پرەزيدەنت قۇتتىقتاۋىن قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ وقىپ بەردى.
«قۇرمەتتى جيىن قاتىسۋشىلارى, سىزدەردى م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستان فيليالىنىڭ 20 جىلدىعىمەن قۇتتىقتايمىن. ايتۋلى مەرەيتوي حالقىمىز ءۇشىن تاريحي ماڭىزى بار تاۋەلسىزدىكتىڭ 30 جىلدىعىمەن تۇسپا-تۇس كەلىپ وتىر. زاماناۋي ءبىلىم بەرۋ جۇيەسىنىڭ تيىمدىلىگى ءبىز ءجۇرىپ وتكەن ۇلكەن جولدىڭ باستى جەتىستىكتەرىنىڭ ءبىرى بولدى. ممۋ فيليالى ەكى مىڭنان استام جوعارى بىلىكتى مامانداردى دايارلاپ, وتاندىق ەكونوميكانىڭ, ءبىلىم مەن عىلىمنىڭ قالىپتاسۋى مەن دامۋىنا ەلەۋلى ۇلەس قوستى. فيليال قىزمەتى قازاقستان مەن رەسەيدىڭ جەمىستى گۋمانيتارلىق ىنتىماقتاستىعىنىڭ جارقىن ۇلگىسى بولىپ سانالادى», دەيدى پرەزيدەنت.
مەملەكەت باسشىسى ەل ۇكىمەتى م. ۆ. لومونوسوۆ اتىنداعى ممۋ فيليالىنا جاڭا عيمارات بەرۋدى ۇيعارعانىن اتاپ ءوتتى.
«مەنىڭ تاپسىرماممەن ۇكىمەت فيليالعا اۋدانى 13 مىڭ شارشى مەتردەن استام عيمارات بولەتىنىن اتاپ وتكەن ءجون جانە قازاقستان ءۇشىن باسىم ماماندىقتار بويىنشا جوعارى بىلىكتى كادرلار دايارلاۋ ءۇشىن ءتىزىم كەڭەيتىلەدى دەپ ۇمىتتەنەمىن. بۇل وقۋ ورنى قوس ەل اراسىنداعى دوستىق پەن سەرىكتەستىكتى ودان ءارى نىعايتۋعا, قازاقستاندىق ءبىلىم بەرۋدىڭ ساپاسى مەن باسەكەگە قابىلەتتىلىگىن ارتتىرۋعا ىقپال ەتەرىنە سەنىمدىمىن. سالتاناتتى جيىنعا قاتىسۋشىلارعا شىعارماشىلىق تابىس, دەنساۋلىق جانە اماندىق تىلەيمىن!», دەدى پرەزيدەنت قاسىم-جومارت توقاەۆ.
ايتا كەتەيىك, م. ۆ. لومونوسوۆ اتىنداعى ممۋ قازاقستان فيليالى قر تۇڭعىش پرەزيدەنتى - ەلباسى نۇرسۇلتان نازارباەۆتىڭ باستاماسىمەن جانە رف پرەزيدەنتى ۆلاديمير ءپۋتيننىڭ قولداۋىمەن قۇرىلعان. 2000 جىلعى 9 قازاندا رەسەي فەدەراتسياسىنىڭ پرەزيدەنتى ۆ.ۆ. ءپۋتيننىڭ قازاقستان رەسپۋبليكاسىنا جاساعان مەملەكەتتىك ساپارىندا ممۋ رەكتورى, اكادەميك ۆ.ا. سادوۆنيچي مەن قر ءبىلىم جانە عىلىم ءمينيسترى ق.ە.كوشەرباەۆ استانا قالاسىندا ل.ن.گۋميلەۆ اتىنداعى ەۋرازيالىق ۇلتتىق ۋنيۆەرسيتەتتىڭ بازاسىندا م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستان فيليالىن قۇرۋ تۋرالى حاتتاماعا قول قويعان بولاتىن.
