ەلوردا • 30 قاراشا، 2021

جاھان جۇرتىن جالت قاراتقان جاۋھار شاھار

210 رەت كورسەتىلدى

ەل ەگەمەندىگىنىڭ 30 جىلىنا قادام باسقان تۇستا ەلباسىنىڭ ەڭ ۇلى تۋىندىسى رەتىندە ەل استاناسىن ايتۋ­عا بولار ەدى. ارقا تورىندە ايبىنى اسقاقتاعان ەلوردا بۇگىندە جاھان جۇرتىنىڭ جانارىن جالت قاراتقان جاۋھار شاھارعا اينالدى. ءسات ساناپ اجارى ادامزات بالاسىن ارباپ كەلە جاتقان ەلىمىزدىڭ باس قالاسىنا اتباسىن بۇرعاندار سانى ارتىپ كەلەدى. ولار ءجۇز ءتۇرلى ساۋلەت ونەرىنىڭ وزىق ۇلگىسى ۇيلەسىم تاۋىپ، جۇزىكتىڭ تاسىنداي نۇر شاعىلعان ەل استاناسىن كورۋگە ىنتىزار. ەڭ باستىسى، نۇر-سۇلتان قالاسىندا ءتۋريزمدى تۇلەتۋدىڭ اۋىز تولتىرىپ ايتۋعا بولاتىن الەۋەتى بار.

سۋرەتتى تۇسىرگەن ەرلان ومار، «EQ»

ەلوردا – ەلباسىنىڭ ەڭ ۇلى تۋىندىسى

بۇگىندە تۋريزم – ءاتۇستى قاراۋعا بولاتىن سالماقسىز سالا، بولاشاعى جوق باعىت ەمەس. كەرىسىنشە، ەلگە كەلۋشىلەردىڭ ەسە­بىنەن ەڭسەسىن تىكتەپ، تابىسىن ارتتى­رىپ، بيۋدجەتىن تولىقتىرىپ وتىرعان مەم­­لە­­كەتتەر جەتكىلىكتى. ەبىن تاپقاندار ەلدى قىزىقتىرىپ، جۇرتتى ءسۇيسىندىرىپ ءجۇر. بارىن باعامداپ، جوعىن تۇگەندەي بىل­گەن مۇنداي مەملەكەتتەر ورمان-كولىن، اسقار تاۋىن، جازيرا بەلىن، جانعا جاعىم­دى جاعاجايىن ناسيحاتتايدى. وتكەن ءۇش ون­جىلدىقتا قازاقستان دا بۇل سالا­دا كەن­­­جەلەپ قالدى دەپ ايتا المايمىز. ماسە­­لەن، جىل وتكەن سايىن كوركى كوپ­شى­لىكتى تاڭقالدىرعان ەلوردا تورىنە كەلۋشى­لەر­دىڭ قاتارى تولىعا ءتۇستى. تۇڭعىش پرە­زيدەنتىمىزدىڭ ءتول تۋىندىسى بۇگىندە كوز سۇيسىندىرەدى.

ەلورداداعى تۋريزم تۋرالى ەلباسى نۇرسۇلتان نازارباەۆ ءبىر سوزىندە ء«بىز ىشتە دە، سىرتتا دا جاپپاي ءتۋريزمدى دامى­تۋ قاجەتتىگى جايلى بۇرىننان بەرى ايتىپ كەلەمىز. استانا بۇل ماسەلەدە رەسپۋبليكادا ايرىقشى ورىندى يەلەنۋى، بۇكىل الەم­نىڭ تۋريستەرى تارتىلاتىن ورتالىق بولۋى ءتيىس. مەن وسىعان تىرىسۋدامىن. قالانىڭ عيماراتتارى، ساۋلەت بەينەسى بىرەگەي، ءبارى ءتۋريزمدى دامىتۋعا سايكەس كەلەدى. قازىر استاناعا ىسكەرلىك جانە باسقا دا ماسەلەلەر بويىنشا كەلگەن كەز كەلگەن ادامدى تۋريست دەپ ساناۋعا بولادى»، دەگەن بولاتىن.

