ۇكىمەت • 03 جەلتوقسان، 2021

قازاقستان سور26 اياسىنداعى مىندەتتەمەلەرىن ۋاقىتىلى ورىندايدى — ا.مامين

26 رەت كورسەتىلدى

قر پرەمەر-ءمينيسترى اسقار ءماميننىڭ توراعالىعىمەن وتكەن ينۆەستيتسيالىق احۋالدى جاقسارتۋ جونىندەگى كەڭەس وتىرىسىندا جاڭارتىلاتىن ەنەرگيا كوزدەرىن دامىتۋ جانە سور26 كليماتتىڭ وزگەرۋى جونىندەگى جاھاندىق ءسامميتتىڭ قورىتىندىسى بويىنشا قازاقستاننىڭ مىندەتتەمەلەرىن ورىنداۋ اياسىندا قر-دىڭ تومەن كومىرتەكتى ەكونوميكاعا كوشۋ ماسەلەلەرى قارالدى، دەپ حابارلايدى Egemen.kz.

«جاسىل ەكونوميكانى» دامىتۋ جانە جاڭارتىلاتىن ەنەرگيا كوزدەرىنە شەتەلدىك ينۆەستيتسيالاردى تارتۋ پەرسپەكتيۆالارى تۋرالى قر امەريكالىق ساۋدا پالاتاسىنىڭ اتقارۋشى ديرەكتورى دوريس برەدبيۋري، حالىقارالىق ەكونوميكالىق اگەنتتىكتىڭ اتقارۋشى ديرەكتورى فاتيح بيرول، حالىقارالىق ۆاليۋتا قورى ەۋرازيا ءبولىمىنىڭ باسشىسى نيكولاس بلانشە، ەىدۇ سالىق ساياساتى ورتالىعىنىڭ ديرەكتورى پاسكال سەنت-امان، ەقدب-نىڭ قازاقستان بويىنشا ديرەكتورى حۋسەين وزحان، يتاليانىڭ قر-داعى ەلشىسى ماركو البەرتي، نيدەرلاندىنىڭ قر-داعى ەلشىسى اندرە كارستەنس، سونداي-اق EY، Eni جانە ت.ب. كومپانيالاردىڭ وكىلدەرى بايانداما جاسادى.

ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ، ەنەرگەتيكا ءمينيسترى ماعزۇم مىرزاعاليەۆ، ۇلتتىق ەكونوميكا ءمينيسترى اسەت ەرعاليەۆ قابىلدانىپ جاتقان شارالار تۋرالى اقپارات بەردى.

ەكونوميكانى دەكاربونيزاتسيالاۋ پروتسەسىنىڭ ۇيىمداستىرۋشىلىق، زاڭنامالىق جانە قارجىلىق اسپەكتىلەرى، شىعارىندىلاردى ازايتۋ بويىنشا ۇلتتىق دەڭگەيدە ايقىندالعان قازاقستاننىڭ جاڭارتىلعان ۇلەسىن ءىس جۇزىندە جۇزەگە اسىرۋ، ەنەرگەتيكالىق تەڭگەرىمدى وڭتايلاندىرۋ جانە جاڭارتىلاتىن ەنەرگيا كوزدەرىن جانە جالپى «جاسىل» ەكونوميكانى دامىتۋعا سالىناتىن ينۆەستيتسيالار كولەمىن ودان ءارى ۇلعايتۋ ماسەلەلەرى تالقىلاندى.

ۇكىمەت باسشىسى شوتلانديانىڭ گلازگو قالاسىندا وتكەن بۇۇ كليماتتىڭ وزگەرۋى جونىندەگى نەگىزدەمەلىك كونۆەنتسياسىنىڭ (سور26) الەمدىك كوشباسشىلارىنىڭ سامميتىندە قازاقستان 2030 جىلعا قاراي جاڭارتىلاتىن ەنەرگيا كوزدەرىنەن الىناتىن ەنەرگيا كولەمىن 3%-دان 15%-عا دەيىن بەس ەسە ۇلعايتۋ، 2 ملرد-تان استام اعاش وتىرعىزۋ ەسەبىنەن كومىرتەكتى ءسىڭىرۋ الەۋەتىن ارتتىرۋ، سونداي-اق 2060 جىلعا قاراي قر-نىڭ كومىرتەگى بەيتاراپتىلىعىنا قول جەتكىزۋىن قامتاماسىز ەتۋ ماقساتىن جاريالاعانىن اتاپ ءوتتى.

پرەمەر-مينيستر قازاقستان بالامالى ەنەرگەتيكانى دامىتۋ سالاسىنا شەتەلدىك كاپيتال مەن وزىق تەحنولوگيالاردى تارتۋ ءۇشىن ينۆەستيتسيالىق ورتانى جاقسارتۋ جونىندە بىرقاتار شارا قابىلداعانىن اتاپ ءوتتى.

سونىڭ ناتيجەسىندە، 2020 جىلى جاڭارتىلاتىن ەنەرگەتيكا سالاسىندا جالپى قۋاتى شامامەن 600 مۆت بولاتىن 25 جوبا پايدالانۋعا بەرىلدى. ينۆەستيتسيا كولەمى $510 ملن استى. 2021 جىلدىڭ قورىتىندىسى بويىنشا $445 ملن ينۆەستيتسيا تارتا وتىرىپ، جالپى قۋاتى 450 مۆت بولاتىن 22 جوبا ىسكە قوسىلادى.

الداعى ءتورت جىل ىشىندە جالپى قۋاتى 2400 مۆت جانە ينۆەستيتسيالار كولەمى $2،5 ملرد اساتىن جەك-ءتىڭ 60-تان استام جاڭا جوباسىن پايدالانۋعا بەرۋ جوسپاردا بار.

ا. مامين ەنەرگەتيكا سەكتورىن جاڭعىرتۋعا جانە قر جاڭارتىلاتىن ەنەرگيا كوزدەرىن دامىتۋعا سالىناتىن ينۆەستيتسيالاردىڭ ودان ءارى وسۋىنە بيىل 1 جەلتوقساندا دۋباي قالاسىندا «سامۇرىق-قازىنا» اق مەن Abu Dhabi Developmental Holding Company (ADQ) تاۋەلسىز قورى اراسىنداعى ستراتەگيالىق ىنتىماقتاستىق تۋرالى كەلىسىمگە، سونداي-اق قر-دا جالپى قۋاتى 4 گۆت كۇن جانە جەل ەلەكتر ستانتسيالارىن سالۋ جونىندەگى ينۆەستيتسيالىق قۇجاتتارعا قول قويۋ ىقپال ەتەتىنىن اتاپ ءوتتى.

«2030 جىلعا قاراي قازاقستاندا جالپى قۋاتى 9 گۆت قۇرايتىن جاڭارتىلاتىن ەنەرگەتيكانىڭ 180-نەن اسا جوباسىن ىسكە قوسۋ جوسپارلانىپ وتىر. ءبىزدىڭ ەلىمىز سور26 شەڭبەرىندە ءوز مىندەتتەمەلەرىن ۋاقىتىلى ورىندايتىنىنا كۇمان جوق»، دەدى ا. مامين.

سوڭعى جاڭالىقتار

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار