مەملەكەتىمىزدىڭ استاناسىن الماتىدان اقمولا قالاسىنا رەسمي تۇردە كوشىرۋ ءىسى 1997 جىلدىڭ 10 جەلتوقسانىندا جۇزەگە اسىرىلدى. ال تۇڭعىش پرەزيدەنتتىڭ 1998 جىلعى 6 مامىرداعى جارلىعى نەگىزىندە اقمولانىڭ اتاۋى استانا بولىپ وزگەرتىلىپ, ونىڭ حالىقارالىق تۇساۋكەسەرى 1998 جىلدىڭ 10 ماۋسىمىندا ءوتتى. ال 2019 جىلعى 23 ناۋرىزداعى قازاقستان رەسپۋبليكاسى پرەزيدەنتىنىڭ جارلىعىمەن استانا قالاسى قازاقستان رەسپۋبليكاسىنىڭ استاناسى – نۇر-سۇلتان قالاسى دەپ قايتا اتالدى. بۇل كورسەتىلگەن ايتۋلى كۇندەردىڭ بارلىعى ەل تاريحىندا التىن ارىپپەن جازىلىپ قالدى. دەگەنمەن, كەزىندە الماتىدان سارىارقاعا بەت تۇزەگەن بۇل كوشتىڭ رەسمي تۇرعىدا 10 جەلتوقساندا باستالعانىن ەسكەرە سويلەسەك, بۇل كۇننىڭ قازاق ەلى ءۇشىن ماڭىزى زور ەكەنىن تەرەڭ ۇعىنا تۇسەمىز.
تارقاتا ايتار بولساق, 1997 جىلدىڭ 9 جەلتوقسانىندا جاڭا ەلوردا – اقمولاعا ەلىمىزدىڭ مەملەكەتتىك رامىزدەرى جەتكىزىلدى, ەلباسى رەزيدەنتسياسىندا كوك تۋىمىز جەلبىرەدى. وسى كۇنى الماتى جۇرتشىلىعىنىڭ, زيالى قاۋىمنىڭ وكىلدەرى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتى جاڭا استاناعا شىعارىپ سالۋ ءراسىمىن جاسادى.
ال وسى جىلدىڭ 10 جەلتوقسانىندا استاناداعى ەلباسى رەزيدەنتسياسىنىڭ كۇمبەزدى زالىندا رەسپۋبليكا پارلامەنتى مەن ۇكىمەتىنىڭ بىرلەسكەن سالتاناتتى ءماجىلىسى بولدى. ونى كىرىسپە سوزبەن اشقان قازاقستان پرەزيدەنتى نۇرسۇلتان نازارباەۆ اقمولا قالاسى 1997 جىلعى 10 جەلتوقساننان باستاپ مەملەكەتىمىزدىڭ استاناسى بولىپ رەسمي تۇردە جاريالاناتىنىن سالتاناتتى جاعدايدا مالىمدەدى.
مىنە, وسىلايشا ەلوردامىز – نۇر-سۇلتان قالاسىنىڭ مەملەكەتىمىزدىڭ استاناسى رەتىندەگى العاشقى رەسمي قادامى باستاۋ الدى.
ەلدىڭ جاڭا ورتالىعى ءا دەگەننەن ساياسي-ەكونوميكالىق, رۋحاني-مادەني ءىرى وقيعالاردىڭ, قايناعان تىرشىلىكتىڭ ورداسىنا اينالىپ شىعا كەلدى. جاڭا استانا ەل ورتالىعى بولعانىنا ءبىر جىل وتەر-وتپەس ۋاقىتتا, ياعني 1999 جىلى يۋنەسكو ۇيعارىمىمەن «الەم قالاسى» دەگەن مارتەبەلى اتاقتى ەنشىلەدى, ال 2000 جىلى استانالار مەن ءىرى قالالاردىڭ حالىقارالىق اسسامبلەياسىنىڭ مۇشەلىگىنە قابىلداندى. وسىلايشا, العاشقى قادامىن ءساتتى باستاعان ەلوردا بۇگىندە ەلىمىزدىڭ ايبارى, مەرەيى بولىپ وتىر. ەۋرازيا قۇرلىعىنىڭ ورتاسىندا ورنالاسقان نۇر-سۇلتان قالاسى ەلىمىزدىڭ تىنىس-تىرشىلىگىن جاڭا باعىتقا بۇردى.
قازاقستاننىڭ, ۇلتىمىزدىڭ برەندىنە اينالعان نۇر-سۇلتاننىڭ دامۋى, مول تابىستارعا جەتۋى, قولايلى ورتا اتانۋى, قاناتىن كەڭگە جايۋى, بۇل – حالقىمىزدىڭ اق تىلەگىنىڭ ورىندالۋىن, ەلباسى ەڭبەگىنىڭ جانعانىن بىلدىرەتىنى ءسوزسىز.