راسىمەن دە، وسى كۇنگى ەل استاناسى ءسوزسىز الەمنىڭ تۋريستەرى تارتىلاتىن ورتالىققا اينالىپ شىعا كەلدى. بۇل، ەڭ الدىمەن، ەلباسىنىڭ ەرەن ەڭبەگى. ەڭ باس­تىسى، ەلوردانىڭ گۇلدەنگەنى – ەلدىڭ تۇرلەنگەنى. سەبەبى التايدان اتىراۋعا، ارقادان الاتاۋعا دەيىنگى تەڭدەسسىز تەرريتوريادا قانات جايعان قازاق ەلىنىڭ جۇرەگى دە، تۇعىردان تۇسپەس تىرەگى دە – وسى شاھار. ەلورداداعى تۋريزم دامىسا ەل اۋماعىنداعى تۋريزم دە تۇلەي تۇسەدى.

بۇل رەتتە، مەملەكەت باسشىسىنىڭ ءسوزى ويعا ورالادى: ء«بىز، قازاق حالقى، ۇلى تاريحي تۇلعالاردىڭ ءىزباسار ۇرپاعى ەكەنى­مىزدى ەشقاشان ۇمىتپاۋىمىز قاجەت. اتا-بابالارىمىزدىڭ رۋحىن ءتۋريزمنىڭ وزىق ۇلگىلەرى ارقىلى دارىپتەۋىمىز كەرەك. ءبىز سالالىق مەملەكەتتىك باعدارلاما قابىلدادىق. ول تولىققاندى جۇزەگە اساتىن بولسا، ءتۋريزمنىڭ ىشكى جالپى ونىمدەگى ۇلەسى 8%-عا جەتەدى. سىرتتان كەلەتىن تۋريستەر سانى 9 ملن، ال ىشكى تۋريستەر سانى 8 ملن ادام بولادى. ال تۋريزم سالاسىندا جۇمىسپەن قامتىلعاندار سانىن 650 مىڭ ادامعا جەتكىزۋ كەرەك. تۋريزم وتە كۇردەلى سالا. وعان ءتيىستى ماماندار كەرەك. سول سەبەپتى ءبىز تۋريزم ماماندارىن دايىندايتىن ۋنيۆەرسيتەت اشۋ قاجەت دەگەن شەشىم قابىلدادىق».

نۇر-سۇلتان قالاسى – ەلىمىزدىڭ ساياسي، ەكونوميكالىق، مادەني ورتالىعى عانا ەمەس، بۇدان بۇرىن شەتەلدىك، وتاندىق ازاماتتاردى وزىنە تارتىپ تۇراتىن تۋريستىك شاھار. مۇنداي قادام الدەقاشان جاسالىپ قويعان. ەندىگى ماقسات – ەل استاناسىنداعى وسى سالانى دامىتۋ، جاڭعىرتۋ، جاڭا بەلەسكە كوتەرۋ. بۇعان قاجەتتىنىڭ بارلىعى بار. ء«بىرىنشى باعىت – وقيعالىق، ءىس-شا­رالار ءتۋريزمىن دامىتۋ، الەم چەمپيو­ناتتارىن كوپتەپ ۇيىمداستىرۋ. ەكىنشى باعىت – مەديتسينالىق تۋريزم. حالىق­ارالىق ساراپشىلار نۇر-سۇلتان­دا مەديتسينالىق ءتۋريزمنىڭ ۇلكەن الەۋە­تىن كورىپ وتىر. JSI اككرەديتتەگەن جەتى ۇيىمنىڭ التاۋى استانامىزدا ورنا­لا­سقان. ۇشىنشىدەن، نۇر-سۇلتان – ەۋرا­زياداعى ۇزدىك كورمە ورتالىعى. ءبىز حالىقارالىق كونگرەستەر مەن كونفەرەنتسيالار قاۋىمداستىعىنىڭ ەۋرازياداعى ەڭ ءىرى مۇشەسىمىز. حالىقارالىق دەڭگەيدەگى شارالار شەتەلدىك قوناقتاردى كوبەيتىپ قانا قويماي، قالا ەكونوميكاسىنىڭ دامۋىنا ىقپال ەتەدى»، دەيدى نۇر-سۇلتان قالاسىنىڭ اكىمى التاي كولگىنوۆ.

ەلباسى ۇسىنعان بەس ينستيتۋتسيونالدىق رەفورمانى ىسكە اسىرۋ جونىندەگى 100 ناقتى قادام – ۇلت جوسپارىنىڭ «نۇر-سۇلتان قالاسىن زەرتتەۋشىلەردى، ستۋدەنتتەردى، كاسىپكەرلەردى، بۇكىل وڭىردەن تۋريستەردى تارتاتىن «ەۋرازيانىڭ ىسكەرلىك، مادەني جانە عىلىمي ورتالىعىنا اينالدىرۋ» دەپ اتالاتىن 69-تارماعى بار. بۇگىندە وسى تارماقتى جۇيەلى جۇزەگە اسىرۋ ماقساتىندا «Astana Invest قالالىق ينۆەس­تيتسيالاردى دامىتۋ ورتالىعى» جشس نۇر-سۇلتان قالاسىن تارتىمدى تۋريستىك باعىت رەتىندە دامىتۋ، جوسپارلاۋ جانە ىلگەرىلەتۋ بويىنشا اۋقىمدى جۇمىس اتقارىپ كەلەدى.

