رەسەي پرەزيدەنتى ۆلاديمير پۋتينء وزىنىڭ جەدەلحاتىندا مەملەكەت باسشىسىن تاۋەلسىزدىك كۇنىمەن شىن جۇرەكتەن قۇتتىقتاپ, قازاقستاننىڭ ەكونوميكالىق, الەۋمەتتىك, عىلىمي-تەحنيكالىق جانە باسقا دا كوپتەگەن سالاداعى قول جەتكىزگەن تابىستارىن اتاپ وتكەن. رەسەي پرەزيدەنتى ەلىمىزدىڭ الەمدىك ارەناداعى جوعارى بەدەلىنە ەرەكشە توقتالعان.
«مەملەكەتتەرىمىز اراسىنداعى قارىم-قاتىناستار ستراتەگيالىق سەرىكتەستىك پەن وداقتاستىق نەگىزدە قارقىندى دامىپ كەلەدى. ءتۇرلى سالاداعى ەكىجاقتى ىنتىماقتاستىق, سونداي-اق ەاەو, ۇقشۇ, تمد, شىۇ, بۇۇ سياقتى حالىقارالىق قۇرىلىمدار اياسىنداعى ءوزارا ءىس-قيمىلدارىمىز ءوز ناتيجەسىن بەرۋدە. بىرلەسكەن كۇش-جىگەر ارقىلى ءبىز دوستاس حالىقتارىمىزدىڭ يگىلىگى جولىندا, سونداي-اق ەۋرازيا قۇرلىعىنداعى تۇراقتىلىق پەن قاۋىپسىزدىكتى قامتاماسىز ەتۋ ءۇشىن رەسەي مەن قازاقستان اراسىنداعى بايلانىستاردى دايەكتى تۇردە دامىتاتىنىمىزعا سەنىمدىمىن», دەلىنگەن ۆلاديمير ءپۋتيننىڭ جەدەلحاتىندا.
قحر توراعاسى سي تسزينپينء وزىنىڭ قۇتتىقتاۋىندا تاۋەلسىزدىكتىڭ 30 جىلى ىشىندە قازاقستان مەملەكەتتىڭ مۇلدە جاڭا كەلبەتىن قالىپتاستىرعانىن, الەمدەگى وزىق دامىعان 30 ەلدىڭ قاتارىنا كىرۋ ءۇشىن نىق قادام باسىپ كەلە جاتقانىن جازعان.
«مەن قىتاي-قازاقستان قارىم-قاتىناستارىنىڭ دامۋىنا ەرەكشە ءمان بەرەمىن. سىزبەن بىرگە قىتاي مەن قازاقستان اراسىنداعى ءداستۇرلى دوستىقتى نىعايتۋعا, ەكى ەلدىڭ ستراتەگيالارىن ۇشتاستىرۋعا, ماڭگى جان-جاقتى ستراتەگيالىق ارىپتەستىك قاتىناستاردى ەكى مەملەكەتتىڭ جانە ولاردىڭ حالىقتارىنىڭ يگىلىگى ءۇشىن جاڭا دەڭگەيگە كوتەرۋگە دايىنمىن», دەلىنگەن جەدەلحاتتا.
اقش پرەزيدەنتى دجوزەف بايدەن قاسىم-جومارت توقاەۆتى جانە قازاقستان حالقىن تاۋەلسىزدىكتىڭ 30 جىلدىعىمەن قۇتتىقتاپ, قازاقستاننىڭ ورتالىق ازيادا جانە جاھاندىق دەڭگەيدە بەيبىتشىلىك پەن تۇراقتىلىقتى ساقتاۋ جانە ونى وركەندەتۋ جولىنداعى وتىز جىلدىق كوشباسشىلىعىن اتاپ ءوتۋ مەرەكەسىنە تىلەكتەستىك ءبىلدىردى.
«قۇراما شتاتتارى قازاقستانمەن اراداعى ستراتەگيالىق سەرىكتەستىكتى نىعايتۋعا, ايماقتىق تۇراقتىلىققا ۇلەس قوسۋ ماقساتىمەن ىنتىماقتاستىقتى دامىتۋعا, كليماتتىق داعدارىستى ەڭسەرۋگە, دەموكراتيالىق ينستيتۋتتاردىڭ تيىمدىلىگىن ارتتىرۋعا جانە ادام قۇقىقتارىن قۇرمەتتەۋگە باعىتتالعان ىقپالداستىقتى ىلگەرىلەتۋگە نيەتتى», دەلىنگەن امەريكا باسشىسىنىڭ جەدەلحاتىندا.
