ەندى مەملەكەتتىك ورگانداردىڭ لاۋازىمدى تۇلعالارى بيزنەسكە زالال كەلتىرگەنى ءۇشىن زاڭدى تۇردە جەكەلەي جاۋاپتى بولادى. بۇگىن سەناتتا بيزنەستى جۇرگىزۋ جاعدايىن جاقسارتۋ جونىندە زاڭ قابىلدادى
بيزنەستى جۇرگىزۋ ءۇشىن وڭتايلى جاعداي جاساۋ – قۇجاتتىڭ باستى ماقساتى بولىپ تابىلادى. مىسالى, بيزنەسكە قويىلاتىن قوسىمشا تالاپتاردىڭ پايدا بولۋىنا وراي ەندى «1 in 2 out» قاعيداتى بويىنشا كۇرەس جۇرەتىن بولادى. بۇل دەگەنىمىز, ءبىر جاڭا تالاپ ەنگىزىلگەندە نەمەسە بيزنەسكە قاتىستى رەتتەۋدى قاتاڭداتقاندا – بيزنەستى قۇقىقتىق رەتتەۋدەگى سول سالادان باسقا ەكى تالاپ الىنىپ تاستالۋى ءتيىس.
«بۇل زاڭ مەملەكەت باسشىسىنىڭ تاپسىرمالارىن ورىنداۋ ءۇشىن ازىرلەندى. قۇجاتتا بيزنەستى قولدايتىن جاڭا زاڭنامالىق شارالار ۇسىنىلدى. سوعان سايكەس, بيزنەستى رەتتەيتىن قۇقىقتىق اكتىلەردى ازىرلەۋ جانە قابىلداۋ ءتارتىبى كاسىپكەرلەردىڭ زاڭدى مۇددەلەرىن ەسكەرە وتىرىپ كۇشەيتىلەدى. بۇل زاڭ بيزنەستى دامىتۋعا قاجەتتى جاعدايلاردى قامتاماسىز ەتۋگە جانە مەملەكەتتىك ورگاندار تاراپىنان كاسىپكەرلەردىڭ قىزمەتىنە نەگىزسىز ارالاسۋدى بولدىرماۋعا باعىتتالعان», دەدى ماۋلەن اشىمباەۆ.