 

ىسكەرلىك تۋريزم ىلگەرى باسىپ كەلەدى

قالانى ىسكەرلىك (MICE) ءتۋريزمنىڭ باعىتى رەتىندە ىلگەرىلەتۋ جانە دامىتۋ شەڭبەرىندە دەستيناتسيانىڭ بەلسەندى ماركەتينگ قۇرالدارىنىڭ ءبىرى بولىپ تابىلاتىن ىسكەرلىك ءىس-شارالاردى (بيددينگ) تارتۋعا وتىنىمدەر بەرۋ جۇرگىزىلەدى. وسىلايشا، 2021 جىلى باس-اياعى بارلىعى 7 ءوتىنىم بەرىلدى. ونىڭ قاتارىندا 2023 جىلى ۇيىمداستىرىلاتىن جوعارى ءبىلىم ساپاسىن قامتاماسىز ەتۋ جونىندەگى حا­لىق­ارالىق اگەنتتىكتەر جەلىسىنىڭ كونفەرەنتسياسى (INQAAHE); 2023 جىلعا نەگىزدەلگەن ENTER eTourism Conference – حالىقارالىق اقپاراتتىق تەحنولوگيا­لار جانە تۋريزم فەدەراتسياسى; 2024 جىل­عا بەلگىلەنگەن حالىقارالىق شاڭعى سپورتى فەدەراتسياسىنىڭ كونگرەسى (FIS Congress); 2024 جىلعا جوسپارلانعان كاكاو بۇرشاقتارىن وندىرۋشىلەردىڭ دۇ­نيە­جۇزىلىك كونگرەسى جانە 2025 جىل­عا كوز­دەلگەن دۇنيەجۇزىلىك گاس­ترو­ەنتە­رو­لوگتەر كونگرەسى، 2026 جىل­عا جوسپار­لان­عان حالىقارالىق گەوگرافيا­لىق وداقتىڭ ايماقتىق كونفەرەنتسياسى; 2026 جىلى وتەتىن IFCC WorldLab كلينيكالىق حي­ميا جانە زەرتحانالىق مەديتسينا فەدە­را­­تسياسىنىڭ حالىقارالىق كونگرەسى بار.

قاۋىمداستىق مۇشەلەرى­نىڭ داۋىس بەرۋى نەگىزىندە نۇر-سۇلتان قا­­لا­سى 2023 جىلى جوعارى ءبىلىم بەرۋ ساپاسىن قام­تاماسىز ەتۋ اگەنتتىكتەرىنىڭ حالىق­ارالىق جەلىسىنىڭ (INQAAHE) كونفەرەنتسياسىن وتكىزۋ قۇقىعىن جەڭىپ الدى. بۇل كونفەرەنتسيا 2023 جىلعى مامىر-ماۋسىم ايلارىنا جوسپارلانىپ وتىر. اتالعان ءىس-شارا 4 كۇندە اقىلى نەگىزدە 300-دەن استام دەلەگاتتىڭ باسىن قوساتىن بولادى. سونداي-اق 2022 جىلعى مامىردا نۇر-سۇلتان قالاسىندا وتەتىن دۇنيەجۇزىلىك بيزنەس كونفەدەراتسياسىنىڭ (WORLDCOM) ءىس-شاراسىن – Bizz Awards بەدەلدى ماراپاتتاۋ ءراسىمىن تارتۋعا بۇرىن بەرىلگەن ءوتىنىمنىڭ ناتيجەسى شىقتى.