وزبەكستان پرەزيدەنتى شاۆكات ميرزيوەۆ قازاقستاندا جۇرگىزىلىپ جاتقان جۇيەلى ءارى اۋقىمدى رەفورمالاردى, سونداي-اق قاسىم-جومارت توقاەۆ ۇسىنعان ايماقتىق جانە جاھاندىق ماڭىزى بار باستامالاردى جوعارى باعالادى.
«وسىناۋ زور جەتىستىكتەرگە مەملەكەت باسشىسى رەتىندە ءسىزدىڭ ءتيىمدى قىزمەتىڭىز بەن باي تاجىريبەڭىزگە سۇيەنە وتىرىپ جۇرگىزگەن ساليقالى ساياساتىڭىز نەگىز بولدى. قۇرمەتتى قاسىم-جومارت كەمەل ۇلى, تاۋەلسىزدىكتىڭ 30 جىلدىعىن سالتاناتتى تۇردە اتاپ ءوتىپ جاتقان قازاقستان حالقىنىڭ قۋانىشىنا بۇكىل وزبەكستان حالقى شىنايى تۇردە ورتاقتاساتىنىن ايتقىم كەلەدى», دەلىنگەن جەدەلحاتتا.
قىرعىزستان پرەزيدەنتى سادىر جاپاروۆ ەلىمىزدىڭ تاۋەلسىزدىك جىلدارىندا ساياسي, ەكونوميكالىق جانە الەۋمەتتىك سالالارداعى, سونداي-اق سىرتقى ساياساتتاعى قول جەتكىزگەن كەرەمەت جەتىستىكتەرى مەن اۋقىمدى رەفورمالارىنىڭ ارقاسىندا الەمدىك قوعامداستىقتا سالماقتى ورىنعا يە بولعانىن اتاپ وتكەن.
«تاريحي بەرىك دوستىق بايلانىستارعا نەگىزدەلگەن قىرعىز-قازاق قاتىناستارى الداعى ۋاقىتتا دا حالىقتارىمىزدىڭ مۇددەسى ءۇشىن نىعايىپ دامي بەرەتىنىنە سەنىمدىمىن. قازىرگى ۋاقىتتا قارىم-قاتىناستارىمىز وداقتاستىق جانە ستراتەگيالىق سەرىكتەستىك رۋحىنا تولىق ساي كەلەدى. ءبىز ءوزارا كۇش جۇمىلدىرا وتىرىپ, بارلىق قول جەتكىزىلگەن ۋاعدالاستىقتاردى, بارلىق باعىت بويىنشا العا قويعان ماقسات-مىندەتتەرىمىزدى جۇزەگە اسىراتىنىمىزعا سەنىمدىمىن», دەلىنگەن قىرعىزستان پرەزيدەنتىنىڭ جەدەلحاتىندا.
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوز قۇتتىقتاۋىندا قازاقستاننىڭ ساياساتتا, ەكونوميكادا جانە الەۋمەتتىك-گۋمانيتارلىق سالالاردا ۇلكەن جەتىستىكتەرگە قول جەتكىزگەنىن جانە الەمدىك ارەنادا العا قاراي نىق قادام باسىپ كەلە جاتقانىن اتاپ وتكەن.
«تۇرىكمەنستان مەن قازاقستان اراسىنداعى تاتۋ كورشىلىك, دوستىق جانە ءوزارا تۇسىنىستىك قاعيداتتارىنا نەگىزدەلگەن باۋىرلاستىق قاتىناستار حالىقتارىمىزدىڭ جارقىن بولاشاعى جولىندا قارقىندى دامي بەرەتىنىنە سەنىمدىمىن», دەلىنگەن تۇرىكمەنستان پرەزيدەنتىنىڭ قۇتتىقتاۋىندا.
تاجىكستان پرەزيدەنتى ەمومالي راحمون قازاقستاننىڭ مەملەكەتتىلىكتى قالىپتاستىرۋداعى, الەۋمەتتىك-ەكونوميكالىق جانە قوعامدىق-ساياسي دامۋ ىسىندەگى جەتىستىكتەرىن, سونداي-اق حالىقارالىق ارەناداعى بەدەلىن جوعارى باعالاعان.
ء«بىز تاجىكستان مەن قازاقستاننىڭ ستراتەگيالىق سەرىكتەستىگىن نىعايتۋعا جانە كوپعاسىرلىق دوستىق ارقاۋىن جان-جاقتى بەكەمدەۋگە, مەملەكەتتەرىمىز اراسىنداعى ءوزارا تۇسىنىستىك پەن قولداۋعا باسا ءمان بەرەمىز. ءبىز كۇش جۇمىلدىرا وتىرىپ, حالىقتارىمىزدىڭ يگىلىگى ءۇشىن ەكى ەلدىڭ كوپجوسپارلى مەملەكەتارالىق ىنتىماقتاستىعىن ىلگەرىلەتە بەرەتىنىمىزگە سەنىم بىلدىرەمىن», دەلىنگەن تاجىكستان پرەزيدەنتىنىڭ قۇتتىقتاۋىندا.
