قازاقستاننىڭ عانا ەمەس, الەمنىڭ ءبىلىم برەندىنە اينالعان «بولاشاق» حالىقارالىق ستيپەندياسى سوناۋ 1993 جىلعى 5 قاراشادا ەلباسىنىڭ تاريحي قاۋلىسىمەن باستاۋ الدى. تاۋەلسىزدىك تابالدىرىعىمىزدان اتتاعان 90-جىلدار ەلىمىزدىڭ ءالى دە بۇعاناسى قاتا قويماعان كەزى ەدى. ەل دامۋىنداعى شەشۋشى ءارى قيىن كەزەڭدەردىڭ بىرىندە جاستاردى الەمنىڭ ۇزدىك ۋنيۆەرسيتەتتەرىنە جىبەرۋ ءۇشىن ەلباسىنىڭ ستراتەگيالىق شەشىمى كەرەك بولدى. ەكونوميكا قۇلدىراپ, ءتىپتى بيۋدجەت قىزمەتكەرلەرىنە جالاقى تاۋىپ بەرە الماي وتىرعان تۇستا ەل دامۋى ءۇشىن زاماناۋي كادرلاردىڭ كەرەكتىگىن تۇسىنگەن ن.ءا.نازارباەۆ شۇعىل شەشىم قابىلدادى. ەلباسىنىڭ سول تاعدىرلى شەشىمى بۇگىندە ءوز جەمىسىن بەرىپ وتىر. ەلباسىنىڭ ەرەكشە يدەياسى ەلىمىزدەگى ادام كاپيتالىن دامىتۋعا ىقپال ەتكەن ەڭ ءساتتى جوبالاردىڭ بىرەگەيىنە اينالدى.
اتالعان ماقالاسىندا ن.ءا.نازارباەۆ «جاھاندىق جاڭا ترەندتەردىڭ قاتارىندا بولۋ ءۇشىن ءبىز «بولاشاق» باعدارلاماسىن جاساپ, جاستارىمىزدى الەمنىڭ ەڭ ۇزدىك ۋنيۆەرسيتەتتەرىندە وقىتتىق. ال قاراجات جەتكىلىكسىز بولعان وتكەن عاسىردىڭ 90-جىلدارى ءبىز ستۋدەنتتەردىڭ وقۋ اقىسىن, ءجۇرىپ-تۇرۋى مەن كۇنكورىسىن تولەپ بەردىك. وسى ۋاقىتقا دەيىن ەل يگىلىگى ءۇشىن 15 مىڭنان استام مامان دايارلاندى. ولار ءوز وتانىنىڭ قامقورلىعىن سەزىنىپ, ەلگە قىزمەت ەتىپ, ءبىزدىڭ ءۇمىتىمىزدى اقتايدى دەپ سەنەمىن», دەيدى.
ەلباسى اتاپ وتكەندەي, الەمنىڭ ۇزدىك وقۋ ورىندارىندا وقىعان «بولاشاق» تۇلەكتەرى قوعامنىڭ ءار سالاسىندا: دەنساۋلىق ساقتاۋ, ءبىلىم بەرۋ, مەملەكەتتىك قىزمەت, مادەنيەت, عىلىم جانە تەحنيكا, اۋىل شارۋاشىلىعى, ءوندىرىس, IT جانە يننوۆاتسيالار, بيزنەس ستارتاپ جوبالاردا – بارلىق جەردە ولشەۋسىز ۇلەستەرىن قوسىپ جاتىر.
باعدارلاما تيىمدىلىگىنە جاسالعان زەرتتەۋگە سايكەس, تەك ءبىر جىلدىڭ ىشىندە 545 دارىگەر تۇلەگىمىز 213 مىڭ كۇردەلىلىگى ءارتۇرلى وپەراتسيا جاسادى, ال 842 پەداگوگ-وقىتۋشى تۇلەگىمىز 145 مىڭ مەكتەپ وقۋشىسى مەن ستۋدەنتىن وقىتتى. پروفەسسور اتاعى بار 150 تۇلەك مىڭنان استام عىلىمي ماقالاسىن الەمنىڭ الدىڭعى قاتارداعى عىلىمي باسىلىمدارىندا جاريالادى. ونەر سالاسىنداعى ساناۋلى تۇلەك 5 مىڭ كونتسەرت ۇيىمداستىردى, سونىمەن قاتار 100 مىڭنان اسا جوعارى سىنىپتاعى مەكتەپ وقۋشىسىنا تالىمگەر بولدى. بۇل تەك تۇلەكتەردىڭ ءبىر شوعىرى ءبىر كۇنتىزبەلىك جىلدا جاساعان جۇمىستار. بۇگىندە 11 مىڭنان استام تۇلەكتىڭ تەڭ جارتىسى شەشىم قابىلداۋ دەڭگەيىندەگى باسشىلار, تۇلەكتەردىڭ 10 پايىزى ءوز كاسىبىن اشىپ, باسقارىپ وتىرعاندار. جالپى, تاۋەلسىز قازاقستان دامۋىنىڭ قاي سالاسىن الساق تا, ماڭىزدى جوبالاردىڭ جۇزەگە اسىرىلۋىندا «بولاشاق» تۇلەكتەرى جاپپاي تارتىلعان جانە تارتىلا بەرەدى.
سوندىقتان بۋىنى بەكىمەگەن ەلدىڭ ەڭ العاشقى قارلىعاشتارى مەن بۇگىنگى «بولاشاقتىقتار» مەملەكەت قامقورلىعىن شىن سەزىنەدى ءارى وزدەرى ارقالاعان اماناتتى ابىرويمەن الىپ ءجۇر دەپ سەنىممەن ايتا الامىن.
ءسوز سوڭىندا, «بولاشاق» باعدارلاماسىنىڭ تۇلەگى ءارى حالىقارالىق باعدارلامالار ورتالىعىنىڭ جەتەكشىسى رەتىندە ەلباسىنىڭ ءوزى تىكەلەي نازار سالىپ, قولداپ وتىرعان باعدارلامانىڭ ودان ءارى ساپالىق تۇرعىدان جەتىلۋىنە, ىزگى يدەيانىڭ ىركىلىسسىز جۇمىس ىستەۋىنە ۇلەس قوسىپ كەلە جاتقانىمدى ماقتان تۇتاتىنىمدى ءارى «بولاشاق» تۇلەگى» دەگەن مارتەبە سالماعى ماعان ءزىل جاۋاپكەرشىلىك جۇكتەيتىنىن ايتقىم كەلەدى.
ەل بولاشاعى ءۇشىن ەڭبەك ەتە بەرەيىك!
اينۇر كارىبوزوۆا,
«بولاشاق» حالىقارالىق ستيپەندياسىنىڭ اكىمشىسى «حالىقارالىق باعدارلامالار ورتالىعى» اق پرەزيدەنتى, «بولاشاق» باعدارلاماسىنىڭ تۇلەگى, لوندون ەكونوميكا مەكتەبى (LSE)
