سالتاناتتى شارا ەكى بولىمنەن تۇردى: رەسمي جانە مەرەكەلىك كونتسەرت.
رەسمي ءبولىمدى سارىارقا اۋدانىنىڭ اكىمى ەسەت بايكەن اشتى. ول اۋداننىڭ دامۋى تۋرالى ايتىپ, ەلوردالىقتاردى الداعى مەرەكەمەن قۇتتىقتادى.
«تاۋەلسىزدىك – حالقىمىزدىڭ باستى قۇندىلىعى. ەگەمەندىكتىڭ 30 جىلى ىشىندە ەلىمىز بارلىق قيىندىقتاردى ەڭسەرىپ, حالىقارالىق ارەناعا شىقتى. تاۋەلسىزدىگىمىزدىڭ جارقىن جەتىستىكتەرىنىڭ ءبىرى – ەلوردا. سارىارقا اۋدانى ەلوردانىڭ قالىپتاسۋىنا كۋا بولدى. ارقايسىڭىز ەلىمىزدىڭ يگىلىگى ءۇشىن ەڭبەك ەتىپ كەلەسىزدەر! بارشا قازاقستاندىقتى تاۋەلسىزدىك كۇنىمەن قۇتتىقتايمىن!», دەدى ەسەت بايكەن.
ءوز كەزەگىندە, قالالىق ءماسليحاتتىڭ حاتشىسى ەرلان كاناليموۆ جۇمىسىن سول كەزدە حالىق ەڭ كوپ قونىستانعان سارىارقا اۋدانىندا باستاعانىن اتاپ ءوتتى.
«30 جىل ىشىندە ەلىمىزدە ۇلكەن وزگەرىستەر بولدى. ەلباسىنىڭ ۇستانعان ساياساتىنىڭ ارقاسىندا اينالامىزداعى كورشىلەرمەن كەلىسسوزدەر جۇرگىزىلىپ, مەملەكەتتىك شەكارامىز شەگەندەلدى, الەۋمەتتىك-ەكونوميكالىق, دەموگرافيالىق, ەكولوگيالىق رەفورمالار جاسالدى. ەلباسىنىڭ ەڭ ۇلى شەشىمدەرىنىڭ ءبىرى – استانانى اقمولاعا كوشىرۋ. ول كەزدە شاعىن پروۆينتسيالىق قالادا نەبارى 150 مىڭ تۇرعىن بولاتىن. مەن ءوز قىزمەتىمدى 2002 جىلى سارىارقا اۋدانىندا باستادىم. ول كەزدە ەكى اۋداننىڭ ىشىندە سارىارقانىڭ تۇرعىنى كوپ بولدى. قازىر قالامىزدا 4 اۋدان بار. قالا ءوسىپ كەلەدى, ۇيلەر سالىنىپ جاتىر, ال مۇنىڭ ءبارى اتقارىلعان ەڭبەكتىڭ ارقاسىندا. مەن استانامىزدىڭ جانە بۇكىل ەلدىڭ يگىلىگى ءۇشىن ەڭبەك ەتكەن جاندارعا العىسىمدى بىلدىرگىم كەلەدى. ەلوردامىز بۇكىل رەسپۋبليكا دامۋىنىڭ لوكوموتيۆىنە اينالدى. ەلىمىزدىڭ ءاربىر تۇرعىنىنا اشىق اسپان, مىقتى دەنساۋلىق, باق-بەرەكە تىلەيمىن! ءاربىر جانۇيادا اماندىق بولسىن, ال ەلىمىز ودان ءارى وركەندەي بەرسىن!» - دەدى ەرلان كاناليموۆ.
سونىمەن قاتار, نۇر-سۇلتان قالاسىنىڭ قوعامدىق كەڭەسىنىڭ توراعاسى سانسىزباي ەسىلوۆ ەلوردالىق ارداگەرلەرگە قالانىڭ قالىپتاسۋى مەن دامۋىنا قوسقان ۇلەسى ءۇشىن العىس ءبىلدىردى.
«تاۋەلسىزدىك كۇنى – حالقىمىز ءۇشىن ەڭ باستى مەرەكە. بۇل كۇندى اتا-بابامىز ۇزاق ۋاقىت بويى كۇتكەن. سارىارقا اۋدانى قالانىڭ تاريحي بولىگىن ساقتاپ قالدى. مەنىڭ بۇكىل ءومىرىم وسى قالامەن جانە سارىارقا اۋدانىمەن تىكەلەي بايلانىستى. بۇگىنگى باسقوسۋىمىزعا قالا يگىلىگى ءۇشىن ۇزاق ۋاقىت ەڭبەك ەتكەن ارداگەرلەرىمىز قاتىسىپ وتىر. ەلوردامىزدىڭ نەگىزىن قالاعان ارداگەرلەرگە العىسىمدى بىلدىرگىم كەلەدى. جاستارعا ايتارىم: تاۋەلسىزدىگىمىزدى قادىرلەڭىزدەر. ەڭ الدىمەن, ەڭبەك ەتىڭىز, ال قاجەت بولسا, ەگەمەندىگىمىزدى قورعاڭىزدار», دەپ اتاپ ءوتتى ول.
رەسمي ءبولىم بارىسىندا سارىارقا اۋدانىنىڭ تۇرعىندارىن اۋداننىڭ نەمەسە قالانىڭ عانا ەمەس, ەلدىڭ دامۋىنا قوسقان ۇلەسى ءۇشىن ماراپاتتاۋ ءراسىمى ءوتتى.
قر پرەزيدەنتىنىڭ جارلىعىمەن «قازاقستان تاۋەلسىزدىگىنە 30 جىل» توسبەلگىسىن 12 ادام, «حالىق العىسى» مەدالىن 8 ادام تاقتى. قالا اكىمى مەن اۋدان اكىمىنىڭ العىس حاتتارى قالامىزدىڭ 40 تۇرعىنىنا تاپسىرىلدى, ولاردىڭ اراسىندا قوعام قايراتكەرلەرى, بەلسەندى قالا تۇرعىندارى, ارداگەرلەر, الەۋمەتتىك ماڭىزى بار ماماندىق يەلەرى بار. سول سياقتى «التىن القا» جانە «كۇمىس القا» ءتوس بەلگىلەرىمەن ماراپاتتالعان اۋداننىڭ كوپبالالى انالارى دا نازاردان تىس قالعان جوق.
سالتاناتتى شارا قازاقستاندىق ەسترادا جۇلدىزدارى مەن نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ مەرەكەلىك كونتسەرتىمەن جالعاستى.
