قازاق ەلى قاشاندا ءوزىنىڭ ۇلان-بايتاق جەرىمەن, حالقىمەن, ىنتىماعىمەن بۇكىل الەمدى تاڭعالدىرىپ كەلەدى. ەلىمىزدىڭ سۇلۋ تابيعاتى بويعا قۋات, كوڭىلگە شابىت بەرەتىندەي قانداي تاماشا.
قازاق حالقى – الەمدەگى ۇلى حالىقتاردىڭ ءبىرى. قازاقتىڭ ۇلىلىعى – باۋىرمالدىعىندا, سابىرلىعىندا جانە دانالىعىندا. قازاق – سوزگە توقتاعان حالىق, ۇلكەنگە قۇرمەت, كىشىگە ىزەت كورسەتكەن, ەل باستاعان كوسەمدەرى مەن شەشەندەرى اقىل ايتسا, اقىلىنا ۇيىعان حالىق. مىنە, وسىنداي داناگوي, اسىل قاسيەتكە باي ەلدە دۇنيەگە كەلگەنىمە جانە تاۋەلسىز ەلدىڭ قۇرداسى بولعانىما ماقتانامىن. ەلىمىزدىڭ مارتەبەلى ەل بولۋى, 30 جىلدا الەمگە تانىلۋى, ارينە, ەلباسىمىز نۇرسۇلتان نازارباەۆتىڭ ولشەۋسىز ەڭبەگىنىڭ ارقاسىندا دەپ بىلەمىن, ەرەكشە ىلتيپاتپەن قارايمىن. بۇگىندە قازاق ەلىنىڭ دەموكراتيالىق دامۋ جولىنداعى جەتىستىكتەرىن دۇنيە ءجۇزى قاۋىمداستىعى مويىنداپ, يگى ىستەرىنە قولداۋ كورسەتۋدە.
وتانىمىز ءبىزدى, جاستاردى ءوسىرىپ جەتكىزدى جانە الدىمىزعا تاۋداي تالاپتار قويدى. ءبىز وتانىمىز ءۇشىن قانداي جاقسىلىق جاسايمىز؟ حالقىمىزدىڭ سەنىمىن قالاي اقتايمىز؟ بۇل سۇراققا جاستاردىڭ كوبى جاۋاپ ىزدەرى انىق دەپ ويلايمىن. مەنىڭ ويىمشا, وتاندى ءسۇيۋ – ونى قورعاي ءبىلۋ. بۇل – ءاربىر ازاماتتىڭ مىندەتى. «وتانعا وپاسىزدىق ەتكەنىڭ – ءوز تۇبىڭە جەتكەنىڭ» دەپ حالىق بەكەر ايتپاعان. جاڭا عاسىردا ءوز ەلىن, ءتىلىن, وتانىن سۇيەتىن, ونىڭ بولاشاعىنا جۇرەگى سىزداپ اۋىراتىن جاستاردىڭ سانى كوبەيەدى دەپ ۇمىتتەنەمىن. ءوزىم دە قازاقستاننىڭ وركەندەۋىنە ۇلەسىمدى قوسامىن. وسى تۇستا باتىر باۋىرجان مومىش ۇلى اتامىزدىڭ ۇلاعاتتى ءسوزى ەسكە ءتۇسىپ وتىر: «انامىزدىڭ اق سۇتىمەن بويىمىزعا دارىعان ءتىلىمىزدى ۇمىتۋ – بۇكىل اتا-بابالارىمىزدى, بار تاريحىمىزدى ۇمىتۋ».
مەنىڭ ماقساتىم – العان ءبىلىمىم ارقىلى جوعارى دەڭگەيلى مامان بولىپ, ەلىمىزدىڭ وركەندەۋىنە ۇلەس قوسۋ. ادام تۋعان جەرىن قاستەرلەپ, قادىرىنە جەتە بىلۋگە ءتيىس. «تۋعان ەلىنىڭ قادىرىنە جەتپەگەن ءوز قادىرىنە جەتپەيدى» دەگەن حالىق ناقىلى دا راس. ەندەشە, تۋعان جەرى مەن ەلىن قۇرمەتتەۋ, ونىڭ داڭقىن اسىرۋ ءاربىر ازاماتتىڭ مىندەتى دەپ سانايمىن. ءبىز قاشاندا بەيبىت ەلدىڭ ۇرپاعى بولعانعا قۋانىپ, قايدا جۇرسەك تە تۋعان جەرىمىز وركەندەي بەرسىن دەگەن تىلەكتىڭ ۇستىندە ءجۇرۋىمىز كەرەك. وتانىمىز گۇلدەنىپ, جەرىمىز كوركەيە بەرسىن.
ايناگۇل امىرعالي,
نۇر-سۇلتان قالاسى بويىنشا قازىناشىلىق دەپارتامەنتى
تۇسىمدەر باسقارماسى مەملەكەتتىك مەكەمەلەردىڭ شوتتارى جانە باسقا شوتتار بويىنشا ءبولىمىنىڭ باس مامانى-باس قازىناشىسى
