ەكونوميكا • 03 جەلتوقسان، 2021

بجزق توراعاسى ەڭ تومەنگى كۇنكورىس مولشەرى نەگە وزگەرگەنىن ءتۇسىندىردى

144 رەت كورسەتىلدى

قر پرەزيدەنتى قاسىم-جومارت توقاەۆ 2021 جىلدىڭ 2 جەلتوقسانىندا قازاقستان رەسپۋبليكاسىنىڭ «2022-2024 جىلدارعا ارنالعان رەسپۋبليكالىق بيۋدجەت تۋرالى» زاڭىنا قول قويدى. زاڭدا 2022 جىلدىڭ 1 قاڭتارىنان باستاپ بىرقاتار الەۋمەتتىك-ەكونوميكالىق كورسەتكىشتەردى ۇلعايتۋ كوزدەلگەن، دەپ جازادى Egemen.kz.

ەڭ تومەنگى جالاقى قازىرگى 42،5 مىڭ تەڭگەدەن 60 مىڭ تەڭگەگە دەيىن كوبەيەدى. سونىمەن بىرگە، ەڭ تومەنگى زەينەتاقى، ەڭ تومەنگى بازالىق زەينەتاقى تولەمدەرىنىڭ مولشەرى مەن وزگە دە الەۋمەتتىك كورسەتكىشتەر ءوستى.

«قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭدا «زەينەتاقى جيناقتارىنىڭ ەڭ تومەنگى جەتكىلىكتىلىك شەگى - مىندەتتى زەينەتاقى جارنالارى مەن مىندەتتى كاسىپتىك زەينەتاقى جارنالارى ەسەبىنەن قالىپتاستىرىلعان، اي سايىنعى زەينەتاقىنى قامتاماسىز ەتۋ ءۇشىن قاجەتتى زەينەتاقى جيناقتارىنىڭ رەسپۋبليكالىق بيۋدجەت تۋرالى زاڭدا بەلگىلەنگەن ەڭ تومەن زەينەتاقى مولشەرىنەن كەم ەمەس ەڭ تومەن مولشەرى»،  دەپ بەلگىلەنگەن.

ەڭ تومەنگى جەتكىلىكتىلىك شەگى (تجش) قازاقستان رەسپۋبليكاسى ۇكىمەتىنىڭ 2013 جىلدىڭ 2 قازانىنداعى №1042 قاۋلىسىمەن بەكىتىلگەن ادىستەمەگە (2021 جىلدىڭ 6 قاڭتارىنداعى وزگەرىستەرىمەن جانە تولىقتىرۋلارىمەن) سايكەس جىل سايىن قايتا ەسەپتەلىپ وتىرادى جانە باق-تا جاريالانادى.

«بەكىتىلگەن ادىستەمەگە سايكەس، تجش مولشەرى ءاربىر جاس ەرەكشەلىگى ءۇشىن انىقتالادى جانە بولاشاق زەينەتاقى تولەمدەرى مەن زەينەتاقى جارنالارىنىڭ ءوسۋىن ەسكەرەدى. ەسەپتەۋدە قر «رەسپۋبليكالىق بيۋدجەت تۋرالى» زاڭىنا سايكەس جىل سايىن يندەكستەلەتىن ەڭ تومەنگى جالاقى، ەڭ تومەنگى زەينەتاقى، ەڭ تومەنگى كۇنكورىس دەڭگەيى سياقتى الەۋمەتتىك كورسەتكىشتەر قولدانىلادى. وسىعان بايلانىستى تجش مولشەرى اتالعان كورسەتكىشتەردىڭ جىل سايىن ءوسۋىن ەسكەرە وتىرىپ ەسەپتەلەدى»، دەدى بجزق توراعاسى جانات قۇرمانوۆ.

بۇل كورسەتكىشتەردىڭ وزگەرۋىنە بايلانىستى ۇكىمەتتىڭ قولدانىستاعى قاۋلىسىنا سايكەس 2022 جىلدىڭ 1 قاڭتارىنان باستاپ تجش قايتا ەسەپتەلدى.

«تجش اساتىن سوماسى بار ازاماتتار ءوز جيناقتارىنىڭ ءبىر بولىگىن تۇرعىن ءۇي جاعدايىن جاقسارتۋ، ەمدەلۋگە اقى تولەۋ، سونداي-اق، جەكە باسقارۋشى كومپانيالارعا ينۆەستيتسيالىق باسقارۋعا بەرۋ ءۇشىن پايدالانا الادى»، دەدى جانات قۇرمانوۆ.

سوڭعى جاڭالىقتار

ۇقساس جاڭالىقتار