پاندەمياعا بايلانىستى شەكتەۋلەرگە وراي, جىلدىڭ سپورتتىق وقيعالارىن قورىتىندىلاعان ءىس-شارا ەلىمىزدىڭ ءۇش قالاسى – نۇر-سۇلتان, الماتى جانە تۇركىستاننان ونلاين كورسەتىلىم ارقىلى ءبىر مەزگىلدە ءوتتى.
سالتاناتتى جيىندا ءسوز العان پرەمەر-مينيستر اسقار مامين قازاقستان تاۋەلسىزدىگىنىڭ 30 جىلدىعىمەن قۇتتىقتاپ, مەملەكەت سپورتشىلارعا ءاردايىم قولداۋ كورسەتەتىنىن ايتسا, پرەمەر-ءمينيستردىڭ ورىنباسارى ەرالى توعجانوۆ ەل نامىسىن قورعاپ جۇرگەن سپورتشىلارعا العىسىن جەتكىزدى. ال مادەنيەت جانە سپورت ءمينيسترى اقتوتى رايىمقۇلوۆا ەگەمەندىك العالى ەلىمىزدە بىرنەشە سپورت نىسانى پايدالانۋعا بەرىلگەنىن, سول سپورت كەشەندەرىنەن بولاشاق وليمپيادا چەمپيوندارى شىعاتىنىنا سەنىمدى ەكەنىن جانە وسىنداي جەتىستىككە تاۋەلسىزدىكتىڭ ارقاسىندا قول جەتكىزىلىپ وتىرعانىن ايتتى. ۇوك باسشىسى تيمۋر ق ۇلىباەۆ سپورتشىلاردىڭ تابىسى مەن جەڭىسىن ماقتان ەتەتىنىن, ولاردىڭ جەتىستىگى جاس ۇرپاققا ۇلگى بولاتىنىن اتاپ كورسەتتى.
سونىمەن, ەلىمىزدىڭ تۇكپىر-تۇكپىرىنەن جانكۇيەرلەر 22 قاراشا مەن 6 جەلتوقسان ارالىعىندا وزدەرىنىڭ سۇيىكتى سپورتشىلارىن Olympic.kz سايتىندا داۋىس بەرۋ ارقىلى انىقتادى.
«ۇزدىك سپورتشى» جانە «ۇزدىك سپورتشى قىز» اتالىمىندا قىسقى جانە جازعى سپورت تۇرلەرىنەن ءتورت جەڭىمپاز تاڭدالدى. توكيو-2020 وليمپياداسىنىڭ قولا جۇلدەگەرى, الەم چەمپيونى ساكەن بيبوسىنوۆ, كاراتەدەن توكيو-2020 وليمپياداسىنىڭ جانە الەم چەمپيوناتىنىڭ قولا جۇلدەگەرى سوفيا بەرۋلتسەۆا, سونداي-اق شورت-ترەكتەن الەم كۋبوگى كەزەڭدەرىنىڭ جۇلدەگەرى دەنيس نيكيشا مەن فريستايل-موگۋلدان الەم چەمپيوناتىنىڭ جۇلدەگەرى يۋليا گالىشەۆا جۇلدە يەگەرلەرى اتاندى.
قىسقى سپورت تۇرلەرىندەگى كوماندالار بۇگىندە 2022 جىلعى بەيجىڭ وليمپياداسىنا دايىندالۋ ۇستىندە. سول سەبەپتى سالتاناتتى ءىس-شاراعا قاتىسا العان جوق.
«ۇزدىك جاتتىقتىرۋشى» اتاعىنا بوكستان توكيو وليمپياداسىنىڭ قولا جۇلدەگەرى, الەم چەمپيونى ساكەن بيبوسىنوۆتىڭ جەكە جاتتىقتىرۋشىسى مىرزاعالي ايتجانوۆ پەن شورت-ترەكتەن قازاقستان كومانداسىنىڭ باس باپكەرى مادىعالي قارسىبەكوۆ جازعى جانە قىسقى سپورت تۇرلەرى بويىنشا لايىق دەپ تانىلدى.