ىسكەرلىك ءتۋريزمدى دامىتۋدىڭ قوسىم­شا تەتىگى نارىقتىڭ ستەيكحولدەرلەرى­مەن (جەر­گىلىكتى سالالىق قاۋىمداس­تىق­تار، كور­پورا­تيۆتىك سەكتور وكىلدەرى جا­نە سەرۆيستىك كوم­­­­­­پانيالار) ارىپتەستىك قاتى­ناستار ورنا­­­­­تۋ سانالادى. وسىعان بايلانىستى، سەرىك­­­­تەستىك قاۋىمداستىقتارمەن جۇمىس بويىن­­­­شا (33 مۇشە)، كورپوراتيۆتىك سەكتور وكىل­­­دە­رىمەن جۇمىس بويىنشا (26 مۇشە) ارىپتەستىك باعدارلامالارىن جانە قالانىڭ MICE NUR-SULTAN سەرىك­تەستىك باع­دار­لاماسىن (62 قاتىسۋشى كومپا­نيا) جۇرگىزەدى. سونىمەن قا­تار 2021 جىل­دىڭ 5-6 مامىرىندا MICE ين­دۋسترياسى بويىن­شا ونلاين ترەنينگ ۇيىمداستىرىلدى. ونى حالىق­ارا­لىق سپيكەر – MICE Know­ledge كومپا­نياسىنىڭ باسقارۋشى ديرەك­تورى، دوكتور روب دەۆيدسون (لوندون، ۇلىبري­تانيا) وتكىزدى. ترەنينگكە بارلىعى 49 ادام قاتىسىپ، ورامدى ويلارىن ورتاعا سالدى.

بۇگىنگى تاڭدا ەل استاناسىندا ىسكەرلىك (MICE) ءتۋريزمنىڭ جەتەكشى كومپانيالارى مەن كاسىبي ساتىپ الۋشىلار (حالىقارالىق قاۋىمداستىقتار، تۋريستىك وپەراتورلار جانە ت.ب.) ءۇشىن تانىستىرۋ تۋرلارىن ۇيىمداستىرۋ جوباسى ءسات­تى ىسكە اسىپ كەلەدى. اتالعان تۋر­لار­دىڭ باس­تى ماقساتى – نۇر-سۇلتان قالا­سىن MICE-ءتۋريزمنىڭ باعىتى رەتىندە ىلگەرىلەتۋ، سونداي-اق حالىقارالىق ءىس-شارالاردى ۇيىمداستىرۋشىلاردىڭ قالانىڭ تۋريستىك الەۋەتى تۋرالى تانىم-تۇسىنىگىن ارتتىرۋ، ەلوردادا ىسكەرلىك ءىس-شا­را­لاردى تارتۋعا جاردەمدەسۋ سانالادى. ماسەلەن، تۇركيا كومپانيالارى ءۇشىن العاشقى تۋر ۇيىمداستىرىلدى. بۇعان قوسا، ماجارستان، رەسەي فەدەراتسياسى جا­نە ءباا كومپانيالارى ءۇشىن تاعى 3 تۋر قولعا الىنادى.

 

Nur-Sultan Pass تۋريستىك كارتاسىن 500 مىڭ ادام ساتىپ الدى

2021 جىلى مامىردا Nur-Sultan Pass تۋريستىك كارتاسىنىڭ جارتى ميلليونىنشى ساتىلىمى www.citypass.kz پورتالىندا تىركەلدى. ارينە، COVID-19 پاندەمياسى جاعدايىندا ەلورداعا قىزىعۋشىلىق تانىتقان شەتەلدىك تۋريستەر سانى قىسقار­عانى انىق. الايدا ەلىمىزدىڭ تۇكپىر-تۇكپىرىنەن اتباسىن بۇرعان مەيماندار سانىنىڭ وسكەنى بايقالادى. پاندەميا جاڭا شەشىمدەردى تابۋعا سەرپىن بەردى. بيىل ءساۋىر ايىندا Astana Invest قالالىق ينۆەستيتسيالاردى دامىتۋ ورتالىعىنىڭ قولداۋىمەن Crocos كومپانياسى Nur-Sultan Pass تۋريستەرىنە ارنالعان سمارت-كارتانىڭ ونلاين ساتىلىمىن Aviata.kz-تە ىسكە قوستى. ەندى بيلەتتەردى ونلاين ساتىپ الۋ سەرۆيسىندە Aviata.kz ارقىلى اۋە نەمەسە تەمىرجول بيلەتتەرىن عانا ەمەس Nur-Sultan Pass ونلاين سمارت-كارتاسىن دا ساتىپ الۋعا بولادى.

