Nur Otan پارتياسىنىڭ 2021-2025 جىلدارعا ارنالعان سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق جول كارتاسى بويىنشا قوستاناي وبلىسىندا 13 ۋچاسكەلىك جانە 5 مودۋلدىك پوليتسيا بەكەتىن اشۋ جوسپارلانعان. بيىل قاراسۋ جانە مەڭدىقارا اۋداندارىندا ەكى ۋچاسكەلىك پوليتسيا پۋنكتى اشىلعان بولاتىن. تاياۋدا قوستاناي اۋدانىنىڭ ورتالىعى – توبىل قالاسىنداعى «جاڭارۋ» ساياباعىندا تاعى ءبىر مودۋلدىك پوليتسيا بەكەتى جۇمىس ىستەي باستادى. شاعىن بەكەت ينتەرنەت جەلىسىمەن, بايلانىس قۇرىلعىلارىمەن, جۇمىسقا قاجەتتى جيھاز, كومپيۋتەرلىك تەحنيكامەن, سونداي-اق كوممۋنيكاتسيا جانە قاۋىپسىزدىك جۇيەلەرىمەن جابدىقتالعان.
جاڭا بەكەتتىڭ اشىلۋ راسىمىندە وبلىستىق پوليتسيا دەپارتامەنتى باستىعىنىڭ مىندەتىن اتقارۋشى قايرات دۇيسەمبەكوۆ «جۇرتقا جاقىن پوليتسيا» قاعيداتىنىڭ ءمان-ماڭىزىن تارقاتا كەلىپ, مۇنداي زاماناۋي بەكەتتەر بۇگىندە ەلىمىزدىڭ باسقا وڭىرلەرىنە دە ورناتىلىپ, ءتيىمدى جۇمىس ىستەپ جاتقانىن, مودۋلدىك پوليتسيا بەكەتتەرى جۇمىس ىستەيتىن اۋدانداردا قىلمىس دەڭگەيى تومەندەپ, ادام قۇقىعىن بۇزۋ دەرەكتەرىنىڭ ايتارلىقتاي ازايعانىن ايتتى.
قوستاناي اۋدانى اكىمىنىڭ ورىنباسارى قايرات قاسقاباەۆتىڭ ايتۋىنشا, توبىل قالاسىنداعى مودۋلدىك پوليتسيا بەكەتىنىڭ قۇرىلىسىنا قاجەت 10 ملن تەڭگە قارجى اۋداندىق بيۋدجەتتەن بولىنگەن.
– ءوز باسىم جۇرتقا جاقىن پوليتسيا دەگەندى وقىس جاعدايعا تاپ بولعان تۇرعىندارعا كەز كەلگەن ۋاقىتتا, كەز كەلگەن جەردە دەر كەزىندە كومەككە كەلە الاتىن پوليتسيا دەپ تۇسىنەمىن. حالىق كوپ جينالاتىن ورتالىق ساياباقتا جۇمىس ىستەي باستاعان مودۋلدىك پوليتسيا بەكەتى قانداي دا ءبىر جاعدايدا ازاماتتارعا جەدەل كومەك كورسەتىپ, حالىق قولداۋىنا يە بولادى عوي دەپ ويلايمىن. پرەزيدەنت پوليتسيادان حالىقپەن ەتەنە جاقىن بولۋدى تالاپ ەتىپ وتىر. پوليتسيانىڭ سەرۆيستىك جۇمىس ۇلگىسىنە كوشۋى وسى ماقساتتا جۇزەگە اسىرىلىپ جاتىر. بۇل قالا تۇرعىندارىنىڭ قاۋىپسىزدىگىن ارتتىرا تۇسەدى, – دەدى اكىم ورىنباسارى.
جەرگىلىكتى پوليتسيا باسقارماسىنىڭ باسشىسى قۇرمەت ماجىكەنوۆتىڭ ايتۋىنشا, مودۋلدىك پوليتسيا بەكەتى جىلجىمالى تۇردە جۇمىس ىستەيتىندىكتەن, الداعى ۋاقىتتا كوممۋنالدىق جۇيەدەن اجىراتىلىپ, قىلمىس دەڭگەيى ءوسىپ بارا جاتقان وزگە دە اۋداندارعا كوشىرىلۋى مۇمكىن. بەكەتتە تاۋلىك بويى ۋچاسكەلىك پوليتسيا ينسپەكتورلارى مەن پاترۋلدىك پوليتسيا قىزمەتكەرلەرى قىزمەت اتقارىپ, تۇرعىنداردىڭ جەكە ارىز-شاعىمدارىن قابىلدايتىن بولادى.
قوستاناي وبلىسى,
توبىل قالاسى
