وتاندىق كينو نارىعىنا 6 تاريحي سەريال قوسىلدى

بۇگىن «جاڭگىر حان. ساراي سىرى»، «احمەت. ۇلت ۇستازى»، «دومالاق انا»، «تاشەنەۆ. تايتالاس»، «قانىش. قازىنا»، «مۇقاعالي. بۇل عاسىردان ەمەسپىن» تاريحي تەلەحيكايالارىنىڭ تانىستىرىلىمى ءوتتى.

ۇلت قايراتكەرلەرى احمەت بايتۇرسىن ۇلى، جۇمابەك تاشەنەۆ، قانىش ساتباەۆ، مۇقاعالي ماقاتاەۆ، جاڭگىر حان مەن دومالاق انانىڭ ومىرىنە ارنالعان تاريحي تۋىندىلار «Qazaqstan» ارناسىنىڭ ەفيرىنەن تاۋەلسىزدىك مەرەكەسى قارساڭىندا كورسەتىلەدى.

ءىس-شاراعا پرەمەر-ءمينيستردىڭ ورىنباسارى ەرالى توعجانوۆ، اقپارات جانە قوعامدىق دامۋ ءمينيسترى ايدا بالاەۆا، دەپۋتاتتار، تەلەۆيدەنيە سالاسىنىڭ ارداگەرلەرى مەن جۋرناليستەر قاتىستى.

«تاريحي سەريالداردىڭ نەگىزگى ماقساتى – تاريحي تۇلعالاردىڭ ءومىر جولىن، سول زاماننىڭ تىنىسىن كورسەتۋ. تاۋەلسىزدىگىمىزدىڭ 30 جىلدىعىنىڭ قارساڭىندا وسى جوبالاردى كورەرمەن نازارىنا ۇسىنىپ، حالىقتىڭ جۇرەگىنە جەتە الساق، سول كەزەڭدەردەگى ءاربىر قيىن ساتتەر مەن جەڭىستى كۇندەردى بۇگىنمەن ۇندەستىرە الساق، بۇل - ۇلكەن جەڭىس. بۇعان ۇلكەن قادام جاسالدى»، دەدى پرەمەر-ءمينيستردىڭ ورىنباسارى ەرالى توعجانوۆ.

ال اقپارات جانە قوعامدىق دامۋ ءمينيسترى ايدا بالاەۆا بۇگىندە وتاندىق سەريال نارىعىندا جوعارى باسەكەلەستىك قالىپتاسىپ كەلە جاتقانىن اتاپ ءوتتى.

«قازىر وتاندىق كينو سالاسىنداعى جۇمىس جىلدان-جىلعا قارقىن الىپ كەلەدى. سوڭعى 5 جىلدىڭ ىشىندە 3500-دەن استام بولىمنەن تۇراتىن 250-گە جۋىق سەريال ءتۇسىرىلدى. وسىدان 10 جىل بۇرىن سەريال دايىندايتىن پروداكشن-كومپانيالار ساۋساقپەن سانارلىق بولسا، بۇگىندە بۇل سالادا باسەكە جوعارى. وسىنىڭ ارقاسىندا، بۇگىندە تاريحي جوبالار مەملەكەتتىك تەلەارنا ونىمدەرىنىڭ 30%-ىن قۇرايدى. جىل اياعىنا دەيىن تاريحي باعىتتا تۇسىرىلگەن 12 سەريال كورەرمەن نازارىنا ۇسىنىلادى. تاۋەلسىزدىكتىڭ قۇنىن ءبىلىپ، ونىڭ قادىر-قاسيەتىن باعالاۋ ءۇشىن وتكەنىمىزدى ۇمىتپاۋىمىز كەرەك. تاريحتا قانداي جولداردان وتتىك، قانداي تۇلعالار بولدى بارلىعىن ۇرپاققا ۇعىندىرۋ كەرەك. سوندىقتان دا پرەزيدەنت ۇلت تۇلعالارىن ناسيحاتتايتىن تاريحي سەريالداردى كوبەيتۋدى تاپسىرعان ەدى. وسى سەريالدار ارقىلى ءبىز وسكەلەڭ ۇرپاققا تاريحي تۇلعالار مەن ولاردىڭ ونەگەلى ءومىرىن تانىستىرا الامىز»، دەدى مينيستر ءوز سوزىندە.