CityPASS جوباسىن دامىتۋ اياسىندا شەكتەۋ شارالارىن ۇستانا وتىرىپ، Astana Invest قولداۋىمەن Crocos كومپانياسى «بايتەرەك» مونۋمەنتىندە ورنالاسقان تۋريستىك اقپاراتتىق ورتالىقتا اۆتونومدى روبوت-كەڭەسشى – Promobot ورناتتى. Promobot ەلوردانىڭ ۇزدىك ورىندارى تۋرالى اقپاراتتارعا قانىق، بالالار ءۇشىن دە، ەرەسەكتەر ءۇشىن دە قىزىقتى ەكسكۋرسيا وتكىزە الادى. سول سياقتى CityPASS كارتاسىن ساتادى. بۇل يننوۆاتسيالىق، قاۋىپسىز جانە ينتەراكتيۆتى شەشىم پاندەميا كە­زىن­دە ءتۋريزمدى دامىتۋ مۇمكىندىكتەرىن كەڭەي­تىپ قانا قويماي، جاقسى جاققا دامىتىپ، كەيىنگى كەزەڭگە بەيىمدەلۋگە كومەكتەسەدى.

Nur-Sultan Pass – بۇل تۋريستەردىڭ بەيبىتشىلىك جانە كەلىسىم سارايى، تاۋەلسىز­دىك سارايى، ۇلتتىق مۇراجاي، تريۋمفالدى اركا، «بايتەرەك» مونۋمەنتى، وكەاناريۋم، «دجۋنگلي» پاركى جانە Ailand سوو-داعى شولۋ دوڭگەلەگى، نۇر-الەم (EXPO 2017)، «اتامەكەن» كەشەنى، «الجير» مۇراجاي كەشەنى، HOP-ON-HOP-OFF جانە تەپلوحودپەن ساياحات (جاز مەزگىلىندە) سىندى ءتۇرلى ورىندارعا جاسايتىن ەكسكۋرسياسى. وسىلايشا، ەلوردانىڭ كورىكتى جەرلەرىن ارالاپ قانا قويماي، كارتانىڭ قولدانىلۋ مەرزىمىندە قالا اۆتوبۋستارىندا تەگىن ءجۇرۋ مۇمكىندىگى قاراستىرىلادى. قازىرگى ۋاقىتتا كارتانىڭ قۇنى – 5 990 تەڭگەدەن باستالادى (قۇنى كارتانىڭ ارەكەت ەتۋ مەرزىمىنە بايلانىستى وزگەرەدى). بۇل رەتتە سمارت-كارتا يەسىنىڭ اقشالاي قاراجاتىن شامامەن 70%-عا ۇنەمدەيدى.

Nur-Sultan Pass كارتاسىن www.citypass.kz جانە Aviata.kz سايتتارىنان ساتىپ الۋعا بولادى. سونداي-اق بولاشاقتا Crocos كومپانياسى ءوزىنىڭ برەندتەلگەن ءونىمىن شىعارۋدى جانە كارتالارىن Air Astana اۋە كومپانياسىنىڭ سايتىندا ساتۋدى جوس­پارلاپ وتىر.

 

Visit Nur-Sultan تۋريستەر اعىنىن ارتتىرادى

نۇر-سۇلتان قالاسىنىڭ تۋريزم سا­لاسىنداعى سوڭعى جەتىستىكتەرىنىڭ ءبىرى – 2021 جىلعى مامىردا قالانىڭ Visit Nur-Sultan اتتى سەرىكتەستىك باعدارلاماسىنىڭ باستالۋى. بۇل قالاداعى ءتۋريزم­نىڭ بارلىق سۋبەكتىلەرىن ءبىر ماقساتپەن بىرىكتىرەتىن العاشقى باعدارلاما – كورسەتى­لەتىن قىزمەتتەردىڭ ساپاسىن جاقسارتىپ، پاندەميادان كەيىن ەلوردانىڭ تۋريستىك اعىنىن ارتتىرادى. قازىرگى ۋاقىتتا باعدارلاما ورنالاستىرۋ ورىندارى – Visit Nur-Sultan Comfort، تاماقتانۋ نىساندارى – Visit Nur-Sultan Taste، كورىكتى جەرلەر – Visit Nur-Sultan Discover، سەرۆيستىك ورىندار – Visit Nur-Sultan Support جانە كولىك كومپانيالارى – Visit Nur-Sultan Transport بويىنشا سەرتيفيكاتتاۋدى قامتيدى.

