ۇكىمەت • 08 جەلتوقسان، 2021

بيولوگيالىق قاۋىپسىزدىك تۋرالى زاڭ جوباسى ماقۇلداندى

ءماجىلىس دەپۋتاتتارى «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Egemen.kz.

بوتاكوز باقبەرگەن

«زاڭ جوباسىن دەنساۋلىق ساقتاۋ مينيسترلىگى مۇددەلى مەملەكەتتىك ورگاندارمەن بىرلەسىپ، مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ وتىرىسىندا بەرگەن تاپسىرمالارىن ورىنداۋ ماقساتىندا ازىرلەدى»، دەدى قر دەنساۋلىق ساقتاۋ ءمينيسترى الەكسەي تسوي پالاتانىڭ جالپى وتىرىسىندا.

ونىڭ ايتۋىنشا، زاڭ جوباسىنىڭ نەگىزگى تۇجىرىمداماسى بيولوگيالىق قاتەرلەردى ەرتە انىقتاۋ جانە ولاردىڭ الدىن الۋ بولىپ تابىلادى.

زاڭ جوباسىندا كەلەسى ماقساتتار كوزدەلگەن:

ۋاكىلەتتى ورگاندى ايقىنداۋ، بيولوگيالىق قاۋىپسىزدىك سالاسىنداعى مەملەكەتتىك ورگانداردىڭ ۇيلەستىرۋ جانە ۆەدومستۆوارالىق ءوزارا ءىس-قيمىلى، ولاردىڭ قۇزىرەتتەرىن، سونداي-اق قازاقستان رەسپۋبليكاسى ۇكىمەتىنىڭ قۇزىرەتتەرىن ايقىنداۋ;
قازاقستان رەسپۋبليكاسى زاڭناماسىنىڭ تالاپتارىنا سايكەس توتەنشە جاعدايلار كەزىندە، سوعىس جاعدايى رەجيمى جاعدايىندا جانە اسكەري قاۋىپسىزدىك پەن قورعانىس شەڭبەرىندە، تەرروريزمگە جانە ەكسترەميزمگە قارسى ءىس-قيمىل جاساۋ، كۇزەتىلەتىن ادامدار مەن وبەكتىلەردىڭ بيولوگيالىق قاۋىپسىزدىگىن قامتاماسىز ەتۋ ماقساتىندا بيولوگيالىق قاۋىپسىزدىكتى قامتاماسىز ەتۋگە تارتىلعان مۇددەلى مەملەكەتتىك ورگانداردىڭ ۇيلەستىرۋشى ءرولىن احۋالدىق ايقىنداۋ;
بيولوگيالىق قاۋىپسىزدىك سالاسىنداعى ورتالىقتاندىرىلعان ەسەپكە الۋ جانە مونيتورينگ، ۇيلەستىرىلگەن دەن قويۋ شارالارىن ازىرلەۋ جانە قازاقستان رەسپۋبليكاسىنىڭ اۋماعىندا بيولوگيالىق قاۋىپسىزدىكتى قامتاماسىز ەتۋ ءۇشىن مەملەكەتتىك ورگاندار اراسىندا اقپارات الماسۋ ماقساتىندا بيولوگيالىق قاۋىپسىزدىكتى قامتاماسىز ەتۋ سالاسىندا بىرىڭعاي مەملەكەتتىك اقپاراتتىق جۇيە قۇرۋ. مۇنداي جۇيەنى قۇرۋدىڭ ناتيجەسى بولجاۋ، بيولوگيالىق قاۋىپتەردى باسقارۋ جۇيەلەرىن قالىپتاستىرۋ بولادى;
ءاربىر وبەكتىگە (ستاتسيونارلىق نەمەسە ءموبيلدى) پاتوگەندى بيولوگيالىق اگەنتتەرمەن جۇمىس ىستەۋگە رۇقسات الۋ;
پاتوگەندى بيولوگيالىق اگەنتتەرمەن جۇمىس ىستەۋدى جۇزەگە اسىراتىن سۋبەكتىلەردىڭ ولاردىڭ مەنشىك نىسانىنا قاراماستان سايكەستىكتى باعالاۋ سالاسىندا اككرەديتتەۋدىڭ مىندەتتى راسىمىنەن ءوتۋى;
پاتوگەندى بيولوگيالىق اگەنتتەرمەن جۇمىس ىستەۋدى جۇزەگە اسىراتىن ۇيىمداردىڭ قىزمەتكەرلەرىن بيولوگيالىق قاۋىپسىزدىكتى قامتاماسىز ەتۋ ماسەلەلەرى بويىنشا وقىتۋ، نۇسقاۋ بەرۋ، ءبىلىمىن تەكسەرۋ;
پاتوگەندى بيولوگيالىق اگەنتتەرمەن جۇمىس ىستەۋدى جۇزەگە اسىراتىن مەملەكەتتىك ۇيىمداردىڭ قىزمەتكەرلەرى مەن قوسالقى پەرسونالىن الەۋمەتتىك قورعاۋ، ولاردىڭ جالاقىسىن ۇلعايتۋ، ەكى لاۋازىمدىق ايلىقاقى مولشەرىندە ساۋىقتىرۋعا ارنالعان جاردەماقى ەنگىزۋ;
بيولوگيالىق قاۋىپسىزدىك سالاسىنداعى عىلىمي جانە ءبىلىم بەرۋ قىزمەتىن رەتتەۋ.

سونداي-اق، بيولوگيالىق قاۋىپسىزدىك سالاسىنداعى زاڭنامادا كوزدەلگەن تالاپتاردىڭ ورىندالۋىن قامتاماسىز ەتۋ ماقساتىندا مەملەكەتتىك باقىلاۋ مەن قاداعالاۋدى جۇزەگە اسىرۋ كوزدەلگەن.