وتىرىستا «ونەركاسىپتىك ساياسات تۋرالى» جانە وعان ىلەسپە زاڭ جوباسى تۋرالى بايانداما جاساعان مينيستر ءوندىرىس پروتسەسىنە قاتىستى تىڭ جاڭالىقتارمەن ءبولىستى.
ء«بىرىنشى, ىنتالاندىرۋدىڭ جاڭا قۇرالى - ونەركاسىپتىك گرانت ەنگىزىلۋدە. ول بىرگە قارجىلاندىرۋ نەگىزىندە ءوندىرىستى تەحنولوگيالىق جاڭعىرتۋعا بەرىلەدى.
ەكىنشى, مەملەكەتتىك ىنتالاندىرۋدىڭ بارلىق ءىس-شاراسى ورتا جانە جوعارى بولىنىستەگى ءونىم وندىرۋشىلەرگە بەرىلەدى. ادىستەمە نەگىزىندە ءونىمنىڭ ءتيىستى تىزبەسى بەكىتىلەدى. وسىلايشا, قايتا وڭدەۋدى تەرەڭدەتۋگە نازار اۋدارىلادى», دەدى ول.
ونىڭ ايتۋىنشا, ۇشىنشىدەن كورسەتىلەتىن ءىس-شارالاردىڭ تيىمدىلىگىن ارتتىرۋ ءۇشىن قارسى مىندەتتەمەلەر ەنگىزىلەدى. ولار بيزنەستىڭ الىپ وتىرعان ءىس-شارالارىنىڭ ءتۇرى مەن كولەمىن ەسكەرە وتىرىپ ايقىندالادى.
كاسىپورىن مىندەتتەمەلەردى ورىنداماعان جاعدايدا ولاردى ورىنداۋ دەڭگەيىنە قاراي بيۋدجەت قاراجاتىن قايتارۋى ءتيىس.
ءتورتىنشى, باسەكەگە قابىلەتتىلىكتى ارتتىرۋ تۋرالى كەلىسىم ەنگىزىلەدى. ول ىنتالاندىرۋ ءىس-شارالارىنىڭ ارالاس پاكەتىن الۋعا مۇمكىندىك بەرەدى. بەسىنشى, ونەركاسىپتى دامىتۋ قورىنىڭ 3 پايىزدىق جەڭىلدەتىلگەن قارجى بەرۋ فۋنكتسياسى كوزدەلگەن. ال نارىقتا ينۆەستيتسيالىق جوبالاردى نەسيەلەۋ مولشەرلەمەسى 6 پايىز جانە ودان جوعارى.
«التىنشى - تسيفرلىق ترانسفورماتسيالاۋ. ءبىز گەرمانيانىڭ فراۋنحوفەر ينستيتۋتىمەن بىرلەسىپ, جۇيەقۇراۋشى كاسىپورىندارعا تالداۋ جاسادىق. ولاردىڭ ارقايسىسى تسيفرلىق ترانسفورماتسيانىڭ قاي كەزەڭىندە ەكەنىن باعالادىق. كاسىپورىندارعا تسيفرلىق ترانسفورماتسيا جۇرگىزۋ ءۇشىن قىزمەتكەرلەرىنىڭ بىلىكتىلىگىن ارتتىرۋ جانە شەتەلدىك مامانداردى تارتۋ, باسقارۋدىڭ جاڭا ادىستەرىن ەنگىزۋ تەتىكتەرى كوزدەلگەن.
جەتىنشى, جىلدان جىلعا ۇسىنىلاتىن مەملەكەتتىك ىنتالاندىرۋ ءىس-شارالارىنىڭ تىزبەسى كەڭەيۋدە. بۇل ءوز كەزەگىندە بيزنەس ءۇشىن قولايلى جاعدايلار جاساۋدى تالاپ ەتەدى. سوندىقتان بارلىق ىنتالاندىرۋ ءىس-شارالارى «ەلەكتروندىق ۇكىمەت» ۆەب-پورتالى ارقىلى ء«بىر تەرەزە» قاعيداتى ارقىلى جۇزەگە اسىرىلادى. ءبىزدىڭ مينيسترلىك ىنتالاندىرۋ ءىس-شارالارى بويىنشا ۇيلەستىرۋشى مەملەكەتتىك ورگان بولادى», دەدى بەيبىت اتامقۇلوۆ.