كوشپەلى تەكسەرۋ ناتيجەلەرى قوناقجاي­لىق سەكتورىنداعى 12 كومپانيانىڭ تا­لاپ­تارعا سايكەستىگىن راستادى جانە Visit Nur-Sultan Comfort سايكەستىك سەرتيفيكاتىن الدى. ودان ءارى باعدارلامانىڭ بارلىق قاتىسۋشىلارى Visit Nur-Sultan كاتالوگتارىنىڭ بازاسىندا جاريالانادى. ولار قازاقستاننىڭ الەمدەگى ديپلو­ماتيالىق وكىلدىكتەرى جانە قازاقستانداعى باسقا ەلدەردىڭ وكىلدىكتەرى، حالىقارالىق كولىك توراپتارى (اۋەجايلار، ۆوكزالدار)، سونداي-اق حالىقارالىق قوناق ۇيلەر بازاسىندا تاراتىلادى.

مەديتسينالىق تۋريزم – ەلوردا دامۋىنىڭ ەرتەڭى

تۋريستىك قىزمەتتىڭ تاعى ءبىر با­عىتى – مەديتسينالىق ءتۋريزمدى دامىتۋ. مەديتسينالىق تۋريزم نۇر-سۇلتان قالاسىندا دامۋ الەۋەتى جوعارى باعىت بولىپ سانالادى. ويتكەنى قالادا Joint Commission International (JCI) – دەنساۋلىق ساقتاۋ سالاسىنداعى نەعۇرلىم وبەكتيۆتى جانە بەدەلدى حالىقارالىق سەرتيفيكاتتاۋ، ونىڭ ىشىندە بۇكىل قازاقستان بويىن­شا 6 ۇيىم ورنالاسقان. مەديتسينانىڭ سۇرانىسقا يە باعىتتارى: كارديوحيرۋرگيا، نەيروحيرۋرگيا، ستوماتولوگيالىق كومەك، بۋىنداردى پروتەزدەۋ، رەپرودۋكتيۆتى مەديتسينا (ەكو)، پلاستيكالىق حيرۋرگيا.

قالانى مەديتسينالىق دەستيناتسيا رەتىندە ىلگەرىلەتۋدىڭ نەگىزگى ارتىقشى­لىقتارى: شەتەلدىكتەر ءۇشىن مەديتسينالىق قىزمەتتەردىڭ باعاسى الەمدىك باعادان تومەن; مەديتسينانىڭ بەلگىلى ءبىر سالالا­رىن­داعى ورتالىق ازياداعى كوشباسشى­لىق; نۇر-سۇلتان قالاسىنىڭ كولىكتىك قولجەتىمدىلىگى. وسى مەديتسينالىق ءتۋريزم­دى دامىتۋ شەڭبەرىندە كوشپەلى جانە قارسى اقپاراتتىق تۋرلاردى ۇيىمداستىرۋ، مامانداندىرىلعان كورمەلەرگە قاتىسۋ، تۋرلاردى جىلجىتۋ جوسپارلانۋدا. جەرگى­لىكتى تۋروپەراتورلارمەن بىرگە اقپاراتتىق قولداۋ كورسەتىلۋدە.

سونداي-اق نۇر-سۇلتان قالاسىنىڭ كينو دەستيناتسياسى رەتىندە ىلگەرىلەتۋ جانە قالادا كينو ءتۋريزمىن دامىتۋ جوسپارلانۋدا. ءتۇسىرىلىم الاڭى رەتىندە قالادا لوكاتسيالار ۇسىنۋ قالانىڭ تۋريستىك الەۋەتىن ىلگەرىلەتۋدىڭ ءتيىمدى قۇرالى سانالادى. تانىمال فيلمدەردىڭ ءتۇسىرۋ ورىندارى كەيىن ءتۋريستىڭ باعىتىن تاڭداۋداعى ماڭىزدى فاكتورلاردىڭ ءبىرى بولادى. حالىقارالىق تاجىريبە: ەڭ جارقىن مىسالدار – «ۆلاستەلين كولەتس» جانە «يگرا پرەس­تولوۆ» سياقتى جوبالاردىڭ تۇسىرىلىمدەرى. «ۆلاستەلين كولەتس» – جاڭا زەلانديادا: تۋريستەر سانىنىڭ ءوسۋى 2000 جىلى 1،7 ملن ادام بولسا، 2006 جىلى ءتۇسىرىلىم ورنىنا 2،4 ملن ادام; «يگرا پرەستولوۆ» – دۋبروۆنيك، حورۆاتيادا: تۋريستەردىڭ جالپى سانى 2008 جىلى (تۇسىرىلىمگە دەيىن) 8 ملن ادام بولسا، 2013 جىلى 184 ملن ادامعا جەتتى. سەريالدىڭ ءتۇسىرىلىم ورىندارىنا ساياحات: 2015 جىلى 300 ملن ادام; 2018 جىلى كۇنىنە 8 مىڭنان استام ادام.