«جىلدىڭ ۇزدىك كومانداسى» اتالىمىنا بيىل الەم چەمپيوناتىنىڭ جارتىلاي فينالىنا دەيىن شىعىپ, ءتورتىنشى ورىنعا تابان تىرەگەن فۋتزالدان قازاقستان قۇراماسى لايىق دەپ تانىلدى. ال «جىل جاڭالىعى» نوميناتسياسىندا كاراتەدەن توكيو وليمپياداسىنا قاتىسۋشى ءارى الەم چەمپيوناتىنىڭ قولا جۇلدەگەرى نۇرقانات اجىقانوۆ توپ جاردى. نۇرقانات الەم بىرىنشىلىگىندە كوماندالىق سىندا دا قولا جۇلدە جەڭىپ العانىن ەسكە سالا كەتەيىك.
«ۇزدىك ايماق» اتالىمىندا وزگەرىستەر بار. بيىل ۇيىمداستىرۋشىلار وليمپيادالىق سپورت تۇرلەرى بويىنشا 36 ۇلتتىق فەدەراتسياعا تىزگىن بەرىپ, ۇزدىك ايماقتى فەدەراتسيا وكىلدەرى انىقتادى. وتە تارتىستى وتكەن داۋىس بەرۋ ناتيجەسىندە الماتى قالاسى الماتى وبلىسىن ءبىر ۇپاي باسىمدىعىمەن ۇتىپ, جەڭىسكە جەتتى.
«ۇزدىك ۇلتتىق سپورت فەدەراتسياسى» اتالىمىندا تەننيس فەدەراتسياسى توپ جاردى. جەڭىمپازدى قازاقستاننىڭ ۇوك جانىنان قۇرىلعان ارنايى كوميسسيا انىقتاپ, اتالعان فەدەراتسيا بارلىق تالاپ بويىنشا ۇزدىك شىقتى.
پاراليمپيادالىق سپورت تۇرلەرى بويىنشا «ۇزدىك سپورتشى» بولىپ پاۋەرليفتينگتەن توكيو-2020 پاراليمپيادالىق ويىندارىنىڭ جەڭىمپازى داۆيد دەگتياروۆ تانىلدى. ال پاراليمپيادالىق سپورت تۇرلەرى بويىنشا «ۇزدىك جاتتىقتىرۋشى» اتاعىنا پارادزيۋدودان قازاقستان كومانداسىنىڭ باس باپكەرى جاندوس قيانوۆ قول جەتكىزدى. ونىڭ ءۇش شاكىرتى – ءانۋار ساريەۆ, داۋلەت تەمىرجانوۆ جانە زارينا بايباتينا توكيو-2020 پاراليمپيادا ويىندارىندا ءۇش كۇمىس مەدال جەڭىپ العان.
جىلدىڭ سپورتتىق وقيعاسىن قورىتىندىلاعان كەشتە قازاقستاندىق اتلەتتەردى بارلىق جاتتىعۋ جيىندارى مەن جارىستارعا باستاپ اپاراتىن كەشەندى-عىلىمي توپ مۇشەلەرى دە ەسكەرۋسىز قالعان جوق.
«سپورتتىق مەديتسينا بويىنشا ۇزدىك مامان» نوميناتسياسى دارىگەر ازامات نۇرماتوۆقا بەرىلدى. ول توكيو-2020 ويىندارىندا مەديتسينالىق شتابتىڭ باس دارىگەرى رەتىندە جۇمىس ىستەدى, سونداي-اق وليمپياداعا دايىندىق كەزىندە سپورتشىلاردىڭ قاۋىپسىزدىگىن ساقتاۋ جونىندەگى توپتىڭ قۇرامىندا بولدى.
ۇلتتىق وليمپيادالىق كوميتەتتىڭ ارنايى ءداستۇرلى جۇلدەسى – «قازاقستان سپورتىنىڭ ماقتانىشى» وتاندىق سپورتتىڭ دامۋىنا ولشەۋسىز ۇلەس قوسىپ, بولاشاق چەمپيوندارعا ۇلگى اتانعان سپورتشىلار مەن قايراتكەرلەرگە تاپسىرىلادى. بيىل بۇل جۇلدە گرەك-ريم كۇرەسىنەن ماسكەۋ وليمپياداسىنىڭ جەڭىمپازى, الەم چەمپيونى جاقسىلىق ۇشكەمپىروۆكە بەرىلدى. جۇلدەنى داڭقتى بالۋاننىڭ ۇلى, بۇگىندە اكەسىنىڭ اتىنداعى سپورت كەشەنىن باسقارىپ وتىرعان جاندوس ۇشكەمپىروۆ الدى.
ماراپاتتاۋ ءراسىمىنىڭ سوڭى كونتسەرتتىك باعدارلاماعا ۇلاستى.
