جالپى, «تۇركى الەمى» فەستيۆالىن العاش ۇيىمداستىرىپ, ءجون-جوسىعىن كورسەتىپ جولعا قويىپ كەتكەن تالانتتى كۇيشى, قوستانايداعى قازاق وركەسترىن قۇرىپ, قالىپتاستىرعان مارقۇم نازىمبەك مولداحمەتوۆ ەدى. بيىلعى فەستيۆالدىڭ شىمىلدىعىن دا وبلىستىق فيلارمونيانىڭ نازىمبەك مولداحمەتوۆ اتىنداعى حالىق اسپاپتار وركەسترى اشتى.
قوستانايلىق كورەرمەندەر ەكى كۇن قاتارىنان قازاق حالقىنىڭ ءداستۇرلى مۋزىكالىق ونەرىن, كونە ساز اسپاپتارىن زاماناۋي باعىتتا قايتا جاڭعىرتىپ, كەڭىنەن ناسيحاتتاپ جۇرگەن «تۇران» فولكلورلىق-ەتنوگرافيالىق ءانسامبلى, باۋىرلاس باشقۇرت ەلىنەن كەلگەن «رەسپۋبليكا» وتباسىلىق ءانسامبلى, تاشكەنتتەن كەلگەن «نيليۋفار» توبى, بىشكەك قالاسىنىڭ «اكاك» ءانسامبلى, ىستانبۇلداعى تۇرىك مۋزىكاسى مەملەكەتتىك كونسەرۆاتورياسىنىڭ ۇستازى, وپەرا ءانشىسى گيۋلارام بالتاەۆا, وسى ءبىلىم وشاعىنىڭ پروفەسسورى, كاۆالشى جيحان يۋرتچۋنىڭ ونەرىن تاماشالادى.
گالا كونتسەرتتە قازاق, تۇرىكمەن, تۇرىك اندەرىن اۋەلەتكەن گيۋلارام بالتاەۆا دا كورەرمەن قاۋىمنىڭ ىستىق ىقىلاسىنا بولەندى. ال ۋفادان كەلگەن «رەسپۋبليكا» وتباسىلىق ءانسامبلى «ورال تاۋلارى» اتتى يمپروۆيزاتسيالىق كومپوزيتسيانى تارتۋ ەتتى. توپ مۇشەسى لەيسان زەينەتدينوۆانىڭ ايتۋىنشا, وتباسىلىق انسامبل قۇرامىندا ءبارى ءبىر اۋلەتتەن تاراعان 74 ادام بار. انسامبل جەتەكشىسى, باشقۇرتستاننىڭ حالىق ءارتىسى مينديگافۋر زەينەتدينوۆ قوبىزبەن قازاق كۇيلەرىن تارتتى.
وزبەكستاننىڭ حالىق ءارتىسى فارۋح سادىكوۆ قوستاناي حالىق اسپاپتار وركەسترى ورىنداعان بىرنەشە تۋىندىعا ديريجەرلىك ەتتى. ونەرپازدىڭ ايتۋىنشا, «تۇركى الەمى» سياقتى ماڭىزدى حالىقارالىق شارالار باۋىرلاس حالىقتاردىڭ مادەني بايلانىسىن نىعايتا تۇسەدى.
فەستيۆالدىڭ اياعىنا تامان الەمنىڭ ءار تۇكپىرىنەن كەلگەن ونەر ۇجىمدارى بىرلەسىپ, قۇرمانعازىنىڭ «بالبىراۋىن» كۇيىن كۇمىرلەتتى.
قوستاناي وبلىسى