قازىردىڭ وزىندە كينو-تۋريزم باعىتىن دامىتۋ جۇمىستارى باستالدى. 2021 جىل­دىڭ جازىندا ەلوردادا ۋكراينانىڭ ءۇش دۇركىن چەمپيونى جانە دريفتينگ بويىن­شا چەمپيوناتتاردىڭ بىرنەشە مارتە جەڭىمپازى الەكساندر گرينچۋكتىڭ قاتى­سۋىمەن Nur-Sultan Drift Challenge بەينەروليگىنىڭ ءتۇسىرىلىمى حالىقارالىق فيلمدەردى، جارنامالىق روليكتەردى، كليپتەردى جانە باسقا دا ءىس-شارالاردى تۇسىرۋگە ارنالعان «كينو-دەستيناتسيا» الاڭى رەتىندە قالا برەندىن ىلگەرىلەتۋ ماقساتىندا وتكىزىلدى.

حالىقارالىق زەرتتەۋلەرگە سايكەس، كوپتەگەن تۋريستەر جارنامالار مەن كينو ەپيزودتارىندا كورگەن ساياحات ورىندارىن تاڭدايدى. بەينەروليكتە ەلوردا جاڭا – ديناميكالىق، بىرەگەي جانە زاماناۋي قىرىنان كورسەتىلگەن. ءتۇسىرىلىم قالامىزدىڭ زاماناۋي ساۋلەتى اياسىندا سول جانە وڭ جاعالاۋدىڭ ەڭ ادەمى جانە كورنەكتى ورىندارىندا ءوتتى. بەينەروليك يدەياسى – نۇر-سۇلتان قالاسى جاڭا لوكاتسيا بولىپ تابىلاتىن جارىس ويىنى.

 

ينفراقۇرىلىم يگىلىگى

تۋريستىك ينفراقۇرىلىمدى دامىتۋ شەڭبەرىندە دە 2021 جىلى بىرقاتار جوبالار ىسكە اسىرىلدى. ماسەلەن، قالا­نىڭ تۋريستىك تارتىمدىلىعىن ارتتىرۋ، ءتۋريستىڭ قولاي­لى جاعدايلارىن قا­لىپ­تاستىرۋ، سونداي-اق نۇر-سۇلتان قالا­سى­نىڭ ءيميدجىن جاقسارتۋ، تۋريستىك يندۋستريا سۋبەكتىلەرىن كورسە­تىلەتىن قىزمەتتەردىڭ ساپاسىن ارتتى­رۋ­عا جا­نە دەڭ­گەيىن جەتىلدىرۋگە ىنتالان­دىرۋ ماقساتىندا 2021 جىلى نۇر-سۇل­تان قا­لا­سىنىڭ «سەرۆيس جانە تۋريزم كوللەدجىنىڭ» جانە 25 قوناق ءۇيدىڭ قىزمەت­كەرلەرىنە كورسەتىلەتىن قىزمەت­تەردىڭ ساپاسىن ارتتىرۋ بويىنشا كۋرستار وتكىزىلدى. سونداي-اق، قالادا ەلەكتروساموكاتتاردى مينۋت سا­يىن جالعا الۋ بويىنشا ينۆەستي­تسيالىق جوبا ىسكە اسىرىلدى. ينۆەستورلار – Jet Kazakhstan جشس جانە Ozim Scooters جشس. قالالىق كەڭىستىكتە پايدالانىلاتىن ەلەكترساموكاتتاردىڭ جالپى سانى – 850 بىرلىكتەن استام.

ەلوردانىڭ كورىكتى جەرلەرىمەن تانىسۋ ءۇشىن حالىقارالىق ينتەرنەت-پلاتفورمادا جاياۋ اۋديوەكسكۋرسيا izi.travel جوباسى ەنگىزىلدى – 150 نىسان بويىنشا 6 تىلدە (ورىس، قازاق، اعىلشىن، تۇرىك، نە­مىس، قىتاي تىلدەرى). بيىل پايدالانۋشى­لار سانى 25 مىڭنان استى. اۋديو ەكسكۋرسيالاردىڭ ينتەرنەت-پلاتفورماسى تەگىن، قولجەتىمدى جانە الەمدە تانىمال، ونى وفلاين رەجى­مىندە دە قولدانۋعا بولادى، بۇل، اسىرەسە، ساياحاتشىلار ءۇشىن ىڭعايلى.

