«ۋاكىل زاڭ جوباسىندا تاۋەلسىز جانە ەشبىر مەملەكەتتىك ورگان مەن لاۋازىمدى تۇلعالارعا ەسەپ بەرمەيتىن جاۋاپتى مەملەكەتتىك لاۋازىمدى يەلەنەتىن تۇلعا رەتىندە ايقىندالادى. ادام قۇقىقتارى جونىندەگى ۋاكىلگە ونىڭ قىلمىستىق جاۋاپتىلىعىنا نەمەسە اكىمشىلىك جاۋاپكەرشىلىگىنە قول سۇعىلماۋشىلىق مارتەبەسى بەرىلەدى جانە كۋاگەرلىك ايعاقتار بەرۋدەن بوساتىلادى.
ومبۋدسمەننىڭ زاڭدى قىزمەتىنە ارالاسۋعا نە كەدەرگى كەلتىرۋگە تىيىم سالىنادى. ادام قۇقىقتارى جونىندەگى ۋاكىلگە كەلسەك, ونىڭ قىزمەتىنە قاتىستى كەلەسى وزىندىك تالاپتار مەن شەكتەۋلەر كوزدەلەدى: ساياسي قىزمەتپەن اينالىسۋعا, مەملەكەتتىك قىزمەتتە بولۋعا, ساياسي پارتيالارعا قاتىسۋعا تىيىم سالۋ جانە تاعى دا باسقا», دەدى جوعارعى پالاتانىڭ جالپى وتىرىسىندا سەنات توراعاسىنىڭ ورىنباسارى اسقار شاكىروۆ.
ونىڭ اتاپ وتۋىنشە, ومبۋدسمەننىڭ وكىلەتتىكتەرى ايتارلىقتاي كەڭەيەدى.
«ۋاكىل مىناداي قۇقىقتارعا يە: پرەزيدەنتكە, پارلامەنت پەن ۇكىمەتكە ادام مەن ازاماتتىڭ قۇقىقتارى مەن بوستاندىقتارىن كوتەرمەلەۋ جانە قورعاۋ ماسەلەلەرى بويىنشا قازاقستان رەسپۋبليكاسىنىڭ زاڭ جوبالارىن ازىرلەۋ, زاڭناماسىن جەتىلدىرۋ جونىندە ۇسىنىستار ەنگىزۋ; شاقىرىلعان جاعدايدا پارلامەنت پالاتالارىنىڭ, ۇكىمەتتىڭ, كونستيتۋتسيالىق كەڭەستىڭ, مەملەكەتتىك ورگانداردا قۇرىلعان القالىق جانە باسقا دا ورگانداردىڭ, سونداي-اق ءماسليحاتتاردىڭ وتىرىستارىنا قاتىسۋعا; ادامنىڭ جانە ازاماتتىڭ قۇقىقتارى مەن بوستاندىقتارىن بۇزعان ادامعا قاتىستى تارتىپتىك نەمەسە اكىمشىلىك ءىس جۇرگىزۋ نە قىلمىستىق ءىستى جۇزەگە اسىرۋ تۋرالى وتىنىشحاتپەن مەملەكەتتىك ورگاندارعا نەمەسە لاۋازىمدى ادامدارعا جۇگىنۋگە; مەملەكەتتىك اپپاراتتىڭ شەشىمدەرىمەن نەمەسە ارەكەتتەرىمەن (ارەكەتسىزدىگىمەن) بۇزىلعان شەكتەلمەگەن ادامدار توبىنىڭ قۇقىقتارى مەن بوستاندىقتارىن قورعاۋ ءۇشىن تالاپ ارىزبەن (تالاپ قويۋمەن) سوتقا جۇگىنۋگە جانە باسقالار. مۇنداي شارالار ءسوزسىز ومبۋدسمەن ينستيتۋتىن نىعايتادى», دەدى سەنات توراعاسىنىڭ ورىنباسارى.
تالقىلاۋ بارىسىندا سەنات دەپۋتاتتارى زاڭ جوباسىنا تۇزەتۋلەر ەنگىزىپ, ماجىلىسكە قايتاردى.
