ءتىپتى ءتول تاريحىمىزدىڭ قىسقا دا نۇسقا ەنتسيكلوپەدياسى, ەگەمەن ەلىمىزدىڭ شىمىر دا شىنايى جىلناماسى دەۋگە بولادى. ونىڭ ۇستىنە, تاۋەلسىزدىگىمىزدىڭ 30 جىلدىق مەرەيتويىنا وراي جارىق كورگەندىگى ماقالانىڭ تانىمدىق, يدەولوگيالىق, تاربيەلىك ماڭىزىن ودان بەتەر ارتتىرىپ وتىر. وندا كەڭ كولەمدى ەكونوميكالىق, الەۋمەتتىك تالداۋ جاسالۋىمەن قاتار, قول جەتكەن تابىستارىمىزعا, رۋحاني بولمىسىمىزعا, قازاقستان حالقىنىڭ بىرلىگى مەن قوعامدىق تۇراقتىلىعىنىڭ وراسان زور ۇلەسىنە ءتيىستى باعا بەرىلدى, الداعى ۋاقىتقا ساليقالى باعىت-باعدار بەلگىلەندى. ەلباسىنىڭ «تاۋەلسىزدىك تە باقىت سياقتى, باعالاعان ادامنىڭ, ايالاعان قوعامنىڭ قولىنا تۇراقتايدى. حالقى تاتۋ, ەكونوميكاسى قۋاتتى, ساياسي جۇيەسى تۇراقتى, مارتەبەسى بيىك, ابىرويى اسقاق قازاقستاننىڭ بولاشاعى كەشەگىدەن كەمەل, بۇگىنگىدەن نۇرلى ەكەندىگىنە كامىل سەنەمىن», دەگەن تۇجىرىمى ءار قازاقستاندىقتىڭ ويىنان شىققان ءسوز دەر ەدىم.
تاماشا تاعىلىمعا تۇنىپ تۇرعان, جاس ۇرپاققا تاربيەلىك ءمانى زور, ماعىنالى ماقالانىڭ ونە بويىندا ۇعا بىلەر كوكىرەككە ساۋلە تۇسىرەتىن شۇعىلالى تۇستار از ەمەس. الاش جۇرتىنىڭ ازاتتىق جولىنداعى قيان-كەسكى كۇرەسى, تاۋەلسىزدىك جىلدارىنداعى جالاۋلى جەڭىستەر مەن جان سۇيسىنتەر جەتىستىكتەر, ماڭگىلىك ەل قۇرۋ جولىنداعى اسقارالى مىندەتتەر كورىنىس تاپقان. تۇعىرىمىزدى بيىكتەتەتىن تاعىلىمدى جول بار. سول جولدىڭ ارناسىن كەڭەيتۋ, ابىرويلى بيىككە جەتكىزۋ ءبىر ادامنىڭ ەمەس, بايتاق ەلدىڭ ارقالار جۇگى. مىڭ ءتۇرلى تاعدىردىڭ سوققىسىن جەسە دە, ەرتەڭگى كۇنگە دەگەن ءۇمىت وتى كوكىرەگىندە الاۋلاپ تۇراتىن ءبىزدىڭ حالقىمىز بويىنداعى عاجايىپ قاسيەتتەرىنەن ەش ۋاقىتتا ارىلعان ەمەس. كەشەگى الماعايىپ كۇندە دە ەجەلگى ادەتىنەن تانبادى. مىنە, وسى ۋاقىتتا نۇرسۇلتان ءابىش ۇلى قازاققا ءتان دانالىق پەن دارالىقتىڭ ۇلگىسىن كورسەتىپ, ەلى مەن جەرىن قالاي ءسۇيۋ كەرەكتىگىن ۇقتىرا ءبىلدى. بەينەلەپ ايتقاندا, ايقىن جول سىلتەر, ناقتى باعىت كورسەتەر تەمىرقازىق ىسپەتتى.
كولەمدى ماقالادا ايتىلعان سالماقتى تولعامداردىڭ بارلىعى كوڭىلگە اسا قونىمدى اڭگىمە بولدى. ولاردىڭ بارىنە توقتالۋ شاعىن پىكىرىمىزدە, ارينە, مۇمكىن ەمەس. تاۋەلسىزدىك دەگەن قاسيەتتى دە كيەلى ۇعىمنىڭ سالتانات قۇرۋىنا ۇلەس قوسۋ بارلىق قازاقستاندىقتاردىڭ پارىزى ەكەندىگىنە باسا نازار اۋدارىلعانى قۋانتادى. ويتكەنى بىرلىگى جاراسقان قوعامى بار تاۋەلسىز مەملەكەت بولۋدا مۇنىڭ ماڭىزدىلىعى ەرەكشە.
دەگەنمەن, اۆتوردىڭ ءبىر تەرەڭ تۇجىرىمى تۋرالى ايتپاي كەتۋگە بولمايدى. ەلباسى بىلاي دەيدى: «ادامدى قانداي قيىندىقتان دا امان الىپ شىعاتىن قۇدىرەت ەڭبەك ەكەنىن مەن ءسابي كەزىمنەن-اق سەزىندىم. كەيىنگى جاستارعا ۇنەمى «ەڭبەك ەت, وتباسىڭدى اسىرا, ەلىڭە قىزمەت قىل: ءوزىڭ دە تابىستى بولىپ, وتانىڭنىڭ دا قۋاتى ارتادى» دەيتىنىم سوندىقتان». بۇل جالپى بار تىرشىلىكتىڭ كۇرەتامىرى, نەگىزى رەتىندە قابىلداناتىن قاعيدا دەپ ويلايمىن. اعا ۇرپاق وكىلدەرى دە, بارلىق دەڭگەيدەگى ارداگەرلەر ۇيىمدارى دا وزدەرىنىڭ ومىرلىك تاجىريبەسىنە, ەڭبەك جولىنا سۇيەنە وتىرىپ, وسى قاعيدانى جاستاردىڭ ساناسىنا ءسىڭىرۋ بويىنشا جۇمىس جۇرگىزىپ كەلەدى ءھام جۇرگىزە بەرەدى.
ەلباسىنىڭ باعدارلامالىق سيپاتى بار ماقالاسى قازاقستان قوعامىنىڭ العا جىلجۋ پروتسەسىندەگى كەزەكتى جارقىن بەلەس دەپ ايتۋعا تولىق نەگىز بار.
عوسمان تولەعۇل,
اقمولا وبلىستىق ارداگەرلەر كەڭەسىنىڭ توراعاسى