ەلورداعا كەلگەن ءاربىر قوناقتا قالا تۋرالى تۇسىنىك قالىپتاستىرۋ، تۋريستىك، كولىكتىك جانە الەۋمەتتىك ينفراقۇرىلىم وبەكتىلەرى، كورىكتى جەرلەر تۋرالى قاجەتتى انىقتامالىق اقپارات بەرۋ، سونداي-اق ەلورداداعى قوناق ۇيلەر مەن قوعامدىق تاماقتانۋ وبەكتىلەرى تۋرالى اقپارات بەرۋ ءۇشىن 2 تۋريستىك اقپاراتتىق كيوسك جۇمىس ىستەيدى: نۇرسۇلتان نازارباەۆ حالىقارالىق اۋەجايى 1-تەرمينالى جانە «استانا بايتەرەك» مونۋمەنتى.

سونىمەن قاتار اعىمداعى جىلدىڭ تامىز ايىنان باستاپ 1 قاراشاعا دەيىن «ار­بات نۇر-سۇلتان» اۋماعىندا اقپاراتتىق كيوسك اشىلدى. بۇل اقپاراتتىق كيوسكىدە ماۋ­سىمدىق جۇمىس رەجىمى ورناتىلعان (كوكتەمنەن كۇزگە دەيىن). وسى جىلدان باس­تاپ اق­پاراتتىق كيوسكىدە ەلوردا قو­ناق­تارىنىڭ 9 مىڭنان استام ءوتىنىشى وڭدەلدى. سونىمەن قاتار انىقتاما-اقپا­راتتىق قولداۋ كورسەتۋ ماقساتىندا قالا قوناقتارى مەن ەكسپاتتارىنىڭ ىڭعايلى بولۋى ءۇشىن ەلوردادا 8 800 080 38 38 بىرىڭعاي تۋريستىك Call-ورتالىعى جۇمىس ىستەيدى. 1 مىڭنان استام قوڭىراۋ وڭدەلدى.

سونىمەن قاتار ەلوردادا Red Bus تۋريستىك ەكسكۋرسيالىق اۆتوبۋس باعىتى جۇمىس ىستەيدى. 3 500-دەن استام ساپار جاسالدى. قازىرگى ۋاقىتتا نۇر-سۇلتان قالاسىنداعى Red Bus ەكسكۋرسيالىق اۆتوبۋسى ەلورداعا بارعان كەزدە كورىكتى جەرلەردىڭ ءبىرى جانە ۆيزيت كارتوچكاسى سانالادى جانە تۋريستەردىڭ كەلۋى ءۇشىن قولايلى جاعداي جاساۋعا، قالانىڭ تۋريستىك تارتىمدىلىعىن ارتتىرۋعا باعىتتالعان. اۆتوبۋستار اۋديوگيدتەرمەن جابدىقتالعان، وندا تۋريستەرگە ەكسكۋرسيا 8 تىلدە (قازاق، ورىس، اعىلشىن، قىتاي، نەمىس، تۇرىك، فرانتسۋز، يسپان) ۇسىنىلادى.

2021 جىلى ماركەتينگتىك قىزمەتتەر مەن ناۋقاندار اياسىندا بىرقاتار كورسەت­كىش­تەرگە قول جەتكىزىلدى. بۇگىنگى تاڭدا Instag­ram-دا 416 جاريالانىم جانە Facebook-تە 338 جاريالانىم ازىرلەندى جانە جاريالاندى. سونداي-اق ەلوردانىڭ تۋريستىك الەۋەتى تۋرالى 35 بەينەروليك ءتۇسى­رى­لىپ، جاريالاندى. بۇل جاريالانىمدار ينتەرنەتتەگى ماركەتينگتىك ناۋقاندا كەلەسى كورسەتكىشتەرگە يە بولدى: Instagram قامتۋ – 9 364 861 ادام; ءوزارا ارەكەتتەسۋ – 2 ملن; Facebook قامتۋ – 10 547 857 ادام; ءوزارا ارەكەتتەسۋ – 1،5 ملن; كونتەكستىك-مەديالىق جارناما – 400 مىڭعا جۋىق سايتقا كىرۋ; Youtube – 2 ملن-نان استام قارالدى. بارلىق جاريالانىمدار تۋريستىك جانە MICE الەۋەتىن ىلگەرىلەتۋگە، قالادا وتەتىن ءىس-شارالاردى، استانانىڭ كورىكتى جەرلەرىن جانە باسقا دا ءىس-شارالارىن ىلگەرىلەتۋگە باعىتتالعان.

 

 

سوڭعى جاڭالىقتار

ۇقساس جاڭالىقتار