مەملەكەتتىك جانە ۆەدومستۆولىق ارحيۆتەر قىزمەتكەرلەرىنىڭ بىلىكتىلىگىن ارتتىرۋ ورتالىعىنىڭ سالتاناتتى اشىلۋىندا ەرالى توعجانوۆ سالا قىزمەتكەرلەرىنە العىس ايتىپ, ولارعا قولداۋ كورسەتىلۋى ءتيىس ەكەنىن اتاپ ءوتتى.
«وتكەن كۇننىڭ ايعاقتارىنىڭ ءبارى – بولاشاقتىڭ نەگىزى. 2020 جىلدان باستاپ ارحيۆ ءىسى قىزمەتكەرلەرىنىڭ جالاقىسى 50 پايىزعا دەيىن كوتەرىلدى. ايماقتاردا 30 پايىزعا دەيىن ارتتى. 2022 جىلدان باستاپ جالاقى تاعى دا 20 پايىزعا وسەدى دەپ جوسپارلانۋدا. ارحيۆ سالاسى قىزمەتكەرلەرىنە جان-جاقتى قولداۋ كورسەتۋىمىز كەرەك. ەكىنشىدەن, سول جۇمىستى اتقاراتىن قىزمەتكەرلەردىڭ دە دەڭگەيى جوعارى بولۋى كەرەك. سول سەبەپتى بۇگىن ارنايى وقۋ ورتالىعى اشىلىپ جاتىر. ورتالىقتىڭ اشىلۋىمەن بارشاڭىزدى قۇتتىقتايمىن. مامانداردى ەۋرازيا ۇلتتىق ۋنيۆەرسيتەتى دايارلاپ جاتىر, دەگەنمەن, ول – از. ارحيۆ سالاسىندا جۇرگەن ازاماتتار ۇلتتىق ارحيۆ جانىنان اشىلعان وسى ورتالىقتا ءدارىس بەرە الادى, تاجىريبەسىمەن, بىلىمىمەن جەرگىلىكتى جەردەگى ازاماتتارمەن بولىسەدى دەگەن سەنىمدەمىن», دەدى ەرالى توعجانوۆ.
مادەنيەت جانە سپورت ءمينيسترى اقتوتى رايىمقۇلوۆا ارحيۆ سالاسى كادرلارىنىڭ بىلىكتىلىگىن ارتتىرۋ جانە قايتا دايارلاۋ, ونىڭ ىشىندە سالالىق ماماندىقتار بويىنشا – رەستاۆراتور, عىلىمي-تەحنيكالىق جانە اۋديوۆيزۋالدى قۇجاتتاردى وڭدەۋ بويىنشا العاش رەت اشىلعان ورتالىقتىڭ ماڭىزدىلىعىن اتاپ ءوتتى.
«قازىرگى ارحيۆ سالاسى - الەمدىك وركەنيەتتىڭ بارلىق سالاسىنا ساي كەلەتىن شەتەلدىك ارحيۆ مەكەمەلەرىمەن, عىلىمي ورتالىقتارىمەن تىعىز بايلانىستا قىزمەت ەتىپ جاتقان جۇيە دەپ ايتۋعا ابدەن لايىق. مەملەكەتتىك جانە ۆەدومستۆولىق ارحيۆتەر قىزمەتكەرلەرىنىڭ بىلىكتىلىگىن ارتتىرۋ ورتالىعىنىڭ نەگىزگى مىندەتى - ارحيۆ سالاسىنىڭ جوعارى دەڭگەيلى كاسىبي ماماندارىن دايارلاۋ, كادرلىق الەۋەتىن كاسىبي دەڭگەيگە كوتەرۋ, ارحيۆ ءىسى جانە قۇجات اينالىمى سالاسىنداعى مامانداردىڭ كاسىبيلىك, جەكە قۇزىرەتتىلىك ساپاسىن ارتتىرۋ, كادرلاردىڭ جەكە دامۋ باعدارلاماسىن ازىرلەۋ. ورتالىقتىڭ تولىق كۋرسىن اياقتاعان ماماندار ءتيىستى ۇلگىدەگى سەرتيفيكاتتى الادى», دەدى مينيستر.
