تاراپتار كەزدەسۋ بارىسىندا قازاقستان مەن رۋمىنيانىڭ پارلامەنتارالىق قارىم-قاتىناستارىن ودان ءارى دامىتۋ كەلەشەگىن تالقىلادى. ماۋلەن اشىمباەۆ تاۋەلسىزدىك جىلدارى ەكى ەل اراسىندا جوعارى دەڭگەيدە سەنىمدى ساياسي ديالوگ ورناعانىن اتاپ ءوتتى.
سەنات توراعاسى مەملەكەت باسشىسى قاسىم-جومارت توقاەۆ پەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ نۇر-سۇلتان مەن بۋحارەست اراسىنداعى دوستىق جانە ءوزارا ءتيىمدى قارىم-قاتىناستاردى نىعايتۋعا باسا نازار اۋدارىپ وتىرعانىن اتاپ ءوتتى.
ماۋلەن اشىمباەۆ ەكى ەل پارلامەنتتەرىنىڭ بايلانىستارى بويىنشا دا ءوزارا ءتيىمدى ىنتىماقتاستىق جونىندەگى باعداردى قولداۋ جانە ىلگەرىلەتۋدىڭ ماڭىزدى ەكەنىنە سەنىم ءبىلدىردى.
«سالالىق كوميتەتتەردىڭ ءتۇرلى ماڭىزدى ماسەلەلەر بويىنشا بايلانىستارىنا قارقىن بەرۋ ءۇشىن كونسۋلتاتسيالار مەن وزگە دە شارالاردى ۇيىمداستىرۋعا بولار ەدى. سونىمەن قاتار, ءبىز جۇمىس بايلانىستارىن تەرەڭدەتۋ جانە پارلامەنتتىك قىزمەت تاجىريبەسىن زەردەلەۋ ءۇشىن الداعى كەزەڭدە ونلاين جانە وفلاين تۇرىندە بىرلەسكەن بىرقاتار شارالار وتكىزە الار ەدىك», دەدى ماۋلەن اشىمباەۆ.
تاراپتار جۇزدەسۋ بارىسىندا پارلامەنتشىلەردىڭ ءوزارا مۇددەلەستىك تۇرعىسىندا كەلەشەگى زور باعىتتارداعى ىنتىماقتاستىقتى دامىتۋعا جاردەمدەسۋ ماسەلەلەرىن دە قارادى. ول – ەنەرگەتيكا, جەڭىل جانە اۋىر ونەركاسىپ, قۇرىلىس, كولىك, فارماتسەۆتيكا, تۋريزم جانە اۋىل شارۋاشىلىعى سالالارى بولىپ وتىر.
«اۋىل شارۋاشىلىعىندا, ونىڭ ىشىندە تابيعي ءونىم وندىرۋدە اۋقىمدى مۇمكىندىكتەر اشىلىپ جاتىر. قازاقستاندىق سەناتورلار «ورگانيكالىق ءونىم تۋرالى» زاڭ جوباسىن ازىرلەگەن بولاتىن. قازىرگى كەزدە بۇل نارىقتا ۇزاق مەرزىمدى ءوسۋ ءۇردىسى بايقالادى. قۇجاتتا وسى سالاداعى فەرمەرلەردى قولداۋدىڭ ناقتى شارالارى كوزدەلىپ وتىر. قازاقستاننىڭ اگروونەركاسىپ سەكتورى شەتەلدىك ينۆەستيتسيا ءۇشىن تارتىمدى بولادى دەگەن سەنىمدەمىن. ءسىزدىڭ ەلدىڭ كاسىپكەرلەرىن ىنتىماقتاستىققا شاقىرامىز», دەدى ماۋلەن اشىمباەۆ.