بەلارۋس پرەزيدەنتى الەكساندر لۋكاشەنكو ەلىمىزدىڭ تاريحي ولشەممەن العاندا قىسقا مەرزىم ىشىندە زور جەتىستىكتەرگە قول جەتكىزگەنىن, بارلىق ەتنوس وكىلدەرى اراسىندا توزىمدىلىكتى, دىنارالىق جانە مادەنيەتارالىق كەلىسىمدى قامتاماسىز ەتۋدىڭ جارقىن ۇلگىسىن پاش ەتكەنىن اتاپ وتكەن.
«قازاقستان سەنىمدى تۇردە زاماناۋي جانە باسەكەگە قابىلەتتى مەملەكەت قالىپتاستىرۋدا. مينسك مەن نۇر-سۇلتان اراسىنداعى ءوزارا سەنىم مەن قۇرمەتكە نەگىزدەلگەن ستراتەگيالىق وداقتاستىق قاتىناستاردىڭ ودان ءارى كەڭەيىپ, جاڭا جاسامپاز جوبالارمەن تولىعا بەرەتىنىنە سەنىمدىمىن», دەلىنگەن بەلارۋس باسشىسىنىڭ جەدەلحاتىندا.
فرانتسيا پرەزيدەنتى ەممانۋەل ماكرونء وز قۇتتىقتاۋىندا قاسىم-جومارت توقاەۆتى جانە دوستاس قازاقستان حالقىن شىن جۇرەكتەن قۇتتىقتاپ, باق-بەرەكە تىلەگەن. فرانتسۋز كوشباسشىسى فرانتسيا مەن قازاقستان اراسىنداعى ستراتەگيالىق سەرىكتەستىكتىڭ قارقىندى دامىپ كەلە جاتقانىن اتاپ وتكەن. سونىمەن قاتار ول تەحنولوگيالىق يننوۆاتسيا, ەنەرگەتيكا, «جاسىل» ەكونوميكالىق ءوسىم مەن ورنىقتىلىقتى ىلگەرىلەتۋ, كولىك جانە تاۋ-كەن ونەركاسىبى, دەنساۋلىق ساقتاۋ, مادەني-گۋمانيتارلىق ىنتىماقتاستىق سالالارىنداعى ەكىجاقتى ىقپالداستىقتى نىعايتۋ ءۇشىن زور مۇمكىندىك بار ەكەنىنە نازار اۋدارعان.
«ەگەر ءسىزدىڭ تىعىز جۇمىس كەستەڭىز مۇمكىندىك بەرەتىن بولسا, ەكىجاقتى كۇن تارتىبىندەگى ماڭىزدى ماسەلەلەردىڭ ءبارىن جان-جاقتى تالقىلاۋ ءۇشىن وزىڭىزبەن پاريجدە كەزدەسۋگە قۋانىشتى بولار ەدىم», دەپ جازعان ەممانۋەل ماكرون.
گەرمانيا پرەزيدەنتى فرانك-ۆالتەر شتاينمايەر دە ءوزىنىڭ جۇرەكجاردى قۇتتىقتاۋىن جولداعان.
«كوروناۆيرۋس پاندەمياسى ءوزارا بايلانىستارىمىزدى شەكتەسە دە, ەلدەرىمىز وتكەن جىلى تۇراقتى جانە جەمىستى قارىم-قاتىناستاردى جالعاستىردى. اۋعانستانداعى جۋىردا بولعان وقيعالار جانە كۇننەن كۇنگە كۇشەيىپ جاتقان كليماتتىق وزگەرىستەردىڭ اسەرى سىزدەردىڭ ايماققا جاڭا ءارى كۇردەلى مىندەت جۇكتەپ وتىر. ءبىز مۇنى جاقسى سەزىنەمىز. گەرمانيا الداعى ۋاقىتتا وسى جانە باسقا دا سىن-قاتەرلەردى ءساتتى ەڭسەرۋدە جانە ءسىز قولداعان رەفورمالار باعىتىن جالعاستىرۋ جولىندا قازاقستاننىڭ سەنىمدى سەرىكتەسى بولىپ قالا بەرەدى», دەپ فرانك-ۆالتەر شتاينمايەر ءوزىنىڭ جەدەلحاتىندا اتاپ وتكەن.
