تۇڭعىش پرەزيدەنتكە قاتىستى قۇندى جادىگەرلەردىڭ ءبىرازى تۋعان ولكەسى – جەتىسۋ جەرىندەگى بىرقاتار مۇراجايدا ساقتالعان. سونىڭ ىشىندە اقىن سەرىك قاليەۆ باسشىلىق ەتەتىن قاراساي اۋداندىق تاريحي-ولكەتانۋ مۋزەيى دە بار. رۋحاني ورتالىقتا نۇرسۇلتان ءابىش ۇلىنىڭ بالالىق شاعىنان, قىزمەتتىك جولىنان سىر شەرتەتىن زاتتارى تۇپنۇسقادا ناسيحاتتالۋدا. سولاردىڭ ءبىرى – تاپسىرىسپەن ارنايى دايىندالعان ەلباسى ن.نازارباەۆتىڭ قالامسابى. بۇل جازۋ قۇرالىن يتاليانىڭ Montegrappa فابريكاسى وندىرگەن. عالامتوردىڭ دەرەگىنە سۇيەنسەك, مۇنداي قالامساپتار ونى تاڭداعان ادامنىڭ ءستيلىن كورسەتەدى. بالكىم, تۇڭعىش پرەزيدەنتتىڭ قولىنا ءتۇسۋى دە بەكەر ەمەس شىعار. جالپى, اتالعان فيرمانىڭ قالامساپتارى وتە قىمبات بولىپ سانالادى. ءارى ونى دۇنيە ءجۇزىنىڭ ەڭ بەدەلدى ادامدارى, ياعني, ساياحاتشىلار, انشىلەر, كاسىپكەرلەر, سپورتشىلار جانە تاعى باسقا بىلىكتى باسشىلار قولدانادى.
قاراساي اۋداندىق تاريحي-ولكەتانۋ مۋزەيىنىڭ باس قور ساقتاۋشىسى گۇلجان ايانباەۆانىڭ ايتۋىنشا, ورتالىققا كەلۋشىلەردىڭ كوبىسى جەرلەسىمىز نۇرسۇلتان ءابىش ۇلىنىڭ زاتتارىنا كوپ قىزىعۋشىلىق تانىتادى. ولاردىڭ اراسىندا ەرەكشە كوزگە تۇسەتىنى دە وسى قالامساپ ەكەن.
Montegrappa كومپانياسىنىڭ ەلباسى ءۇشىن دايىنداعان قالامسابىندا ۇلتتىق قۇندىلىققا قاتىستى نارسەلەر بارىنشا قامتىلعان. جازۋ قۇرالىنىڭ تومەنگى جاعىندا قازاقستاننىڭ گەوگرافيالىق كارتاسى ورنالاستىرىلعان بولسا, جوعارعى بولىگىندە مەملەكەتىمىزدىڭ ەلتاڭباسى بەينەلەنگەن. ال قالپاعىنىڭ ءدال توبەسىنەن تۋىمىزدى بايقاۋعا بولادى. سونداي-اق ونىڭ بەتكى ساقيناسىندا قازاقستاننىڭ تۇڭعىش پرەزيدەنتى ن.ءا.نازارباەۆتىڭ تالاي قۇجاتتارعا قويعان قولىنىڭ كورىنىسى كورسەتىلگەن. قالامساپتىڭ قالپاعىمەن قوسقانداعى جالپى ۇزىندىعى – 14 سانتيمەتر.
رۋحاني ورتالىقتىڭ ەرەكشە جادىگەرى بولىپ سانالاتىن جازۋ قۇرالى ەستەلىك قوراپقا سالىنعان. ەلباسىمىز وسى قالامساپپەن كەزىندە مەملەكەتتىك ماڭىزى بار قۇجاتتارعا قول قويىپ, ءتىپتى, كەزدەسۋلەردە ءوزىنىڭ جىلى لەبىزدەرىن جازعان ەكەن.
ديدار مالىك ۇلى
الماتى وبلىسى,
قاراساي اۋدانى
