنى يتەرىپ اشىپ, ىشكە كىردىم دە, بالالاردى ءبىر-بىرلەپ سىرتقا شىعارا باستادىم. سابيلەردىڭ بىرەۋى جالاڭبۇت ەكەن, وعان شالبارىن تاۋىپ بەردىم. ءتورتىنشى بالانى سىرتقا شىعارىپ جاتقانىمدا ءبىر ەر ادام كەلىپ كومەكتەستى. ول ساتتە قورقىنىش دەگەن نارسە ويىما دا كىرمەپتى, بار ويىم بالالاردى سىرتقا شىعارۋ بولدى, – دەدى بالا باتىر.
جانىپ جاتقان ءۇيدىڭ تۇبىندە جارتىلاي قارعا باتقان گاز باللوندارى تۇر ەدى. ولەگ الگى بەيتانىس ەر اداممەن بىرگە بۇلاردى دا قاۋىپسىز جەرگە اپارىپ قويادى. ارتىنشا پەرىشتە قاعىپ اجال ارانىنان امان قالعان ءتورت بالانىڭ اتا-اناسى مەن ءورت سوندىرۋشىلەر دە جەتەدى.
قۇتقارۋ قىزمەتى ءورتتى جارتى ساعاتقا جەتپەي ءسوندىردى. ءۇي ىشىندە قالعان بالالاردىڭ دەنساۋلىعىنا ەشقانداي زاقىم كەلگەن جوق.
قوستاناي وبلىسى