قازاقستان تاۋەلسىزدىگىنىڭ 30 جىلدىعىنا وراي وزدەرىنىڭ قۇتتىقتاۋ جەدەلحاتتارىن ازەربايجان پرەزيدەنتى يلحام اليەۆ, ارمەنيا پرەزيدەنتى ارمەن ساركيسيان, گرۋزيا پرەزيدەنتى سالومە زۋرابيشۆيلي, ءباا پرەزيدەنتى حاليفا بەن زايد ءال ناحايان, ءباا ۆيتسە-پرەزيدەنتى, پرەمەر-ءمينيسترى, دۋباي امىرلىگىنىڭ بيلەۋشىسى مۋحاممەد بەن راشيد ءال ماكتۋم, ابۋ-ءدابيدىڭ تاق مۇراگەرى, ءباا قارۋلى كۇشتەرىنىڭ جوعارعى باس قولباسشىسىنىڭ ورىنباسارى مۋحاممەد بەن زايد ءال ناحايان, ساۋد ارابياسىنىڭ كورولى سالمان بەن ابدەلازيز ءال ساۋد جانە ساۋد ارابياسى كورولدىگىنىڭ تاق مۇراگەرى مۋحاممەد بەن سالمان بەن ابدەلازيز ءال ساۋد, يران پرەزيدەنتى يبراحيم رايسي, يسپانيا كورولى VI فەليپە, مالايزيا كورولى ءىى ابدۋللا, باحرەين كورولى حاماد بەن يسا ءال حاليفا, ماروككو كورولى VI مۋحاممەد, تايلاند كورولى ماحا ۆاچيرالونگكورن, سينگاپۋر پرەزيدەنتى حاليما ياكوب, فينليانديا پرەزيدەنتى ساۋلي نينيستيو, پولشا پرەزيدەنتى اندجەي دۋدا, اۆستريا پرەزيدەنتى الەكساندر ۆان دەر بەللەن, چەحيا پرەزيدەنتى ميلوش زەمان, ءۇندىستان پرەزيدەنتى رام نات كوۆيند, يزرايل پرەزيدەنتى يتسحاك گەرتسوگ, موڭعوليا پرەزيدەنتى ۋحنااگين حۇرەلسۇح, برازيليا پرەزيدەنتى جاير بولسونارۋ, رۋمىنيا پرەزيدەنتى كلاۋس ۆەرنەر يوحاننيس, لاتۆيا پرەزيدەنتى ەگيلس لەۆيتس, ەستونيا پرەزيدەنتى الار كاريس, سلوۆەنيا پرەزيدەنتى بورۋت پاحور, بانگلادەش پرەزيدەنتى موحاممەد ابدۋل حاميد, ۆەتنام پرەزيدەنتى نگۋەن سۋان فۋك, كۋبا پرەزيدەنتى ميگەل دياس-كانەل, پالەستينا پرەزيدەنتى ماحمۋد ابباس, سەررا-لەونە رەسپۋبليكاسىنىڭ پرەزيدەنتى دجۋليۋس ماادا بيو جولدادى.
سونىمەن قاتار قۇتتىقتاۋ جەدەلحاتتارىن شىۇ باس حاتشىسى ۆلاديمير نوروۆ, تمد اتقارۋشى كوميتەتىنىڭ توراعاسى – اتقارۋشى حاتشىسى سەرگەي لەبەدەۆ, ۇقشۇ باس حاتشىسى ستانيسلاۆ زاس, ەكونوميكالىق ىنتىماقتاستىق ۇيىمىنىڭ باس حاتشىسى حۋسراۆ نوزيري, ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو, ەسكاتو-نىڭ اتقارۋشى حاتشىسى ارميدا سالسيا اليسدجابانا, يسەسكو-نىڭ باس ديرەكتورى ساليم ءال-ماليك, ەۋروپاداعى قاۋىپسىزدىك جانە ىنتىماقتاستىق ۇيىمىنىڭ از ۇلتتار جونىندەگى جوعارعى كوميسسارى قايرات ءابدىراحمانوۆ, تۇركپا-نىڭ باس حاتشىسى مەحمەت سۋرەيا ەر, سونداي-اق ءباا پرەمەر-ءمينيسترىنىڭ ورىنباسارى, پرەزيدەنت ىستەرى جونىندەگى مينيستر مانسۋر بەن زايد ءال ناحايان, ءيزرايلدىڭ قارجى ءمينيسترى اۆيگدور ليبەرمان, پەنزا وبلىسىنىڭ گۋبەرناتورى ولەگ مەلنيچەنكو, م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ رەكتورى ۆيكتور سادوۆنيچي جولدادى.
قۇتتىقتاۋ جەدەلحاتتارى ءالى دە كەلىپ ءتۇسىپ جاتىر.
