ەگەمەن قازاقستان • 06 جەلتوقسان، 2021

«Egemen Qazaqstan» گازەتى مەن «روسسيسكايا گازەتا» ءوزارا كەلىسىم جاساستى

2532 رەت كورسەتىلدى

رەسپۋبليكالىق «Egemen Qazaqstan» گازەتى مەن «روسسيسكايا گازەتا» باسپاسى ءوزارا ءىس-قيمىل تۋرالى ارىپتەستىك كەلىسىمگە قول قويدى، دەپ حابارلايدى Egemen.kz.

ەكى ەل گازەتىنىڭ كەلىسىمگە كەلۋدەگى باستى ماقساتى – ءوزارا اقپارات الماسۋ جانە تاجىريبە ءبولىسۋ.

«بۇگىن «روسسيسكايا گازەتا» باسىلىمىمەن كەلىسىمگە قول قويدىق. بۇل ەكىجاقتى اقپارات جانە تاجىريبە الماسۋعا مۇمكىندىك بەرەدى. اتالعان باسىلىم - رەسەيدىڭ باس گازەتى جانە بىرنەشە قوسىمشاسى بار. ميلليونداعان تيراجبەن شىعادى. سوندىقتان بۇل كەلىسىم ۋاقىت وتە كەلە ءوز تيىمدىلىگىن كورسەتەدى دەپ ويلايمىن. ەلورداعا ورىس باسىلىمنىڭ ءبىرىنشى باسشىسى ارنايى كەلىپ وتىر. بۇل، ءبىر جاعىنان، ءبىزدىڭ ەلگە دەگەن قۇرمەتتى بىلدىرەدى. كەلىسىمگە كەلمەس بۇرىن ماسەلە الدىن الا تالقىلاندى. بۇدان بىلاي اتالعان رەسەيلىك باسىلىم قازاقستاندا بولىپ جاتقان جاڭالىقتاردى ءبىز ارقىلى الا الادى. تيىسىنشە كورشى رەسەيدە بولىپ جاتقان جايتتارعا ءبىز «روسسيسكايا گازەتا» باسىلىمى ارقىلى جەدەل قول جەتكىزە الامىز»، دەدى «Egemen Qazaqstan» اق باسقارما توراعاسى دارحان قىدىرالى.

ء«بىزدىڭ گازەت - مەملەكەتتىك باسىلىم. ياعني، بيۋدجەت تولىقتاي مەملەكەتتىك. ارينە مەملەكەتتىك بيۋدجەتتەن بولەك، باق رەتىندە قوسىمشا تابىس تابۋعا قۇقىعىمىز بار. ءبىزدىڭ گازەتتىڭ باعىتى ساياسي-قوعامدىق جانە قۇرامىمىزدا بىرنەشە باسىلىم بار. ونىڭ ىشىندە كۇندەلىكتى جانە اپتالىق گازەت تە بار. سونداي-اق ءبىزدىڭ باسىلىمنىڭ بەتىنە مەملەكەتتىك زاڭدار، پرەزيدەنت قاۋلىسى جانە تاعى ماڭىزدى مەملەكەتتىك نورماتيۆتىك قۇجاتتار جاريالانادى. ءبىز گازەتتى وقىرماندارعا تەگىن تاراتامىز. مەديحولدينگ قۇرامىندا گازەتتەن بولەك، «رودينا» جۋرنالى دا جارىق كورەدى. بۇگىنگى «Egemen Qazaqstan» گازەتىمەن جاسالىپ جاتقان – سەرىكتەستىك كەلىسىمى. ياعني ءوزارا اقپارات الماسۋ جانە ءبىر-بىرىمىزدەن ۇيرەنۋ»، دەدى «روسسيسكايا گازەتا» باسىلىمىنىڭ باس ديرەكتورى پاۆەل نەگويتسا.

شارا سوڭىندا «ەگەمەن قازاقستان» اق باسقارما توراعاسى دارحان قىدىرالى جانە «روسسيسكايا گازەتا» باسىلىمىنىڭ باس ديرەكتورى پاۆەل نەگويتسا ەكىجاقتى سەرىكتەستىك تۋرالى كەلىسىمگە قول قويدى.

سوڭعى جاڭالىقتار

مۇناي باعاسى ارزاندادى

ەكونوميكا • بۇگىن، 13:23

ۇقساس جاڭالىقتار