قاراعاندىداعى «تاڭشولپان» بالالار ۇيىندە 63 بالا تۇرادى. مۇندا اشىلعان تىگىن جانە اعاش شەبەرحاناسى تاربيەلەنۋشىلەر ءۇشىن بازارلىقتىڭ تورەسى بولدى. مىسالى, تىگىن شەبەرحاناسىندا قىزدار ءۇشىن ۇيرەنۋگە قاجەتتى دۇنيەنىڭ ءبارى ۇساق-تۇيەككە دەيىن ويلاستىرىلعان. اتەلەدە 5 تىگىن ماشيناسى, 2 تورلاعىش, 3 ۇتىكتەۋ تاقتاسى مەن ۇتىك بار. بۇدان بولەك, بۋمەن تىك جىبىتكىش, بۋ گەنەراتورى جانە شاڭسورعىش تا دايىن تۇر. جيھاز اتاۋلىدان 8 ۇستەل, ديۆان, قۇرال-جابدىق, سونان سوڭ ماتەريالداردى جانە تىگىن كەرەك-جاراقتارىن ساقتاۋعا ارنالعان شكاف ورىن تەپكەن. سونداي-اق شەبەرحانا ىشىنە كىلەم توسەلىپ, ۇلكەن اينا قويىلعان. قالقاسى بار كيىم ولشەيتىن بولمە دە قىزمەت كورسەتۋگە دايىن.
«تاڭشولپان» بالالار ءۇيىنىڭ ديرەكتورى سەرىك ءامىرحانوۆ جابدىقتار مەن قۇرال-اسپاپتاردىڭ وتە ىڭعايلى جانە زاماناۋي ەكەنىن ايتادى.
– بۇل جەردە تىگۋ تەحنيكاسى جانە ادىستەرىمەن جۇمىس ىستەۋ ءبىر عانيبەت. ءبىز بالالارعا بەرىلگەن وسىنداي كەرەمەت سىيلىق ءۇشىن شىن جۇرەكتەن العىس ايتامىز. شەبەرحانا ولارعا ومىردە پايداسى مول ىستەردى ۇيرەنۋگە كومەكتەسەدى. كەيبىر تاربيەلەنۋشىلەر ءۇشىن بۇل ولاردىڭ كاسىبىنىڭ نەمەسە ءتىپتى ءوز ءىسىنىڭ باستاۋىنا اينالاتىنىنا سەنىمدىمىن, – دەيدى ديرەكتور.
ۇل بالالارعا ارنالعان شەبەرحاناعا ستانوكتار, قول ارالار, بالعالار, ولشەۋ قۇرالدارى, بۇرعىلار, بۇراعىشتار, روبوت تەحنيكاسى جابدىقتارىنىڭ جيىنتىعى قويىلعان. سىيلىقتاردىڭ ىشىندە بالالارعا مەكەمە ءۇشىن پايدالى زاتتاردى جاساۋدى ۇيرەتەتىن بىرنەشە كيلو پلاستيكتەن تۇراتىن 3D پرينتەرى بار. جالپى, جوعارىدا ايتىلعان ەكى شەبەرحانانى جابدىقتاۋعا 4,5 ملن تەڭگەدەن استام قاراجات جۇمسالىپتى.
ال 133 وقۋشى مەكەن ەتەتىن مۇمكىندىگى شەكتەۋلى بالالارعا ارنالعان بالالار ۇيىندە كۋليناريامەن اينالىسۋعا مۇمكىندىك بەرەتىن زاماناۋي اس ءۇي پايدا بولدى. ياعني مۇنداعى تاربيەلەنۋشىلەر اسپازدىق ونەردىڭ قىر-سىرىن مەڭگەرىپ, ءۇي تۇرمىسىن جۇرگىزۋدى ۇيرەنۋگە مول مۇمكىندىك الدى.
بۇل جەردە قۇرامىنا توڭازىتقىش جانە پەش, ءپىسىرۋ بەتى, ميكروتولقىندى پەش, سورعىش, ىدىس جۋعىش ماشينا سياقتى تۇرمىستىق تەحنيكا كىرەتىن اس ءۇي جيىنتىعى, قابىرعا جيھازى, ورىندىقتار جانە اسۇستەل بار. بالالار مۋلتيپىسىرگىشتە, ەلەكتر گريلدىڭ كومەگىمەن اس دايىنداۋدى, سەندۆيچ پەن قۇيماق پىسىرگىشتە تاڭعى اس ءپىسىرۋدى, ۆافەل قالىبىندا دەسەرت دايىنداۋدى ۇيرەنەدى. ال نەعۇرلىم كۇردەلى تاعامداردى دايىنداۋ كەرەك بولسا, وندا ءمانتى پىسىرگىشتى, تابالاردى, شوڭكەلەردى جانە ءاسۇي قۇرالدارىنىڭ جيىنتىعىن پايدالانۋعا بولادى.
بۇدان وزگە قوناقتار ءۇشىن ۇستەلدى جابدىقتاۋعا 3 اسحانا جيىنتىعى جانە 3 اس قۇرالدارى جيىنتىعى, الجاپقىشتار جانە ءتۇرلى ءاسۇي كەرەك-جاراقتارى ساتىپ الىنعان. جالپى, بۇل بولمەنى جابدىقتاۋعا 4,3 ملن تەڭگەدەن استام قاراجات جۇمسالىپتى.
بالالار ءۇيىنىڭ ديرەكتورى دانەكەر سەيسەكينا شەبەرحانادا بالالارمەن پەداگوگتەر جۇمىس ىستەيتىنىن ايتادى.
– ءبىز ەرىكتىلەردى شەبەرلىك سىنىپتارىنا شاقىرامىز. بالالار ءۇشىن بۇل وتە ماڭىزدى قادام. ولار ومىرگە قاجەتتى نارسەلەردى ۇيرەنەدى. مۇمكىن بۇل ولاردىڭ بولاشاق ماماندىعى – قوعامدىق تاماقتانۋ يندۋسترياسىنا جاساعان العاشقى قادامدارى بولۋى دا مۇمكىن, – دەيدى ول.
ال Ayala قورىنىڭ پرەزيدەنتى ايدان سۇلەيمەنوۆا بولسا, جالپى جوبانى ىسكە اسىرۋعا ارنالعان 10 جىلدىڭ ىشىندە قور ۇيىمداستىرعان كاسىپتىك باعدارلاۋ كۋرستارىنان مىڭنان استام ءجاسوسپىرىمنىڭ وتكەنىن ءمالىم ەتتى.
– ءبىز وسى وقۋ ورىندارىن بىتىرگەننەن كەيىن بالالاردىڭ ءومىر سۇرۋگە, وقۋدى جالعاستىرۋعا جانە دامۋعا كومەكتەسەتىن پايدالى پراكتيكالىق داعدىلارعا يە بولعانىن قالايمىز. ال ەڭ باستى ماقساتىمىز – بولاشاقتا ولار وزىنە ۇنايتىن جۇمىس تاپسا ەكەن دەگەن نيەت, – دەيدى قور باسشىسى.
قاراعاندى وبلىسى