12 ءبولىمدى «جاڭگىر حان. ساراي سىرى» سەريالىنا ارمان سقابىل ۇلى، 6 ءبولىمدى «احمەت. ۇلت ۇستازى» تەلەحيكاياسىنا مۇرات ەسجان، 2 بولىمنەن تۇراتىن «دومالاق انا» تەلەحيكاياسىنا نۇريددين پاتتەۆ، 4 ءبولىمدى «تاشەنەۆ. تايتالاس» سەريالىنا جاسۇلان پوشانوۆ، 6 ءبولىمدى «قانىش. قازىنا» تەلەحيكاياسىنا ايگۇل بايبەك، 4 ءبولىمدى «مۇقاعالي. بۇل عاسىردان ەمەسپىن» تاريحي تۋىندىسىنا ازامات ساتىبالدى جەتەكشىلىك ەتتى.

«كورپوراتسيانىڭ، جالپى، ەلىمىزدىڭ سەريال ءوندىرىسى تاريحىندا بۇعان دەيىن ءبىر جىل ىشىندە 6 كوپبولىمدى تاريحي تەلەحيكايا تۇسىرىلگەن جوق. سوندىقتان بيىلعى جىل ءبىز ءۇشىن ۇلكەن سىناق پەن تاجىريبەگە تولى جىل بولدى. ەڭ باستىسى، ءدال وسىنداي تاۋەكەلدەر ارقىلى نارىقتا تاريحي سەريال وندىرىسىنە ماشىقتانعان كومپانيالار سانى ارتىپ، سەريالدار ءۇشىن جاڭا بەينەلەر قالىپتاسىپ جاتىر»، دەدى باسقارما ءتورايىمى ءلاززات تانىسباي شارانىڭ اشىلۋ بارىسىندا.

باستى كەيىپكەرلەردەن بولەك، سەريالداردا بايدىبەك ءبيدىڭ، ماحامبەت پەن يساتاي، ءالىبي جانگەلدين، مىرجاقىپ دۋلات ۇلى، جۇماباي شاياحمەتوۆ، باۋىرجان مومىش ۇلى، دىنمۇحامەد قوناەۆ، فاريزا وڭعارسىنوۆانىڭ رولدەرى دە كەزدەسەدى.

كەڭەسشى-ستسەناريستەر قاتارىندا جازۋشى مەدەۋ سارسەكە، اقىن ۇلاربەك نۇرعالىم، باقىت بەدەلحان، ۇلىقبەك ەسداۋلەت، احمەتتانۋشى رايحان يماحانبەت، مۇقاعالي ماقاتاەۆتىڭ كەلىنى باقىتگۇل ماقاتاەۆا، جۇمابەك تاشەنەۆتىڭ ۇلى سايان جۇمابەك ۇلى مەن كەلىنى فاتيما سادىققىزى بار.

تاۋەلسىزدىك مەرەكەسىندە ۇلتتىق ارنا ەفيرىندە العاش بولىپ «احمەت. ۇلت ۇستازى» تەلەحيكاياسى كورسەتىلەدى.

ايتا كەتسەك، قازاقستان تەلەراديوكورپوراتسياسى كەلەسى جىلى تۇسىرىلەتىن سەريالدارعا اشىق بايقاۋ جاريالاپ، 188 جوبانى قابىلداپ ۇلگەردى. قازاق تاريحىندا وشپەس ءىز قالدىرعان تۇلعالاردىڭ ءومىرىن، بەينەسىن، شىعارماشىلىعىن ەكران ارقىلى دارىپتەۋ ماقساتىندا كەلەر جىلى ءاليحان بوكەيحانوۆ، الكەي مارعۇلان، دينا نۇرپەيىسوۆا، ماعجان جۇماباەۆ تۋرالى تاريحي جوبالار ءتۇسىرۋ جوسپارلانعان. سونىمەن قاتار، عابيت مۇسىرەپوۆتىڭ «ۇلپان» رومانىن ەكرانيزاتسيالاۋ دا قولعا الىنباق.

بيىل كورپوراتسيانىڭ تۇركى ەلدەرىنە ورتاق تۇلعا «قورقىت اتا» تۇلعاسىنا ارنالعان تەلەحيكايانىڭ شىعارماشىلىق جۇمىستارى باستالىپ تا كەتتى. تۇركيا سەريال وندىرۋشىلەرىمەن بىرلەسە قولعا الىنعان تەلەحيكايانىڭ ءتۇسىرىلىمى ءۇش جىلعا سوزىلادى.